NAHIBALO ka ba kinsa kining mga tawhana? Ang babaye mao si Maria Magdalena. Ug ang mga lalaki maoy mga manulunda. Si Maria mitan-aw sa dapit diin gipahaluna ang lawas ni Jesus human siya mamatay. Gitawag kinig lubnganan. Apan karon ang lawas nahanaw! Tan-awon ta kon unsay nahitabo niana.

Human si Jesus namatay, ang mga saserdote mihangyo kang Pilato nga bantayan ang lubong ni Jesus, aron ang iyang mga tinun-an dili makakawat sa iyang lawas. Nahinumdom sila nga si Jesus miingon nga siya mabanhaw human sa tulo ka adlaw. Si Pilato misulti sa mga saserdote nga mopadalag mga sundalong mobantay sa lubnganan.

Apan sayo kaayo sa ikatulong adlaw, human si Jesus namatay, usa ka manulunda sa kalit miabot ug nagtulod sa bato gikan sa lubnganan. Ang mga sundalo nahadlok kaayo nga sila wala makalihok. Sa dihang ang mga sundalo nakalihok ra ug mitan-aw sa lubnganan, ang lawas wala na! Ang pipila sa mga sundalo miadto ug misugilon sa mga saserdote. Nahibalo ba ikaw kon unsay gibuhat sa daotang mga saserdote? Ilang gibayran ang mga sundalo aron mobakak! Ang mga saserdote mipahimangno kanila sa pag-ingon nga ang mga tinun-an mianha ug nagkawat sa lawas!

Sa kasamtangan, ang pipila ka babayeng higala ni Jesus miduaw sa lubong. Unsa kahikugang nila nga nakaplagan kining walay sulod! Sa kalit duha ka manulunda sa masanagong sapot mipakita. ‘Si Jesus nabanhaw,’ miingon sila. ‘Lakaw ug suginli ang iyang mga disipulo.’ Sa pag-adto aron suginlan ang mga tinun-an, ilang nakita si Jesus mismo!

Ang mga disipulo dili gayod makatuo nga si Jesus nabuhi, busa si Pedro ug Juan midagan ngadto sa lubong sa pagtan-aw niini mismo. Ang lubong walay sulod! Sa mibiya si Pedro ug Juan, si Maria Magdalena mipabilin. Kana ang higayon nga nakita niya ang duha ka manulunda.

Unsay nahitabo sa lawas ni Jesus? Aw, ang Diyos nagpahinabo nga kini mahanaw. Gihatagan niya si Jesus sa usa ka bag-o espirituhanong lawas, sama sa nabatonan sa mga manulunda sa langit. Apan sa pagpakita sa iyang mga disipulo nga siya nabuhi, si Jesus makasul-ob ug lawas nga makita sa katawhan, ingon sa atong makat-onan.