NALIPAY kang nagtan-aw sa mamumulong sa plataporma. Usa siya ka brader sa inyong kongregasyon, ug una niya kining bahin sa asembliya. Samtang naminaw ka niya, nakadayeg ka sa paagi sa pagbansay sa katawhan sa Diyos. Nahinumdom ka sa una niyang bahin sa Kingdom Hall, ug karon dako na kaayo siyag pag-uswag. Nabansay siya sa Pioneer Service School. Di pa dugay, siya ug ang iyang asawa nalipay nga nakaeskuyla sa School for Kingdom Evangelizers. Samtang namalakpak mo human sa iyang maayong pakigpulong, mitan-aw ka sa palibot ug naapresyar ang pagbansay sa tanang alagad sa Diyos.

Gitagna sa Bibliya nga moabot ang panahong mahimong “tinudloan ni Jehova” ang tanan niyang katawhan. (Isa. 54:13) Natuman kana karon. Giedukar kita dili lang pinaagig publikasyon, kondili pinaagi sab sa mga tigom, asembliya, kombensiyon, ug sa lainlaing eskuylahan para sa espesipikong mga asaynment sa organisasyon ni Jehova. Niini nga seksiyon, atong hisgotan kon nganong kini nga edukasyon maoy ebidensiya nga ang Gingharian sa Diyos nagmando na.