SA ADLAW nga wala kay trabaho, sayo kang nangandam aron mosangyaw. Pero mihunong ka kadiyot kay mora kag gikapoy. Lami kaayong ipahulay! Pero giampo nimo kini ug nakadesisyon kang modayon. Napartner nimo sa pagsangyaw ang usa ka matinumanong edarang sister ug nakadayeg ka sa iyang kamalahutayon ug kabuotan. Samtang namalaybalay mo, nakahunahuna kang ang mga igsoon sa tibuok kalibotan nagsangyaw sa samang mensahe sa kamatuoran, naggamit sa samang literatura, ug nakabenepisyo sa samang pagbansay. Pag-uli nimo, mibati kag kalagsik. Nalipay ka kaayo nga wala ka magpabilin sa balay!

Karon, ang Kristohanong ministeryo mao ang pangunang buluhaton sa Gingharian sa Diyos. Gitagna ni Jesus nga sa kataposang mga adlaw, mokaylap pag-ayo ang pagsangyaw. (Mat. 24:14) Sa unsang paagi natuman ang iyang tagna? Niining seksiyona, atong hisgotan ang mga tawo, paagi, ug galamiton nga importante kaayo sa Kristohanong ministeryo, nga nagtabang sa minilyong tawo sa tibuok kalibotan nga masabtan nga tinuod ang Gingharian sa Diyos.