Tan-awa ang salampati nga mikunsad sa ulo sa lalaki. Ang lalaki mao si Jesus. Siya karon mga 30 anyos na ang panuigon. Ug ang tawo nga kauban niya mao si Juan. Nahibalo ka ba kinsa si Juan? Siya mao ang anak lalaki ni Elisabet. Siya mao ang milukso sa kalipay bisan una pa sa iyang pagkahimugso, sa pagduaw ni Maria kang Elisabet. Apan unsa karon ang gibuhat ni Juan ug Jesus?

Mao pa lamay pagtunlod ni Juan kang Jesus sa ilalom sa tubig sa Suba sa Jordan. Kini mao ang paagi ang usa ka tawo bawtismohan. Una, siya itunlod ilalom sa tubig, ug unya ihaw-as na usab. Kini mao ang gihimo ni Juan sa katawhan, busa siya gitawag si Juan Bautista. Apan ngano man si Juan nagbawtismo kang Jesus?

Buweno, si Jesus miduol kang Juan ug mihangyo nga bawtismohan. Si Juan nagbawtismo sa katawhan kinsa gusto nga magpakita nga sila nasubo tungod sa daotang mga butang nga ilang nahimo. Apan si Jesus wala gayoy nabuhat bisan unsang daotan mga butang. Busa nganong gusto man siya mabawtismohan?

Sa wala pa si Jesus moanha kang Juan, siya usa ka panday, sama sa bana ni Maria, si Jose. Apan ang Diyos may talagsaong buluhaton alang kang Jesus nga ipahimo. Busa sa pagpakita nga siya karon mianhi sa pagbuhat sa kabubut-on sa iyang Amahan, si Jesus mihangyo kang Juan sa pagbawtismo kaniya.

Ang Diyos nahimuot niini. Tapos si Jesus mihaw-as gikan sa tubig, ang usa ka tingog gikan sa langit miingon: ‘Kini mao ang akong anak, nga akong gikahimut-an.’ Usab, maorag ang mga langit naablihan ug kining salampati mikunsad kang Jesus. Kini dili usa ka tinuod salampati. Kini maorag salampati kon tan-awon. Sa pagkatinuod kini mao ang balaang espiritu sa Diyos.

Karon si Jesus daghan nag hunahunaon. Siya miadto sa usa ka mamingaw nga dapit sulod sa 40 ka adlaw. Tulo ka higayon, si Satanas nagtental kang Jesus nga mobuhat sa usa ka butang supak sa mga balaod sa Diyos, apan si Jesus wala mobuhat niini.

Human niana, si Jesus mibalik ug nakatagbo sa pipila ka tawo nga nahimong iyang unang mga sumusunod, o mga disipulo. Ang pipila sa ilang mga ngalan mao si Andres, Pedro (gitawag usab Simon), Felipe ug Nataniel (gitawag usab Bartolome). Si Jesus ug kining bag-ong mga disipulo mibiya para sa distrito sa Galilea. Didto, sa Cana, si Jesus miadto sa usa ka dakong kumbira sa kasal, ug nagbuhat sa iyang unang milagro. Nahibalo ka ba unsa kini? Iyang gihimong bino ang tubig.