Kapin na sa 10 ka tuig sukad si Haring Nabucodonosor mibihag sa tanang labing edukadong mga Israelita ngadto sa Babilonya. Ug karon tan-awa kon unsay nahitabo! Ang Jerusalem gisunog. Ug ang mga Israelita nga wala mapatay gidala nga mga binilanggo sa Babilonya.

Hinumdomi, mao kini ang gipasidaan sa mga manalagna ni Jehova nga mahitabo kon ang katawhan dili mag-usab sa ilang daotang mga paagi. Apan ang mga Israelita wala mamati. Busa angay silang silotan. Ang manalagna sa Diyos nga si Ezekiel mitug-an kanato mahitungod sa daotang mga butang nga gihimo sa mga Israelita.

Si Ezekiel usa sa batan-ong mga lalaki nga gidala ni Haring Nabucodonosor sa Babilonya kapin na sa 10 ka tuig una pa mahinabo kining dakong kalaglagan sa Jerusalem. Si Daniel ug ang iyang tulo ka higala, si Sadrach, Mesach ug Abednego, gidala usab sa samang panahon.

Bisan tuod didto siya sa Babilonya, si Jehova nagpakita kang Ezekiel sa daotang mga butang nga nahitabo didto sa Jerusalem ug sa templo. Si Jehova naghimo niini pinaagi sa usa ka milagro. Ug ang nakita ni Ezekiel makapahikugang!

‘Tan-awa kining dulumtanang mga butang sa templo,’ sulti ni Jehova kang Ezekiel. ‘Tan-awa ang mga paril nga gitaptapan sa mga hulagway sa mga bitin ug ubang mga mananap. Ug tan-awa ang mga Israelitang nagsimba kanila!’

‘Nakita mo ba kon unsay gihimo sa Israelitang mga pangulo sa tago?’ nangutana si Jehova kang Ezekiel. Oo, siya nakaita niini usab. Adunay 70 ka lalaki, ug silang tanan nagsimba sa bakak nga mga diyos. Naghunahuna sila nga si Jehova dili makakita kanila.

Unya si Jehova nagpakita kang Ezekiel sa pipila ka babaye sa amihanang ganghaan sa templo. Sila nagsimba sa bakak nga diyos nga si Tammuz. Ug adunay kapin sa 25 ka lalaki sa ganghaan sa templo ni Jehova kinsa nagsimba sa adlaw!

‘Kining mga tawhana walay pagtagad kanako,’ miingon si Jehova. ‘Dili lamang sila nagbuhat sa daotang mga butang apan miadto pa sa akong templo ug nagbuhat kanila!’ Busa si Jehova misaad: ‘Ilang bation ang puwersa sa akong kasuko. Ug ako dili masubo kanila kon sila malaglag na.’

Tulo ka tuig human si Ezekiel napakitaan niining mga butanga, ang mga Israelita mirebelde batok kang Haring Nabucodonosor. Busa siya miadto sa pakiggubat batok kanila. Sa kataposan, ang Jerusalem gisunog hangtod naugdaw, ug kadaghanan sa katawhan napatay o gidala nga mga binilanggo ngadto sa Babilonya.

Ngano man kini nahitabo? Tungod kay ang mga Israelita wala magpatalinghog kang Jehova ug magsugot sa iyang mga balaod. Kini nagapakita sa kahinungdanon alang kanato sa pagbuhat kanunay sa ginasulti sa Diyos.

Sa sinugdan pipila ka tawo ang gitugotan sa pagpabilin sa yuta sa Israel. Ang usa ka Hudiyo nga ginganlan Gedalias mao ang gipiyalan sa pagdumala kanila. Apan ang pipila ka Israelita mipatay kang Gedalias. Karon ang katawhan nangahadlok nga ang mga Babilonyahanon moanha ug molaglag kanilang tanan tungod ning daotang butang. Busa ilang gipugos si Jeremias nga mouban kanila, ug sila nangalagiw ngadto sa Ehipto.

Kini nagbiya sa yuta sa Israel nga walay bisan unsang mga tawong nagpuyo. Sa 70 ka tuig, ang yuta awaaw. Apan si Jehova nagsaad nga siya magdala sa iyang katawhan balik sa ilang yuta human sa 70 ka tuig. Sa kasamtangan, unsa may nahitabo sa katawhan sa Diyos sa yuta sa Babilonya? Tan-awon ta.