Ang batan-ong lalaki nga imong makita dinhi uban kang apostol Pablo mao si Timoteo. Si Timoteo nagpuyo uban sa iyang pamilya sa Listra. Ang iyang inahan ginganlan si Eunice ug ang iyang apohang babaye si Loida.

Nahibalo ka ba unsay gisulti ni Pablo kang Timoteo? ‘Gusto ka bang mouban ni Silas ug kanako?’ nangutana siya. ‘Kami makagamit sa imong tabang sa pagwali sa katawhan sa halayong mga dapit.’

Si Timoteo miingon nga gusto siyang mouban. Busa sa wala madugay si Timoteo mibiya sa iyang pamilya ug miuban kang Pablo ug Silas. Apan una kita makakat-on mahitungod sa ilang panaw, tan-awon ta unsay nahitabo kang Pablo. Kini dul-an sa 17 ka tuig sukad si Jesus mipakita kaniya sa dalan sa Damasco.

Hinumdomi, si Pablo miadto sa Damasco aron sa paglutos sa mga tinun-an ni Jesus apan karon siya usa ka tinun-an mismo! Sa ulahi pipila ka kaaway nagplano sa pagpatay kang Pablo, apan ang mga tinun-an mitabang kaniya sa pag-ikyas. Ilang gibutang siya sa usa ka alat ug gitunton siya sa gawas sa paril sa siyudad.

Sa wala madugay si Pablo miadto sa Antioquia sa pagwali. Dinhi ning dapita ang mga sumusunod ni Jesus unang gitawag mga Kristohanon. Unya si Pablo ug si Bernabe gipadala sa pagwaling panaw sa halayong mga nasod. Usa sa mga siyudad ilang giduaw mao ang Listra, ang pinuy-anan ni Timoteo.

Karon, dul-an sa usa ka tuig sa ulahi, si Pablo mibalik sa Listra sa ikaduhang biyahe. Sa mibiya si Timoteo uban kang Pablo ug Silas, nahibalo ka ba diin sila moadto? Tan-awa ang mapa, ug kat-onan ta ang pipila ka dapit.

Una sila miadto sa silingang Iconium, unya sa ikaduhang siyudad ginganlan Antioquia. Human niana sila miduaw sa Troas, Filipos, Tesalonica ug Berea. Si Pablo sunod miwali sa Atenas. Nakita mo ba kini diha sa mapa? Unya sila migahin usa ka tuig ug tunga sa Corinto. Sa kataposan sila miduaw sa Efeso. Unya sila mibalik pinaagi sa sakayan sa Cesaria ug mipaingon sa Antioquia, diin si Pablo miestar.

Busa si Timoteo mibiyahe sa ginatos gatos ka milya sa pagtabang kang Pablo sa pagwali ug pagsugod sa bag-ong mga kongregasyon. Sa dihang ikaw mahamtonghamtong na, ikaw ba mahimong usa ka matinumanong ulipon sa Diyos, sama kang Timoteo?