ANG popular nga relihiyoso ug sekular nga mga pangilin nga gisaulog karon sa daghang bahin sa kalibotan wala magsukad sa Bibliya. Nan, diin man diay gikan ang maong mga selebrasyon? Kon ikaw makapanukiduki sa usa ka librarya, ikaw maikag sa pagkahibalo kon unsay giingon sa mga reperensiya bahin sa mga pangilin nga popular diha sa dapit nga imong gipuy-an. Tagda ang pipila ka pananglitan.

 Easter. “Walay timailhan sa Bag-ong Testamento bahin sa pagsaulog sa pangilin sa Easter,” nag-ingon ang The Encyclopædia Britannica. Sa unsang paagi nagsugod ang Easter? Nagsukad kini sa paganong pagsimba. Bisan pag giangkon nga ang maong pangilin naghandom sa pagkabanhaw ni Jesus, dili Kristohanon ang mga kostumbre nga nalangkit sa pangilin sa Easter. Pananglitan, mahitungod sa popular nga “Easter bunny,” ang The Catholic Encyclopedia nag-ingon: “Ang koneho maoy paganong simbolo ug kanunay nga simbolo sa pagkahinganak.”

Mga Selebrasyon sa Bag-ong Tuig. Ang petsa ug mga kostumbre nga nalangkit sa mga selebrasyon sa Bag-ong Tuig magkalahi diha sa nagkalainlaing nasod. Bahin sa sinugdanan sa maong selebrasyon, ang The World Book Encyclopedia nag-ingon: “Ang Romanong magmamando nga si Julio Cesar nagtino sa Enero ingong Adlaw sa Bag-ong Tuig sa 46 W.K.P. Kining adlawa gipahinungod sa mga Romano kang Janus, ang diyos sa mga ganghaan, mga pultahan, ug mga sinugdanan. Ang bulan sa Enero gingalan sumala kang Janus, nga duhag nawong—ang usa nagtan-aw sa unahan ug ang lain nagtan-aw sa luyo.” Busa ang mga selebrasyon sa Bag-ong Tuig nagsukad sa paganong mga tradisyon.

Adlaw sa Minatay. Ang The Encyclopedia Americana nag-ingon: “Ang pipila ka bahin sa mga kostumbreng nalangkit sa Adlaw sa Minatay masubay ngadto sa usa ka Druid [karaang Celtic nga kaparian] nga seremonyas sa una-Kristohanong kapanahonan. Ang mga Celt may mga pangilin alang sa duha ka dagkong mga diyos—ang diyos nga adlaw ug ang diyos sa mga patay . . . , kansang pangilin gihimo sa Nobyembre 1, ang sinugdanan sa Celtic nga Bag-ong Tuig. Ang pangilin sa mga patay inanayng naugmad nga Kristohanong rituwal.”

Ubang mga Pangilin. Dili mahisgotan ang tanang saulog nga gihimo sa tibuok kalibotan. Hinunoa, ang mga pangilin nga magabayaw sa mga tawo o tawhanong mga organisasyon wala uyoni ni Jehova. (Jeremias 17:5-7; Buhat 10:25, 26) Hinumdomi usab nga ang sinugdanan sa relihiyosong mga selebrasyon maoy magtino kon kana makapahimuot ba sa Diyos o dili. (Isaias 52:11; Pinadayag 18:4) Ang mga prinsipyo sa Bibliya nga gihisgotan sa Kapitulo 16 niining basahona makatabang kanimo sa pagtino kon unsay pag-isip sa Diyos sa pagpakigbahin sa dili-relihiyosong mga pangilin.