HUMAN si Pedro ug Juan mibiya sa lubnganan, si Maria nag-inusara na. Misugod siya sa paghilak. Unya iyang nakita ang duha ka manulunda sa sulod sa lubnganan, ingon sa atong makita sa gilabyang hulagway. Sila nangutana kaniya: ‘Nganong naghilak ka?’

Si Maria mitubag: ‘Ilang gikuha ang akong Ginoo, ug wala ako mahibalo kon diin nila ibutang siya.’ Unya nakita ni Maria ang usa ka tawo sa luyo niya. Siya miingon: ‘Kinsa ang imong gipangita?’

Si Maria naghunahunang ang tawo usa ka hardinero, busa miingon siya: ‘Kon imong gikuha siya, sultihi ako kon hain nimo ibutang siya.’ Apan, sa pagkatinuod, ang tawo mao si Jesus. Siya nagsul-ob ug usa ka lawas nga si Maria wala makaila. Apan sa dihang iyang gitawag siya pinaagi sa ngalan, si Maria nahibalo nga mao kini si Jesus, ug midagan sa pagpahibalo sa mga tinun-an.

Sa ulahi nianang adlawa, samtang ang duha ka disipulo nagpaingon sa balangay sa Emaus, usa ka tawo mikuyog kanila. Subo ang mga tinun-an, apan ang tawo misaysay kanila sa daghang mga butang gikan sa Bibliya ug naarang-arang ang ilang pagbati. Sa nanghunong sila para mangaon, ang mga tinun-an nakaila nga siya si Jesus. Unya si Jesus nawala, apan kining duha ka disipulo mibalik gayod sa Jerusalem aron sa pagsugilon sa mga apostol.

Sa kasamtangan, si Jesus mipakita usab kang Pedro. Ug samtang siya nagsulti sa uban mahitungod niini, kining duha ka tinun-an nakakaplag kanila ug misugid sa ilang kasinatian. Ug nahibalo ka ba unsay sunod nahitabo?

Tan-awa ang hulagway. Si Jesus mipakita gilayon sulod sa lawak, bisan pa ang pultahan giseradoan. Pagkamalipayon sa mga tinun-an! Dili ba kana usa ka makadasig nga adlaw? Makaisip ka ba sa gidaghanon sa mga higayon nga si Jesus mipakita na karon sa iyang mga sumusunod? Nakaihap ka ba ug lima ka higayon?

Ang apostol nga si Tomas wala mahiuban kanila sa pagpakita ni Jesus. Busa siya miingon nga makigkita siya kang Jesus mismo una siya motuo niini. Buweno, walo ka adlaw sa ulahi ang mga tinun-an nagkatingob na usab sa usa ka tinakpang lawak, ug sa kalit, si Jesus mipakita na usab. Ning panahona si Tomas uban kanila, ug karon siya mituo.