TAN-AWA unsa ka puliki ang mga Israelita nga nagtukod sa mga paril sa Jerusalem. Sa dihang ang Jerusalem gilaglag 152 ka tuig kanhi, si Haring Nabucodonosor nagtumpag sa mga paril. Ang mga Israelita wala magtukod pag-usab sa mga paril sa unang paghibalik nila gikan sa Babilonya.

Ang katawhan wala mobati sa kasegurohan sa pagpuyo ning tanang mga tuig sa usa ka siyudad nga walay mga paril. Ang ilang mga kaaway sayon ra makasulod ug mag-atake kanila. Apan karon kining tawhana si Nehemias nagtabang sa mga tawo sa pagtukod pag-usab sa mga paril. Nahibalo ka ba kon kinsa si Nehemias?

Si Nehemias usa ka Israelita. Siya nagagikan sa siyudad sa Susan, busa siya hayan usa ka maayong higala ni Mardocheo ug Ester. Si Nehemias nagtrabaho alang sa sunod nga hari sa Persia si Artajerjes.

Hinumdomi, kini mao ang maayong hari kinsa naghatag kang Esdras sa tanang salapi nga dad-on balik sa Jerusalem sa pag-ayo sa templo ni Jehova. Apan si Esdras wala magtukod sa nalumpag nga mga paril. Tan-awon ta sa unsang paagi si Nehemias nahiabot sa pagbuhat ning buluhatona.

Maoy 13 ka tuig sukad si Artajerjes naghatag kang Esdras sa salapi sa pagtul-id sa templo ni Jehova. Si Nehemias karon mao ang pangulong tigdala-sa-kopa sa hari. Kini nagkahulogan nga siya ang tigsilbi sa hari sa iyang bino ug pagseguro nga walay magsulay sa paghilo kaniya. Kini usa ka hinungdanon kaayong buluhaton.

Ang pipila ka tawo gikan sa Israel nahianha sa pagduaw kang Nehemias ug nagsugilon kaniya mahitungod sa kasamok nga nabatonan sa mga Israelita, ug sa unsang paagi ang mga paril sa Jerusalem nagpabilin gihapong lumpag. Si Nehemias nasubo. Siya nag-ampo kang Jehova bahin niini.

Usa ka adlaw, ang hari nangutana kang Nehemias: ‘Nganong masulob-on ka man kaayo?’ Si Nehemias nagsugilon kaniya mahitungod sa daotang kahimtang sa Jerusalem. ‘Nan unsa man ang gusto mo?’ nangutana ang hari.

Si Nehemias mihangyo nga moadto sa Jerusalem sa pagtabang sa pagtukod usab sa mga paril. Ang maluluy-ong Haring Artajerjes misugot nga si Nehemias moadto, ug nagtabang kaniya nga makakuhag pipila ka kahoy aron ikadapat sa tinukod. Sa wala madugay human si Nehemias nahiabot sa Jerusalem, iyang gisultihan ang katawhan bahin sa iyang mga plano. Nakagusto sila sa ideya ug misugod sa pagtukod.

Ang mga kaaway sa mga Israelita nakakita sa paril nga natukod. Sila naghulga sa pagpatay sa mga magtutukod. Apan si Nehemias nakabati bahin niini ug naghatag sa mga trabahador ug mga espada ug mga bangkaw. Iyang gisultihan sila nga dili mahadlok.

Ang katawhan maisog kaayo. Sulod lamang sa 52 ka adlaw ang mga paril nahuman. Karon ang katawhan mibati nga seguro sa sulod sa siyudad. Si Nehemias ug Esdras nagtudlo sa katawhan sa balaod sa Diyos, ug sila malipayon.

Bisan pa niana, ang katawhan sa gihapon gimandoan pinaagi sa hari sa Persia. Apan si Jehova nagsaad nga siya magpadala sa usa ka bag-ong hari, ug nga kining haria magdala sa pakigdait sa katawhan. Kinsa ang maong hari? Dul-an sa 450 ka tuig ang milabay una pa ang bisan unsang dugang kasayoran makat-onan mahitungod niini. Unya adunay labing hinungdanong pagkatawo sa usa ka bata. Apan kana maoy lain nang estorya.