Tan-awang manulunda dinhi nga mibukas sa pultahan sa prisohan. Iyang gipagawas ang mga apostol ni Jesus. Nganong napriso sila?

Buweno, usa ka hapon, dili pa lang dugay gikan sa pagbubo sa balaang espiritu sa mga tinun-an ni Jesus, si Pedro ug si Juan nagpadulong ngadto sa templo sa Jerusalem. Duol sa pultahan mao ang usa ka makalilimos, kinsa nabakol sa tibuok niyang kinabuhi. Sa iyang nakita si Pedro ug Juan, nagpakiluoy siya kanila nga hatagan siyag limos. Unsa may buhaton sa mga apostol?

Matod pa ni Pedro: ‘Wala akoy kuwarta, apan ihatag ko kanimo ang akong nabatonan. Sa ngalan ni Jesus, tindog ug lakaw!’ Dihadiha, ang tawo milukso ug misugod sa paglakaw. Sa pagkakita sa katawhan niini, sila nahibulong ug nalipay kaayo.

‘Kami nagbuhat niini pinaagi sa gahom sa Diyos, kinsa nagbanhaw kang Jesus gikan sa mga patay,’ pahayag ni Pedro. Sa wala madugay, ang pipila ka relihiyosong mga pangulo nahiabot. Sila nangasuko kay si Pedro ug Juan nag-ingon nga si Jesus gibanhaw gikan sa mga patay. Busa ilang gibutang sila sa bilanggoan.

Si Pedro mitug-an kanila nga kadto pinaagi sa gahom sa Diyos, kinsa nagbanhaw kang Jesus gikan sa mga patay. Ang mga saserdote naglibog kon unsay ilang buhaton, kay dili sila makalimod sa tinuod milagrong nahitabo. Busa ilang gipasidan-an ang mga apostol sa dili sa pagsulti pa bahin kang Jesus, ug gipalakaw sila.

Samtang ang mga adlaw nanlabay, ang mga apostol mipadayon sa pagwali mahitungod kang Jesus ug nag-ayo sa masakiton. Ang balita niini mikaylap, ug ang katawhan gikan sa mga lungsod palibot sa Jerusalem nagdala sa mga masakiton aron ayohon sa mga apostol. Ang relihiyosong mga pangulo nasina niini, busa ilang gibutang sa bilanggoan ang mga apostol. Apan wala sila mabilanggo ug dugay

Sulod sa kagabhion, ang manulunda sa Diyos nagbukas sa pultahan sa bilanggoan, ingon sa imong makita dinhi. Siya miingon: ‘Lakaw ug padayon sa pagsulti sa katawhan sa templo.’ Sa sunod buntag, ang relihiyosong mga pangulo nakakaplag nga ang mga apostol wala na. Sa ulahi, sila nakaplagang nagpanudlo didto sa templo, ug gidala sa hawanan sa Sanhedrin.

‘Kami naghatag kaninyong estriktong mando nga dili na magtudlo bahin kang Jesus,’ matod sa relihiyosong mga pangulo. ‘Apan gipuno ninyo ang Jerusalem sa inyong pagtulun-an.’ Ang mga apostol mitubag: ‘Kami magsugot sa Diyos ingon nga magmamando inay sa mga tawo.’ Busa sila mipadayon sa pagpanudlo sa ‘maayong balita.’ Dili ba kana usa ka maayong panig-ingnan nga sundon nato?