KINI maoy usa ka basahon sa matuod nga mga estorya. Gikuha sila gikan sa labing iladong basahon sa kalibotan, ang Bibliya. Ang mga estorya mohatag kanimo sa usa ka kasaysayan sa kalibotan hangtod sa atong presenteng adlaw. Kini usab mobutyag sa pagabuhaton sa Diyos sa umaabot.

Kining basahon mosaysay mahitungod sa katawhan sa Bibliya ug sa mga butang nga ilang gihimo. Kini usab mopakita sa talagsaong paglaom sa walay kataposang kinabuhi sa usa ka paraisong yuta nga ihatag sa Diyos sa katawhan.

Adunay 116 ka estorya sa basahon. Kini gigrupo sa walo ka bahin. Ang panid sa sinugdanan sa matag bahin nagasaysay sa lakbit sa makaplagan nianang bahina. Ang mga estorya gihikay sa han-ay sumala sa pagtungha sa mga hitabo sa kasaysayan.

Ang mga estorya giasoy sa yanong pinulongan. Daghan kabataan makahimo sa pagbasa kanila sa ilang kaugalingon. Ang mga ginikanan makakaplag nga ang ilang labing gamayng bata magakalipay sa pagsublisubli sa pagbasa niining mga estoryaha.

Ang mga sitasyon sa Bibliya ginahatag sa kataposan sa matag estorya. Gidasig ka sa pagbasa niining mga bahina sa Bibliya diin gipasukad ang mga estorya.