KON ang mga Israelita masugamak sa kasamok, sila magpakitabang kang Jehova. Unya si Jehova mohatag kanilag maisog nga mga pangulo nga motabang kanila. Ang Bibliya nagtawag ning mga panguloha nga mga maghuhukom. Si Josue mao ang unang maghuhukom. Apan duha ka tawo nga nagtabang sa Israel maoy mga babaye nga ginganlan si Debora ug Jael.

Si Debora maoy usa ka manalagna. Si Jehova nagtug-an kaniya sa mga butang mahitungod sa umaabot, ug siya nagtug-an sa mga tawo unsay ginasulti ni Jehova. Siya usab usa ka maghuhukom. Ang katawhan moduol kaniya sa pagpangayog tabang sa ilang mga problema.

Niining panahona si Jabin mao ang hari sa Canaan. Ang iyang kasundalohan malig-on ug daghan sa mga Israelita napugos nga mahimong mga ulipon ni Jabin. Ang pangulo sa kasundalohan ni Jabin ginganlan si Sisera.

Usa ka adlaw si Debora mipakuha kang Maghuhukom Barak ug nagsulti kaniya: ‘Si Jehova nag-ingon: “Pagkuhag 10,000 ka lalaki ug umadto sa Bukid sa Tabor. Didto ako mohatag kanimo sa kadaogan batok kang Sisera ug sa iyang kasundalohan.”’

Si Barak miingon: ‘Ako moadto kon ikaw mouban usab kanako.’ Si Debora miuban, apan siya miingon kang Barak: ‘Dili ka makakuha sa dungog sa pagdaog tungod kay si Jehova motugyan kang Sisera ngadto sa kamot sa usa ka babaye.’

Si Barak milugsong gikan sa Bukid sa Tabor sa pagtagbo sa kasundalohan ni Sisera. Sa kalit si Jehova mipahinabo sa usa ka baha, ug daghan sa kaawayng mga sundalo nangalumos. Apan si Sisera nakadagan.

Sa pagkataudtaod, si Sisera nahiabot sa tolda ni Jael. Iyang gidapit siya sa pagsulod ug naghatag kaniya ug gatas. Dali ra siyang nahinanok. Unya si Jael mibugsok sa usa ka lagdok sa tolda ngadto sa ulo ning daotang tawo. Sa ulahi miabot si Barak ug nakitang patay na si Sisera! Busa ang gisulti ni Debora nahimong tinuod.

Sa kataposan si Haring Jabin napatay usab, ug ang mga Israelita nakabaton na pod sa kalinaw sa makadiyot.