MAY usa ka makalilisang hitabo. Si Juan Bautista bag-o lang gipatay. Ang hari nagpapunggot sa iyang ulo.

Sa dihang nabatian kini ni Jesus, naguol kaayo siya. Miadto siya sa usa ka mamingawng dapit nga nag-inusara. Apan ang katawhan misunod kaniya. Busa si Jesus misulti kanila mahitungod sa gingharian sa Diyos ug nag-ayo sa ilang mga masakiton.

Nianang gabhiona, ang mga tinun-an nanuol kaniya ug miingon: ‘Palakta ang katawhan aron sila makapamalit ug pipila nga makaon.’

‘Dili sila kinahanglang mobiya.’ mitubag si Jesus. ‘Hatagi ninyo silag makaon.’

‘Mobili ug dagan kaayong salapi aron makapalit ug igo sa tagsatagsa,’ mitubag kaniya si Felipe. Si Andres namulong: ‘Kining bata nga lalaki nagdalag lima ka buok tinapay ug duha ka isda alang kanato. Apan kini dili gani makapaigo.’

‘Sultihi ang katawhan sa paglingkod sa kasagbotan,’ matod ni Jesus. Unya siya nagpasalamat sa Diyos alang sa pagkaon, ug misugod sa pagpikaspikas niini. Sunod, ang mga tinun-an mihatag sa mga tinapay ug mga isda ngadto sa tanang katawhan. Adunay 5,000 ka lalaki, ug daghan pang mga linibo ka babaye ug kabataan. Silang tanan nangaon hangtod sila nangabusog. Ug sa paghipos sa mga tinun-an sa nanghibilin, adunay 12 ka bukag ang napuno!

Si Jesus karon miagda sa iyang mga tinun-an sa paglatas sa Dagat sa Galilea sakay sa usa ka sakayan. Sulod sa kagabhion, usa ka dakong bagyo mihapak, ug ang mga tinun-an nangalisang. Unya sa pagkatungang gabii, ilang nakita ang usa ka tawo naglakaw padulong kanila latas sa tubig. Naninggit sila sa kahadlok, tungod kay wala sila makaila sa ilang nakita.

‘Ayaw kahadlok,’ miingon si Jesus, ‘Ako kini!’ Sa gihapon dili sila makatuo niini. Unya si Pedro gustong molakaw latas sa tubig ngadto kang Jesus, busa miingon si Jesus: ‘Marika!’ Ug si Pedro misugod sa paglakaw sa tubig! Apan siya nahadlok ug misugod sa pagtugdang. Unya si Jesus nagluwas kaniya.

Sa ulahi si Jesus mipakaon na usab sa mga linibo ka tawo uban sa diyotay lamang pagkaon. Dili ba si Jesus maayo sa iyang pag-atiman sa katawhan? Sa dihang siya magmando ingon nga usa ka hari sa Diyos, dili gayod kita mabalaka mahitungod sa bisan unsang butang!