HUMAN si David makasugod sa pagmando sa Jerusalem, si Jehova naghatag sa iyang kasundalohan sa daghang kadaogan. Sa kataposan, uban sa tabang ni Jehova, ang tanang yuta nga gisaad kanila naangkon nila.

Si David maoy usa ka maayong magmamando. Nahigugma siya kang Jehova. Busa usa sa unang mga butang nga iyang gihimo human sa pagkaagaw sa Jerusalem mao ang pagdala sa arka sa tugon ni Jehova didto.

Sa natigulang na si David nakahimo siya sa usa ka grabeng sayop. Nahibalo siya nga maoy sayop ang pagkuha sa usa ka butang nga iyaha sa uban. Apan usa ka gabii, nakakita siya sa usa ka matahom kaayong babaye. Ang iyang ngalan mao si Batseba, ug ang iyang bana si Uria maoy usa sa iyang mga sundalo.

Si David nakagusto sa labihan gayod kang Batseba nga iyang gipakuha siya nga madala sa iyang palasyo. Ang iyang bana atua sa panggubatan. Busa, si David mitipon sa paghigda kaniya, ug sa ulahi nasayran niyang siya nagsabak sa usa ka bata. Si David nabalaka kaayo, ug nagtugon sa iyang pangulo sa kasundalohan si Joab nga ibutang si Uria sa atubangan sa gubat aron siya mapatay. Sa dihang si Uria namatay, si David nangasawa kang Batseba.

Si Jehova nasuko kaayo kang David. Iyang gipadala ang iyang alagad si Nathan dinhi nga nakigsulti kang David. Si David naguol kaayo sa iyang nabuhat, busa si Jehova wala magpahamtang kaniya sa kamatayon. Apan si Jehova miingon: ‘Tungod kay ikaw nakabuhat niining daotang mga butang, makabaton ikaw ug daghang kasamok sa imong panimalay.’ Ug pagkadakong kasamok ang nasugamak ni David!

Una, ang anak lalaki ni Batseba namatay. Unya ang anak lalaki ni David si Absalom mipatay sa iyang igsoong lalaki si Amnon, tungod kay si Amnon nagpugos sa iyang gugma sa ilang igsoong babayeng si Tamar. Unya si Absalom naghimo sa iyang kaugalingon nga hari. Si David kinahanglang makig-away sa usa ka gubat batok kang Absalom, kinsa namatay.

Sa taliwala ning tanan, si Batseba nanganak sa usa ka anak lalaki ginganlan si Solomon. Sa dihang si David natigulang ug masakiton, ang iyang anak lalaki si Adonias misulay sa paghimo sa iyang kaugalingon nga hari. Apan, si David nagdihog kang Solomon nga hari. Sa wala madugay, si David namatay nga 70 anyos ang panuigon. Nagmando siya sa 40 ka tuig. Karon si Solomon mao ang hari sa Israel.