WALA kita tug-ani sa Bibliya kon kanus-a natawo si Jesus. Bisan pa niana, kini naghatag kanato ug lig-ong katarongan sa pagtuo nga wala siya matawo ug Disyembre.

Tagda ang klima nianang bulana didto sa Betlehem, diin natawo si Jesus. Ang Hudiyohanong bulan sa Chislev (nga motugbang sa Nobyembre/Disyembre) maoy tugnaw ug ting-ulan. Ang sunod nga bulan mao ang Tebeth (Disyembre/Enero). Ubos kaayo ang mga temperatura niining panahona sa tuig, nga may panagsang niyebe sa kabukiran. Tan-awon nato kon unsay gisulti sa Bibliya bahin sa klima nianang rehiyona.

Gipakita sa magsusulat sa Bibliya nga si Esdras nga ang Chislev usa gayod ka bulan nga nasayran nga matugnaw ug ting-ulan. Human sa pagpahayag nga ang usa ka panon sa katawhan nagkatigom sa Jerusalem “sa ikasiyam nga bulan [Chislev] sa ikakawhaang adlaw sa bulan,” si Esdras mitaho nga ang katawhan “nagkurog . . . tungod sa ulan.” Mahitungod sa klima sa maong panahon sa tuig, ang nagkatigom nga katawhan mismo miingon: “Ting-ulan karon, ug dili mahimo nga mobarog sa gawas.” (Esdras 10:9, 13; Jeremias 36:22) Dili katingad-an nga ang mga magbalantay sa karnero nga nagpuyo  sulod ug duol sa Jerusalem nagseguro nga sila ug ang ilang mga panon sa kahayopan wala sa gawas sa magabii sa pagka-Disyembre!

Hinunoa, gitaho sa Bibliya nga ang mga magbalantay sa karnero didto sa kapatagan nga nagbantay sa ilang mga panon sa gabii sa pagkatawo ni Jesus. Ngani, ang magsusulat sa Bibliya nga si Lucas nagpakita nga niadtong panahona, ang mga magbalantay “nagpuyo sa gawas ug nagpadayon sa pagbantay sa ilang mga panon sa kahayopan sa kagabhion” duol sa Jerusalem. (Lucas 2:8-12) Matikdi nga ang mga magbalantay sa karnero sa aktuwal nagpuyo sa gawas, wala lang maglakawlakaw sa gawas sa maadlaw. Gibutang nila ang ilang mga panon sa kahayopan diha sa kapatagan sa kagabhion. Ang maong kabatbatan bahin sa pagpuyo sa gawas mohaom ba sa tugnaw ug ulanon nga klima sa Betlehem pagka-Disyembre? Dili, dili gayod. Busa ang mga kahimtang may kalangkitan sa pagkatawo ni Jesus nagpaila nga wala siya matawo ug Disyembre. *

Ang Pulong sa Diyos nagatug-an kanato sa tukma kon kanus-a si Jesus namatay, apan naghatag lang ug diyutay nga detalye nga direktang magpaila kon kanus-a siya natawo. Kini magpahinumdom sa mga pulong ni Haring Solomon: “Ang usa ka ngalan mas maayo pa kay sa maayong lana, ug ang adlaw sa kamatayon kay sa adlaw nga natawhan.” (Ecclesiastes 7:1) Nan, dili katingad-an nga ang Bibliya naghatag ug daghang detalye bahin sa ministeryo ug kamatayon ni Jesus apan diyutay nga detalye bahin sa panahon sa iyang pagkatawo.