NAKITA mo ba ang mga bulak ug ang hinog nga mga almendras gikan sa maong sungkod, o baston? Kini mao ang sungkod ni Aaron. Kining mga bulak ug hinog nga prutas mitubo gikan sa sungkod ni Aaron sa usa lamang ka gabii. Tan-awon tag ngano.

Ang mga Israelita naglaaglaag na karon sa kamingawan. Ang pipila sa katawhan wala maghunahuna kang Moises nga maoy pangulo gayod, o nga si Aaron mao ang angay hataas nga saserdote. Si Kore mao ang usa kinsa naghunahuna niining paagiha, ug mao pod si Dathan, Abiram ug 250 ka pangulo sa katawhan. Kini silang tanan miduol ug misulti kang Moises: ‘Ngano man nga ikaw nagpaibabaw kanamong tanan?’

Si Moises misulti kang Kore ug sa iyang mga sumusunod sa pag-adto sa tabernakulo uban sa ilang mga insensario. Ilang tanawon kon kinsa ang pilion ni Jehova. Sa sunod adlaw si Kore ug ang iyang 250 ka sumusunod miadto sa tabernakulo. Daghan ang misuportar niining mga tawhana. Si Jehova nasuko kaayo.

Matod ni Moises: ‘Pahilayo kamo sa mga tolda niining daotang mga tawo.’ Ang katawhan namati ug miirog pahilayo kanila. Unya si Moises miingon: ‘Pinaagi niini kamo mahibalo kinsa ang gipili ni Jehova. Ang yuta mobuka ug pagalamyon kining daotang mga tawo.’

Sa gilayon ang yuta miabli. Si Dathan ug Abiram ug kadtong uban kanila, ug ang tolda ni Kore, nahiunlod. Ang yuta mitak-op kanila. Ang katawhan nangalisang ug misinggit: ‘Dagan! Ang yuta basin molamoy usab kanato!’

Si Kore ug ang iyang 250 ka sumusunod duol gihapon sa tabernakulo. Busa si Jehova mipadala ug kalayo, ug ang tanan kanila nangaut-ot. Unya si Jehova miingon nga ang mga insensario sa maong patay nga mga tawo himoong usa ka nipis nga tabon alang sa altar. Kining tabon sa altar mopasidaan sa mga Israelita nga si Aaron ug ang iyang mga anak lamang ang molihok ingong mga saserdote ni Jehova.

Apan buot ni Jehova nga mahimo pang labing matin-aw kon kinsa ang iyang gipili ingon nga saserdote. Busa iyang gisugo ang mga pangulo sa matag tribo sa pagbutang sa usa ka sungkod diha sa tabernakulo sa atubangan sa arka sa tugon. Si Aaron nagbutang usa ka sungkod didto alang sa tribo ni Levi. Ang sungkod sa tawo nga gipili sa pagkasaserdote mamulak!

Sa sunod buntag, aw, ang sungkod ni Aaron namulak niini ug mitubo gikan niana ang hinog nga mga almendras. Busa nakita mo na ba karon kon nganong gipahinabo ni Jehova nga mamulak ang sungkod ni Aaron?