TAN-AWA! Ang mga Israelita mitabok sa Suba sa Jordan! Apan hain ang tubig? Ang suba maoy puno kaayo sa pipila ka minuto pa lamang ang miagi. Apan karon ang tanang tubig wala na! Unsay nahitabo? Tan-awon ta.

Sa miabot ang panahon alang sa mga Israelita nga motabok sa Suba sa Jordan, si Jehova misugo kang Josue sa pagsulti sa katawhan: ‘Ang mga saserdote magyayong sa arka sa tugon ug manguna sa paglakaw kanato. Sa dihang ilang ikatugsad ang ilang mga tiil sa suba, unya ang mga tubig mohunong sa pagdagayday.’

Busa ang mga saserdote mipas-an sa arka sa tugon, nagyayong niini una sa katawhan ug milakaw latas sa suba. Kini nagdagayday sa makusog kaayo ug lalom. Apan sa dihang ang ilang mga tiil mitugsad sa tubig, ang tubig mihunong sa pagdagayday. Kini usa ka milagro! Si Jehova nagsampong sa dagayday sa tubig. Busa, wala na gayoy tubig ang suba!

Ang mga saserdote nga nagdala sa arka sa tugon mibarog sa taliwala sa suba samtang ang mga Israelita mitabok sa mamalang yuta! Nakita mo ba sila sa hulagway?

Sa dihang ang tanan nakalabang na, si Jehova nagsugo kang Josue nga mandoan ang 12 ka kusgan nga lalaki nga mamunit ug 12 ka bato sa dapit diin ang mga saserdote magbarog sa daganasan sa suba. Kining mga batoha tumpion sa dapit nga kampohan sa mga Israelita. Unya, sa umaabot, kon mangutana ang ilang kaanakan unsay buot ipasabot sa mga bato, ikasulti kanila ang paghunong sa tubig sa dihang ang arka sa tugon ni Jehova mitabok sa Jordan. Ang mga bato mopahinumdom sa milagro. Si Josue usab nagpahaluna ug 12 ka bato sa dapit diin ang mga saserdote magbarog sa daganasan.

Sa kataposan si Josue misulti sa mga saserdote nga nagdala sa arka sa tugon: ‘Kawas sa Jordan.’ Ug sa ila gayong paghikawas, ang suba misugod na usab sa pag-agas.