TAN-AWA! Si Pablo gikadenahan, ug usa ka sundalong Romano nagbantay kaniya. Si Pablo usa ka binilanggo sa Roma. Siya naghulat hangtod ang Romanong Cesar mohukom unsay buhaton kaniya. Samtang siya usa ka binilanggo, ang katawhan gitugotan sa pagduaw kaniya.

Tulo ka adlaw human si Pablo makaabot sa Roma, siya midapit sa pipila ka Hudiyong mga pangulo sa pag-anha ug paghibalag kaniya. Ingon nga sangpotanan, siya nakahimo sa pagwali sa daghang Hudiyo sa Roma mahitungod kang Jesus ug sa gingharian sa Diyos. Ang pipila mituo ug nahimong mga Kristohanon, apan ang uban wala motuo.

Si Pablo usab miwali sa mga sundalo nga nagbantay kaniya. Sulod sa duha ka tuig sa iyang pagkabinilanggo, miwali siya sa tanan kutob sa maarangan. Bisan gani ang pipila sa panimalay ni Cesar nahimong mga Kristohanon.

Apan kinsa man kining bisita nga nagsulat sa lamesa? Oo, mao si Timoteo. Si Timoteo usab nabilanggo tungod sa pagwali sa Gingharian, hinuon siya nakagawas na, ug mianha siya sa pagtabang kang Pablo. Nahibalo ka ba kon unsay gisulat ni Timoteo?

Nahinumdom ka ba sa mga siyudad sa Filipos ug Efeso sa Estorya 110? Si Pablo nakatabang sa pagsugod sa Kristohanong mga kongregasyon didto. Karon si Pablo misulat ngadto niining mga Kristohanon. Ang maong mga sulat anaa sa Bibliya, ug gitawag Taga-Efeso ug Taga-Filipos. Si Pablo karon nagdiktar kang Timoteo sa isulat sa ilang mga higala sa Filipos.

Ang mga taga-Filipos maluloton kaayo kang Pablo. Sila nagpadalag gasa kaniya dinhi sa bilanggoan. Si Pablo nagpasalamat kanila niini. Si Epafrodito mao ang tawo nga nagdala sa gasa. Siya nasakit nga grabe, apan namaayo ra, busa siya makadala sa sulat balik sa Filipos.

Samtang diha siya sa bilanggoan, si Pablo misulat duha pa ka sulat nga nabatonan ta diha sa Bibliya. Ang usa gitawag Taga-Colosas, ug alang sa mga Kristohanon sa Colosas. Ang lain maoy alang sa usa ka suod nga higala ginganlan Filemon nga nagpuyo usab sa Colosas.

Ang ulipon ni Filemon nga si Onesimo mikalagiw ug nakaabot sa Roma. Dinhi, miduaw siya kang Pablo ug sa wala madugay nahimong Kristohanon. Karon si Onesimo naguol nga siya mikalagiw. Busa nahibalo ka bag unsay gisulat ni Pablo niining sulata ngadto kang Filemon?

Si Pablo mihangyo kang Filemon nga pasayloon si Onesimo. ‘Akong gipabalik siya kanimo,’ si Pablo misulat. ‘Apan karon siya dili lamang kay imong ulipon. Siya usab usa ka maayo Kristohanong igsoon.’ Sa dihang si Onesimo mibalik sa Colosas gidala niya kining duha ka sulat, usa ngadto sa mga taga-Colosas ug ang usa ngadto kang Filemon. Makahanduraw lamang kita sa pagkalipay ni Filemon sa dihang iyang nasayran nga ang iyang ulipon nahimong usa ka Kristohanon.

Si Pablo miingon sa iyang sulat sa taga-Filipos nga si Timoteo moanha kanila, ug nga siya usab mismo moanha kanila sa dili madugay. Mipahibalo usab siya kang Filemon nga siya moduaw kaniya sa dili madugay.

Sa dihang gipagawas si Pablo miduaw siya sa iyang Kristohanong mga igsoong lalaki ug mga igsoong babaye sa daghang mga dapit. Apan sa ulahi, siya nabilanggo na usab sa Roma. Niining panahona, si Pablo nahibalo nga siya pagapatyon. Busa siya misulat ngadto kang Timoteo: ‘Ako nagmatinumanon sa Diyos. Ang Diyos magganti kanako.’ Pipila ka tuig human si Pablo gipatay, ang Jerusalem nalaglag na usab, ning panahona pinaagi sa mga Romano.

Apan aduna pay nadugang sa Bibliya. Si Jehova nga Diyos mipasulat kang apostol Juan sa kataposang mga basahon niini, lakip ang basahon sa Pinadayag. Kining basahona sa Bibliya nagtug-an sa umaabot. Magtuon kita karon unsay anaa sa umaabot.