NAHIBALO ka ba unsay gibuhat ning mga tawhana? Sila padulong sa panggubatan. Ang mga tawo diha sa atubangan nanag-awit. Apan ikaw mahimong mangutana: ‘Ngano man ang mga mag-aawit walay dalang mga espada ug mga bangkaw nga maggamit sa pakig-away? Tan-awon ta.

Si Josaphat mao ang hari sa habagatang duha-tribong gingharian sa Israel. Nagpuyo siya sa samang panahon ni Haring Ahab ug Jezabel. Apan si Josaphat maoy usa ka maayong hari. Sulod sa daghang mga tuig ang katawhan sa duha-tribong gingharian nagpahimulos sa usa ka maayong kinabuhi.

Apan karon si Josaphat nakabati nga ang usa ka dakong kasundalohan gikan sa mga nasod sa Moab, Ammon ug Bukid sa Seir moatake sa iyang katawhan. Ang mga Israelita nangadto sa templo diin si Josaphat nag-ampo kang Jehova alang sa tabang.

Si Jehova mipatalinghog. Siya nagsugo sa usa sa iyang mga ulipon sa pagsulti sa katawhan: ‘Ang gubat dili inyo, apan sa Diyos. Dili kamo kinahanglang makiggubat. Pagbantay lamang, ug tan-awa unsaon ni Jehova sa pagluwas kaninyo.’

Sa sunod buntag, si Josaphat midasig sa katawhan: ‘Batoning pagsalig kang Jehova.’ Unya iyang gipahaluna ang mga mag-aawit sa atubangan sa iyang mga sundalo, ug samtang sila nagmartsa sila nanag-awit sa pagdayeg kang Jehova. Nahibalo ka bag unsay nahitabo? Si Jehova mipahinabo sa kaawayng mga sundalo nga mag-unay pag-away mismo, ug sa dihang ang mga Israelita nahiabot, ang tanang sundalo nga kaaway maoy patay na!

Dili ba maalam si Josaphat nga misalig kang Jehova? Kita mahimong maalam, kon kita usab mosalig Kaniya.