NAHIBALO ka ba kon unsa kining tinukora? Kini maoy usa ka espesyal nga tolda alang sa pagsimba kang Jehova. Kini usab gitawag ang tabernakulo. Ang katawhan nakahuman sa pagtukod niini usa ka tuig human sila mobiya sa Ehipto.

Samtang si Moises didto sa tumoy sa Bukid sa Sinai, si Jehova nagsulti kaniya unsaon pagtukod ang tabernakulo. Misulti siya sa pagbuhat niini sa paagi nga masayon ang pagbungkag. Busa sa dihang ang mga Israelita mibalhin gikan sa usa ka dapit ngadto sa laing dapit sa kamingawan, gidala nila ang tolda uban kanila.

Kon imong tan-awon ang sulod sa gamayng lawak sa tumoy sa tolda, makita mo ang usa ka kahon. Gitawag kini ang arka sa tugon. Sa matag tumoy, dihay usa ka manulunda kun kerubin nga hinimo sa bulawan. Ang Diyos miusab pagsulat sa Napulo ka Sugo sa duha ka lapad nga bato human si Moises makabuak sa una. Kini gitagoan sa sulod sa arka sa tugon, uban sa usa ka tibod sa mana. Nakahinumdom ka ba unsa ang mana?

Gipili sa Diyos ang igsoong lalaki ni Moises nga si Aaron nga mahimong ang hataas nga saserdote. Nanguna siya sa katawhan sa pagsimba kang Jehova. Ang iyang mga anak lalaki maoy mga saserdote usab.

Karon tan-awa ang dakodakong lawak sa tolda. Nakita mo ba ang kahon nga may aso nga nagautbo? Kini mao ang altar diin ang mga saserdote nagasunog sa pipila ka humot panimahoong butang nga ginatawag insenso. Unya anaa ang tangkawan nga may pito ka lamparahan, ug lamisa nga may 12 ka buok tinapay sa ibabaw niini.

Sa hawanan sa tabernakulo anaa ang usa ka dakong palanggana nga puno sa tubig. Ang mga saserdote nagagamit niini alang sa panghugas. Aduna pud usa ka dakong altar diin ang patay nga mga mananap ginasunog ingon nga usa ka halad ngadto kang Jehova. Ang tolda anaa gayod sa taliwala sa kampo. Ang mga Israelita nagapuyo diha sa ilang balongbalong sa palibot niini.