MAKITA mo ba kining kasundalohan sa puting mga kabayo? Diin man sila gikan? Oo, ang mga kabayo nagalumpat gikan sa langit diha sa mga panganod. Aduna bay tinuod nga mga kabayo sa langit?

Wala, kini dili tinuod nga mga kabayo. Ang mga kabayo dili makadagan diha sa mga panganod, dili ba? Busa ngano ang Bibliya misulti mahitungod sa mga kabayo sa langit?

Buweno, ang mga kabayo sagad gayod gigamit sa mga sangka sa gubat. Busa, ang Bibliya mihisgot ug mga tawo nga nakasakay sa mga kabayo gikan sa langit sa pagpakita nga ang Diyos makiggubat sa katawhan dinhi sa yuta. Nahibalo ka ba sa ngalan sa dapit nianang gubata? Armageddon. Ang maong gubat maoy molaglag sa tanang pagkadaotan sa yuta.

Si Jesus mao ang usa kinsa mangulo sa pakig-away ning gubata. Hinumdomi, siya mao ang usa nga gipili ni Jehova sa paghari. Kanay hinungdan nga siya nagsul-ob ug korona. Ang espada nagpakita nga siya magpatay sa tanang mga kaaway sa Diyos. Mahibulong ba kita nga ang Diyos magalaglag sa iyang mga kaaway?

Buweno, tan-awa ang Estorya 10. Nahinumdom ka ba sa Lunop nga naglaglag sa daotang katawhan? Karon tan-awa ang Estorya 15. Ang Sodoma ug Gomora nalaglag pinaagi sa kalayo. Kining duha gipahinabo sa Diyos.

Unsa na man ang mahitungod sa kalaglagan sa kasundalohan sa Ehipto sa Estorya 33? Ug ang pagsilot sa daotang mga Israelita sa Estorya 76? Oo, si Jehova nagpahinabo niining tanan usab.

Busa kita kinahanglang dili matingala nga si Jehova motapos sa tanang pagkadaotan dinhi sa yuta. Apan palandonga lamang unsay kahulogan niana. Paklia ang panid ug tan-awon ta.