1. Unsay nakita ni Ezequiel nga makapahingangha kanato?

HANDURAWA nga nakaeksperyensiya kag sama kang propetang Ezequiel mga 25 ka siglo kanhi: Nagpadulong ka sa dako kaayo, naggilakgilak nga templo. May gamhanang manulonda nga magsuroy nimo nianang katingalahang dapit! Mosaka kag pito ka ang-ang paingon sa usa sa tulo ka ganghaan. Makapahingangha ang mga ganghaan, mga 30 metros ang gihabogon. Diha sa mga agianan, may mga lawak bantayanan. Ang mga haligi gidisenyo samag eleganteng kahoyng palma.—Ezeq. 40:1-4, 10, 14, 16, 22; 41:20.

2. (a) Unsay gisimbolohan sa matagnaong templo? (Tan-awa sab ang footnote.) (b) Unsay makat-onan nato bahin sa mga ganghaan sa templo?

² Kini ang panan-awon sa espirituwal nga templo. Si Ezequiel detalyadong naghubit niini gikan sa kapitulo 40 hangtod 48 sa iyang basahon. Ang templo nagrepresentar sa kahikayan ni Jehova para sa putling pagsimba. May kahulogan ang matag bahin niini para sa atong pagsimba niining kataposang mga adlaw. * Unsay ipasabot sa habog nga mga ganghaan? Kini nagpahinumdom nga kadtong makigbahin sa kahikayan para sa putling pagsimba angayng mosunod sa taas ug matul-id nga mga sukdanan ni Jehova. Kana sab ang gipasabot sa kinulit nga mga kahoyng palma, kay ang Bibliya naggamit usahay niini ingong simbolo sa katul-id. (Sal. 92:12) Komosta ang mga lawak bantayanan? Dili pasudlon sa nindot, naghatag ug kinabuhi nga dalan sa putling pagsimba ang dili mosunod sa sukdanan sa Diyos.—Ezeq. 44:9.

3. Nganong ang mga sumusunod ni Kristo nagkinahanglag padayong pagdalisay?

³ Sa unsang paagi nagakatuman ang panan-awon ni Ezequiel? Sumala sa Kapitulo 2 niining libroha, si Jehova, pinaagi ni Kristo, nagdalisay sa iyang katawhan gikan 1914 hangtod sa sayong bahin sa 1919. Natapos na ba niadto ang pagdalisay? Wala! Sa miaging siglo, si Kristo padayong nagpasiugda sa balaang mga sukdanan ni Jehova sa panggawi. Busa kinahanglang padayong dalisayon ang iyang mga sumusunod. Ngano? Kay ginatigom ni Kristo ang iyang mga sumusunod gikan niining daotang kalibotan ug sila padayong ginatental ni Satanas nga mobalik sa imoralidad. (Basaha ang 2 Pedro 2:20-22.) Hisgotan nato ang tulo ka panggawi diin anam-anam nga ginadalisay ang matuod nga mga Kristohanon. Una, susihon nato ang pipila ka pagdalisay sa moralidad, ikaduha, ang importanteng tagana  para magpabiling hinlo ang kongregasyon, ug ikatulo, ang kahikayan sa pamilya.

4, 5. Unsang taktika ang dugay nang gigamit ni Satanas, ug unsa kini ka malamposon?

⁴ Ang katawhan ni Jehova interesado kanunay sa matarong nga panggawi. Busa, ilang ginadawat ang nagakatin-aw nga instruksiyon bahin niana. Aniay mga pananglitan.

⁵ Seksuwal nga imoralidad. Katuyoan ni Jehova nga ang seksuwal nga relasyon sa magtiayon maoy hinlo ug makapalipay. Ginahimo ni Satanas nga mahugaw kining bililhong gasa ug gigamit kini sa pagtental sa katawhan sa Diyos aron si Jehova masuko kanila. Kini nga taktika malamposong gigamit ni Satanas sa mga adlaw ni Balaam, ug ilabina niining kataposang mga adlaw.—Num. 25:1-3, 9; Pin. 2:14.

6. Unsang panaad ang giimprenta sa Watch Tower, giunsa kini paggamit, ug nganong gihunong kini? (Tan-awa sab ang footnote.)

⁶ Aron suklan ang paningkamot ni Satanas, ang Hunyo 15, 1908 nga Watch Tower nag-imprentag panaad nga nag-ingon: “Ako, sa tanang oras ug lugar, magpakitag maayong panggawi sa kaatbang nga sekso, pribado man o publiko.” * Bisag dili obligado, daghan ang nanaad ug nagpadala sa ilang ngalan aron maimprenta sa Zion’s Watch Tower. Nakita sa ulahi nga ang maong panaad, bisag mapuslanon niadtong panahona, nahimong rituwal na lang ug busa gihunong. Pero ang taas nga mga prinsipyo sa moralidad nga girepresentahan niana kanunayng gituboy.

7. Sa 1935, unsang problema ang gihisgotan sa Watchtower, ug unsang sukdanan ang gituboy?

⁷ Migrabe hinuon ang pag-atake ni Satanas. Prangkang gihisgotan sa Marso 1, 1935 nga Watchtower ang usa ka nagkadakong problema sa katawhan sa Diyos. Ang pipila naghunahuna nga sila dili na obligadong mosunod sa sukdanan ni Jehova bahin sa moralidad kay nakigbahin sila sa pagsangyaw. Ang Watchtower klarong miingon: “Angayng hinumdoman nga dili ra pagsangyaw ang gisugo kanato. Ang mga saksi ni Jehova maoy iyang mga representante, ug sila obligado nga morepresentar kang Jehova ug sa iyang gingharian sa hustong paagi.” Unya ang artikulo klarong mitambag bahin sa kaminyoon ug sa maayong panggawi bahin sa sekso, sa ingon nagtabang kanila nga mokalagiw gikan sa seksuwal nga imoralidad.—1 Cor. 6:18.

8. Nganong balikbalik nga gipasiugda sa Bantayanang Torre ang bug-os nga kahulogan sa Gregong pulong para sa seksuwal nga imoralidad?

⁸ Di pa dugayng katuigan, ang Bantayanang Torre balikbalik nga nagpasiugda sa hustong kahulogan sa pulong nga gigamit sa Gregong Kasulatan para sa seksuwal nga imoralidad—por·neiʹa. Ang kahulogan wala lang magtumong sa pagpakigsekso. Hinunoa, apil niini ang lainlaing imoral nga buhat, nga nagsakop sa tanang law-ayng buhat diha sa balay sa mga pampam. Busa ang mga sumusunod ni Kristo maproteksiyonan batok sa seksuwal nga kahiwian nga kaylap sa kalibotan karon.—Basaha ang Efeso 4:17-19.

9, 10. (a) Unsang laing isyu sa moralidad ang gihisgotan sa Watchtower sa 1935? (b) Unsay gitudlo sa Bibliya bahin sa alkoholikong ilimnon?

 ⁹ Pag-abuso sa alkoholikong ilimnon. Ang Marso 1, 1935 nga Watchtower naghisgot ug laing isyu sa moralidad: “Namatikdan sab nga ang pipila nakainom samtang nagsangyaw ug naghimog ubang buluhaton sa organisasyon. Base sa Kasulatan, kanus-a angayng moinom ug bino? Maayo ba nga moinom sa punto nga maapektohan ang pag-alagad diha sa organisasyon sa Ginoo?”

¹⁰ Ang tubag naghisgot sa balanseng panglantaw sa Pulong sa Diyos bahin sa alkoholikong ilimnon. Ang Bibliya wala magdili sa kasarangan nga pag-inom ug bino ug ubang alkoholikong ilimnon, pero kini supak gyod sa paghuboghubog. (Sal. 104:14, 15; 1 Cor. 6:9, 10) Bahin sa paghimog sagradong pag-alagad samtang nakainom, ang asoy bahin sa mga anak ni Aaron dugay nang nagpasidaan sa mga alagad sa Diyos. Gipatay sila sa Diyos tungod sa pagtanyag sa ginadili nga kalayo sa iyang halaran. Ang asoy nagpadayag kon ngano tingaling nakahimo sila niadtong daotang buhat, kay human niadto, ang Diyos mihatag ug balaod nga nagdili sa tanang saserdote sa pag-inom ug alkoholikong ilimnon samtang naghimog sagradong pag-alagad. (Lev. 10:1, 2, 8-11) Aron maaplikar ang prinsipyo niana karon, angay nga molikay ang mga sumusunod ni Kristo sa pag-inom ug alkoholikong ilimnon samtang nakigbahin sa sagradong pag-alagad.

11. Nganong usa ka panalangin ang dugang katin-awan bahin sa alkoholismo nga nadawat sa katawhan sa Diyos?

¹¹ Di pa dugayng katuigan, ang mga sumusunod ni Kristo mas natin-awan bahin sa alkoholismo—ang pirme ug sobrang pag-inom ug alkoholikong ilimnon. Tungod sa tukmang kahibalo sa hustong panahon, daghan ang natabangan sa pagbuntog sa alkoholismo ug pagtul-id sa ilang kinabuhi. Mas daghan pa ang natabangan sa paglikay niana. Dili gyod tugotan ni bisan kinsa nga tungod sa sobrang pag-inom, sila mawad-ag dignidad, pamilya, ug labaw sa tanan, pribilehiyo sa pagpakigbahin sa putling pagsimba kang Jehova.

12. Bisan sa wala pa magsugod ang kataposang mga adlaw, unsa nay panglantaw sa mga alagad ni Kristo bahin sa pagpanabako?

¹² Pagpanabako. Bisan sa wala pa magsugod ang kataposang mga adlaw, ang mga alagad ni Kristo nagsaway na sa pagpanabako. Mga katuigan kanhi, usa ka tigulang nga brader, si Charles Capen, nahinumdom sa iyang unang pagkahimamat kang Charles Taze Russell sa ulahing bahin sa ika-19ng siglo. Si Capen, 13 anyos pa niadto, ug tulo sa iyang mga igsoong lalaki nagtindog sa hagdanan sa Bible House sa Allegheny, Pennsylvania. Pag-agi ni Russell, siya nangutana: “Nanigarilyo ba mo? Nanimaho mang tabako.” Namalibad sila pag-ayo. Seguradong wala sila magduda kon unsay panglantaw ni Russell sa pagpanabako. Sa Agosto 1, 1895 nga Watch Tower, si Brader Russell mikomento bahin sa 2 Corinto 7:1, nga nag-ingon: “Dili gyod makahimaya sa Diyos ug makaayo sa Kristohanon ang  lainlaing paagi sa paggamit ug tabako. . . . Dili nato mahanduraw nga ang atong Ginoo magpabulhot ug tabako o mag-usap ug bisan unsang makapahugaw.”

13. Unsang pagdalisay sa moralidad ang gihimo sa 1973?

¹³ Sa 1935, ang Watchtower nagtawag sa tabako nga “mahugawng sagbot” ug miingon nga kadtong mag-usap o magtabako niana dili makapabiling membro sa pamilyang Bethel o representante sa organisasyon sa Diyos ingong payunir o nagapanawng ministro. Sa 1973, gihimo ang dugang pagdalisay. Ang Watchtower sa Hunyo 1 mipatin-aw nga walay Saksi ni Jehova nga magpabiling maayog dungog sa kongregasyon samtang nagahimo niining makapatay, hugaw, ug dili mahigugmaong bisyo. Ipalagpot kadtong dili mohunong sa maong bisyo. * Gihimo ni Kristo ang laing lakang sa pagdalisay sa iyang mga sumusunod.

14. Unsay sukdanan sa Diyos bahin sa dugo, ug nganong nauso ang pag-abonog dugo?

¹⁴ Sayop nga paggamit sa dugo. Sa adlaw ni Noe, ang Diyos miingon nga daotan ang pagkaon ug dugo. Gipahayag niyag usab ang maong baroganan sa Balaod ngadto sa Israel, ug gisugo sab niya ang Kristohanong kongregasyon nga “mag-ayad . . . gikan sa dugo.” (Buh. 15:20, 29; Gen. 9:4; Lev. 7:26) Dili ikatingala nga sa modernong panahon, si Satanas nakakitag paagi aron daghan ang mosupak niana. Ang mga doktor nag-eksperimento pa sa pag-abonog dugo sa ika-19ng siglo, pero pagkadiskobre sa lainlaing type sa dugo, mas mikaylap kana nga pamaagi. Sa 1937, gisugdan ang pagkolekta ug pagpondog dugo sa mga blood bank, ug tungod sa Gubat sa Kalibotan II, mas napromot pa ang pag-abonog dugo. Sa wala madugay, kana nauso na sa tibuok kalibotan.

15, 16. (a) Unsay baroganan sa mga Saksi ni Jehova bahin sa pag-abonog dugo? (b) Unsang tabang ang gihatag kanila bahin sa pagpanambal nga dili mogamit ug dugo, ug unsay resulta?

¹⁵ Niadto pang 1944, gipaila na sa Watchtower nga ang pagpaabonog dugo, sa pagkatinuod, maoy laing paagi sa pagkaog dugo. Pagkasunod tuig, kanang Kasulatanhong panglantaw gipalig-on ug gitin-aw. Pagka-1951, may giimprentang listahan sa mga pangutanag tubag aron tabangan ang katawhan sa Diyos sa pag-atubang sa mga doktor. Sa tibuok kalibotan, ang matinumanong mga sumusunod ni Kristo maisogong mibarog, bisan pag sila gitamay, gisupak, ug gilutos. Pero padayong gidasig ni Kristo ang iyang organisasyon aron itagana ang gikinahanglang tabang. Naimprenta ang mga brosyur ug artikulo nga detalyado ug maayong pagkadukiduki.

¹⁶ Sa 1979, ang pipila ka ansiyano misugod pagbisitag mga ospital aron ipatin-aw sa mga doktor ang atong baroganan, mga rason base sa Bibliya, ug mga alternatibo sa pag-abonog dugo. Sa 1980, ang mga ansiyano sa 39 ka siyudad sa United States nakadawat ug espesyal nga pagbansay para niana. Ngadtongadto, giaprobahan sa Nagamandong Lawas ang pag-organisar ug mga Hospital Liaison Committee sa tibuok kalibotan.  Miuswag ba ang maong kalihokan latas sa katuigan? Pagkakaron, libolibong doktor nakigkooperar sa mga pasyenteng Saksi, nga nagtahod sa atong baroganan bahin sa dugo. Nagkadaghang ospital ang nagtanyag ug pamaagi nga dili mogamit ug dugo, ug ang pipila nag-isip gani niini ingong kinamaayohang pagpanambal. Makapalipay gyod ang paghunahuna kon giunsa pagpanalipod ni Jesus ang iyang mga sumusunod aron dili mahugawan ni Satanas.—Basaha ang Efeso 5:25-27.

17. Unsaon nato pagpakita nga atong gipabilhan ang paagi ni Kristo sa pagdalisay sa iyang mga sumusunod?

¹⁷ Pangutan-a ang kaugalingon, ‘Gipabilhan ba nako ang paagi ni Kristo sa pagdalisay sa iyang mga sumusunod, nga nagbansay kanato sa pagsunod sa hataas nga sukdanan ni Jehova bahin sa moralidad?’ Kon mao, hinumdoman nato nga si Satanas kanunayng nagtinguha nga momenos ang atong pagtahod sa diyosnong moralidad aron mahilayo kita kang Jehova ug kang Jesus. Aron masumpo kana, ang organisasyon ni Jehova kanunayng nagpasidaan ug nagpahinumdom batok sa imoral nga mga buhat niining kalibotana. Magpabilin kitang alerto, madinawaton, ug masinundanon sa maong mga tambag.—Prov. 19:20.

18. Bahin niadtong tinuyong morebelde sa mga sukdanan sa Diyos, unsay gipahinumdom sa panan-awon ni Ezequiel?

¹⁸ Ang ikaduhang bahin sa pagdalisay sa moralidad naglakip sa paghupot nga hinlo sa kongregasyon. Ikasubo, dili tanan nga midawat sa sukdanan ni Jehova ug nagpadedikar kaniya ang nagmaunongon. Ang pipila ngadtongadto nausab ug tinuyong mirebelde batok sa maong mga sukdanan. Unsay himoon kanila? May gipaila ang panan-awon ni Ezequiel sa espirituwal nga templo nga gihisgotan sa sinugdanan. Nahinumdom ka ba sa habog nga mga ganghaan? May mga lawak bantayanan sa matag agianan. Protektahan sa mga magbalantay ang templo aron dili makasulod kadtong “dili-tinuli sa kasingkasing.” (Ezeq. 44:9) Kana klarong pahinumdom nga ang putling pagsimba maoy pribilehiyo nga para lamang sa naningkamot pagsunod sa putling mga sukdanan ni Jehova bahin sa panggawi. Sa susama, ang pribilehiyo sa pagpakig-uban sa mga isigka-Kristohanon diha sa pagsimba karon dili usab para sa tanan.

19, 20. (a) Giunsa ni Jesus pagdalisay ang paagi sa iyang mga sumusunod sa paghusay sa seryosong mga sala? (b) Unsay tulo ka rason sa pagpalagpot sa dili mahinulsolong makasasala?

¹⁹ Niadtong 1892, ang Watch Tower miingon nga “obligasyon natong ipalagpot ang (mga Kristohanong) dili motuo, direkta o dili-direkta, nga si Kristo mao ang lukat [katumbas nga bili] para sa tanan.” (Basaha ang 2 Juan 10.) Sa 1904, ang librong The New Creation miingon nga kadtong magpadayon sa daotang panggawi makadaot sa kongregasyon. Ang tibuok kongregasyon niadto moapil sa “mga husay sa kongregasyon” aron imbestigahon ang seryosong mga sala. Pero panagsa ra to. Sa 1944, gipakita sa Watchtower nga responsableng mga brader lang ang maghusay niana. Sa 1952, giimprenta sa Watchtower ang paagi sa paghusay nga binase sa Bibliya, nga nagpasiugda sa pangunang rason sa pagpalagpot sa mga dili mahinulsolon—aron mahinlo ang kongregasyon.

²⁰ Sukad niadto, si Kristo nagtabang sa iyang mga sumusunod aron mahimong klaro ug madalisay ang paagi sa paghusay sa seryosong mga sala. Ang mga ansiyano gibansay kon unsaon paghusay sa maong mga kaso sumala sa paagi ni Jehova, nga mabalanse ang hustisya ug kaluoy. Klaro kanato karon ang tulo ka rason sa pagpalagpot sa dili mahinulsolong makasasala gikan sa kongregasyon: (1) aron dili mapasipalahan ang ngalan ni Jehova, (2) maproteksiyonan ang kongregasyon batok sa kahugawan sa seryosong sala, ug (3) matandog ang nakasala sa paghinulsol kon posible.

21. Nganong ang kahikayan sa pagpalagpot usa ka panalangin sa katawhan sa Diyos?

²¹ Nakita ba nimo nga ang kahikayan sa pagpalagpot maoy panalangin sa mga sumusunod ni Kristo karon? Sa karaang Israel, ang mga nakasala sagad nahimong daotang impluwensiya sa nasod, ug sila mas daghan pa usahay kay sa mga nahigugma kang Jehova ug niadtong gustong mobuhat sa matarong. Busa,  ang nasod sagad nakapasipala sa ngalan ni Jehova ug nawad-an sa iyang pag-uyon. (Jer. 7:23-28) Pero karon, si Jehova nakiglabot sa mga tawong mahunahunaon sa espirituwal gikan sa lainlaing nasod, dili sa usa lang ka nasod. Kay ipalagpot ang gahiang makasasala, sila dili na magamit ni Satanas sa dugang pagdaot ug paghugaw sa kongregasyon. Sa ingon, nalimitahan ang ilang impluwensiya. Ingong grupo, segurado nga kita padayong uyonan ni Jehova. Hinumdomi, siya nagsaad: “Bisan unsa nga hinagiban nga buhaton batok kanimo dili magmalamposon.” (Isa. 54:17) Kita ba maunongong nagsuportar sa mga ansiyano, nga may bug-at nga responsibilidad sa paghusay sa seryosong mga kaso?

22, 23. Nganong mapasalamaton kita sa mga Kristohanon sa ika-20ng siglo, pero unsay nagpakita nga kinahanglan pang mahimong mas balanse kon bahin sa pamilya?

²² Ang ikatulong bahin nga padayong gidalisay ang mga sumusunod ni Kristo maoy mahitungod sa kaminyoon ug pamilya. Ang atong panglantaw bahin sa pamilya nadalisay ba latas sa katuigan? Oo. Pananglitan, sa magbasa kita bahin sa mga alagad sa Diyos sa sayong bahin sa ika-20ng siglo, makadayeg gyod kita sa ilang espiritu sa pagsakripisyo. Kita mapasalamaton kaayo kon giunsa nila pag-una ang sagradong pag-alagad. Pero makita sab dayon nato nga kinahanglan pang mahimong mas balanse. Ngano?

²³ Ang mga brader kaniadto sagad modawat ug mga asaynment sa ministeryo o mobisitag mga kongregasyon nga dangtag mga bulan. Usahay, kusganong gitambag ang dili pagminyo, nga dili na uyon sa Kasulatan. Halos walay paghisgot kon unsaon pagpalig-on ang kaminyoon. Kini ba gihapon ang kahimtang karon? Dili!

24. Giunsa pagtabang ni Kristo ang iyang mga sumusunod aron makabaton ug mas balanseng panglantaw sa kaminyoon ug pamilya?

²⁴ Pagkakaron, dili angayng pasagdan ang pamilya tungod sa pag-atiman sa teokratikanhong mga asaynment. (Basaha ang 1 Timoteo 5:8.) Dugang pa, gipaneguro ni Kristo nga makadawat kanunay ang iyang mga sumusunod ug mapuslanon, balanseng tambag gikan sa Bibliya bahin sa kaminyoon ug pamilya. (Efe. 3:14, 15) Sa 1978, gi-release sa Iningles ang librong Paghimo sa Imong Pamilyahanong Kinabuhi nga Malipayon. Mga 18 ka tuig sa ulahi, giimprenta ang librong Ang Sekreto sa Kalipay sa Pamilya. Ang Bantayanang Torre sab dunay daghang artikulo aron tabangan ang mga magtiayon nga ipadapat ang Kasulatanhong mga prinsipyo diha sa ilang kaminyoon.

25-27. Paglabay sa panahon, sa unsang paagi mas gitagad ang panginahanglan sa mga bata nga lainlaig edad?

²⁵ Komosta ang kabataan? Sa nanglabayng katuigan, mas gitagad ang ilang mga panginahanglan. Ang organisasyon ni Jehova dugay nang may tagana para sa kabataan sa lainlaing edad, pero ang kaniadtong samag tinulo lang miagos na karon  samag sapa. Pananglitan, ang “Pagtuon sa Bibliya sa Kabataan” migula sa The Golden Age gikan sa 1919 hangtod 1921. Gisundan kini sa brosyur nga The Golden Age ABC sa 1920 ug sa librong Children sa 1941. Sa katuigang 1970, gitagana sab ang mga librong Pagpatalinghog sa Dakong Magtutudlo, Ang Imong Pagkabatan-on—Pagpahimulos sa Labing Maayo Niini, ug Akong Basahon sa mga Estorya sa Bibliya. Sa 1982, nagsugod ang serye sa Pagmata! nga “Mga Batan-on Nangutana,” nga gihimong libro nga Mga Pangutanang Gisukna sa mga Batan-on—Mga Tubag nga Mosaler, giimprenta sa 1989.

²⁶ Karon, duna kitay duha ka bag-ong tomo sa librong Gisukna sa mga Batan-on, samtang ang serye nga “Mga Batan-on Nangutana” naa na karon sa atong Web site nga jw.org/ceb. Duna sab kitay librong Pagkakat-on Gikan sa Dakong Magtutudlo. Ang atong Web site dunay daghang kalingawan para sa mga bata, sama sa mga card sa karakter sa Bibliya, leksiyon para sa gagmay ug sa dagko-dagko nang mga bata, puzzle, video, gidrowing nga mga estorya sa Bibliya, ug mga leksiyon sa Bibliya para  sa mga batang tres anyos paubos. Klaro, wala mausab ang panglantaw ni Kristo sa mga bata sukad sa unang siglo dihang iya silang gikugos. (Mar. 10:13-16) Gusto niyang ang mga bata mobating pinalangga ug pinakaon pag-ayo sa espirituwal.

²⁷ Gusto sab ni Jesus nga maproteksiyonan ang mga bata gikan sa kadaot. Samtang misamot kaubos ang moral niining kalibotana, misamot sab ang pagpangabuso sa mga bata. Busa giimprenta ang klaro ug prangkang mga artikulo aron maproteksiyonan sa mga ginikanan ang ilang mga anak gikan niining daotang buhat. *

28. (a) Unsay gikinahanglan kon kita nakigbahin sa putling pagsimba, sumala sa giilustrar sa panan-awon ni Ezequiel sa templo? (b) Unsay determinado nimong buhaton?

²⁸ Makapadasig ang pagpamalandong kon giunsa ni Jesus pagdalisay ang iyang mga sumusunod, nga nagbansay nila sa pagtahod, pagsunod, ug pagbenepisyo gikan sa taas nga mga sukdanan ni Jehova sa moral. Hunahunaa na sab ang templong nakita ni Ezequiel sa panan-awon. Hinumdomi ang habog nga mga ganghaan. Ang templo dili literal kondili espirituwal. Pero tinuod ba kini kanato? Makasulod kita niini dili lang pinaagi sa pagtambong sa Kingdom Hall, pag-ablig Bibliya, o pagpanuktok sa pultahan dihang magsangyaw. Kana pisikal lang nga mga buhat. Ang nagpakaaron-ingnon makahimo niana bisag dili mosulod sa templo. Pero kon kita nagabuhat nianang mga butanga samtang nagsunod sa taas nga sukdanan ni Jehova sa moral, ug nakigbahin sa putling pagsimba uban ang hustong motibo sa kasingkasing, kita nakasulod ug nag-alagad diha sa labing sagradong dapit—ang kahikayan sa putling pagsimba kang Jehova nga Diyos! Pabilhan nato kanunay ang maong pribilehiyo. Buhaton nato ang atong maarangan nga mabanaag ang pagkabalaan ni Jehova pinaagi sa pagsunod sa iyang matarong nga mga sukdanan!