TAN-AWA si Jesus dinhi uban sa iyang mga bukton nga gilikos sa usa ka batang lalaki. Ikaw makasulti nga si Jesus sa pagkamatuod nakagusto sa gagmayng mga bata. Ang mga lalaking nagtan-aw mao ang iyang mga apostol. Unsa may gisulti ni Jesus kanila?

Si Jesus ug ang iyang mga apostol bag-o pa lang nahibalik gikan sa taas nga panaw. Diha sa dalan, ang mga apostol naglantugi sa ilang kaugalingon. Busa si Jesus karon misukna kanila: ‘Unsa may inyong gilalisan? Bitaw, si Jesus nahibalo unsay ilang gilantugian, apan buot niyang tan-awon kon sila motug-an ba kaniya.

Ang mga apostol wala motubag, tungod kay sila nanaglantugi mahitungod kon kinsa kanila ang labing dako. Ang pipila sa mga apostol gustong mahimong labing hinungdanon kay sa uban.

Busa si Jesus mitawag sa gamay batang lalaki, ug nagpabarog kaniya atubangan kanilang tanan. Unya siya misulti kanila: ‘Gawas kon kamo mahimong sama sa gagmayng mga bata, kamo dili gayod makasulod sa gingharian sa Diyos. Ang kinadak-ang tawo sa gingharian mao ang usa nga mahimong sama niining bataa.’

Siempre, ang gagmayng kabataan dili mabalaka bahin sa pagkahimong labing dako kay sa uban. Busa ang mga apostol angay makakat-on sa dili paglalisay bahin sa pagkahimong dako.

Sa ulahi, si Jesus nagpakita na usab nga siya matinagdanon sa gagmayng kabataan. Ang pipila ka tawo nagdala sa ilang kabataan sa pagtan-aw kang Jesus, ug ang mga apostol nagsulay sa pagpalayo kanila. Apan miingon si Jesus: ‘Pasagdi ang kabataan moduol kanako, kay ang gingharian sa Diyos iyaha sa mga tawo nga sama kanila.’ Dili ba maayo ang pagkahibalo nga si Jesus nahigugma sa gagmayng kabataan?