1, 2. Nganong gihigugma nimo si Jehova nga Diyos?

GIHIGUGMA ba nimo ang Diyos? Lagmit gihigugma gyod nimo siya maong nagpahinungod ka niya. Giisip nimo siya nga kinasuorang Higala. Pero sa wala pa nimo higugmaa si Jehova, gihigugma na ka niya. Ang Bibliya nag-ingon: “Kita nahigugma, kay siya ang unang nahigugma nato.”​—1 Juan 4:19.

² Hunahunaa kon giunsa pagpakita ni Jehova ang iyang gugma. Gihatag niya ang yuta ingong nindot nga puy-anan ug ang tanan natong gikinahanglan aron malipay ta. (Mateo 5:43-48; Pinadayag 4:11) Gusto niya nga masuod ta niya, ug naghimo siyag paagi aron makakat-on ta bahin niya. Dihang magbasa tag Bibliya, namati ta kang Jehova. Ug dihang moampo ta, mamati siya nato. (Salmo 65:2) Siya naggiya ug nagpalig-on nato pinaagi sa iyang gamhanang balaang espiritu. (Lucas 11:13) Gani iyang gipadala ang iyang pinalanggang Anak dinhi sa yuta aron mahigawas ta gikan sa sala ug kamatayon.​—Basaha ang Juan 3:16; Roma 5:8.

3. Sa unsang paagi makapabilin tang suod kang Jehova?

³ Hunahunaa kadiyot ang imong suod nga higala,  nga miunong nimo sa kalipay ug kasakit. Nagkinahanglag paningkamot aron magpabiling lig-on ang inyong panaghigalaay. Ingon niana sab ang atong panaghigalaay kang Jehova, ang atong kinasuorang Higala. Puwede ning magpabiling lig-on hangtod sa hangtod. Busa ang Bibliya nag-ingon: “[Magpabilin] mo sa gugma sa Diyos.” (Judas 21) Sa unsang paagi? Ang Bibliya nag-ingon: “Kini ang kahulogan sa paghigugma sa Diyos, nga atong tumanon ang iyang mga sugo; ug dili bug-at ang iyang mga sugo.”​—1 Juan 5:3.

4, 5. (a) Unsay gipasabot sa “paghigugma sa Diyos”? (b) Sa unsang paagi nagsugod ang imong gugma kang Jehova?

⁴ Unsay gipasabot sa giingon sa Bibliya nga “paghigugma sa Diyos”? Ang gitumong dinhi dili ang gugma sa Diyos kanato kondili ang atong gugma kaniya. Nahinumdom ba ka kon kanus-a nagsugod ang imong gugma kang Jehova?

⁵ Hinumdomi ang imong gibati dihang nakat-onan nimo nga gusto ni Jehova nga mabuhi ka sa walay kataposan sa iyang bag-ong kalibotan. Imong nakat-onan ang tanan niyang nahimo aron maposible kini, ug imong naamgohan nga bililhon kaayo ang gihatag ni Jehova kanato dihang gipadala niya ang iyang Anak dinhi sa yuta. (Mateo 20:28; Juan 8:29; Roma 5:12, 18) Dihang imong nakat-onan kon unsa ka dako ang gugma ni Jehova kanimo, natandog ka ug misugod sa paghigugma sab niya.​—Basaha ang 1 Juan 4:9, 10.

6. Unsay imong himoon kon gihigugma nimo ang usa ka tawo? Unsay imong gihimo tungod sa imong gugma sa Diyos?

⁶ Pero ang maong paghigugma sa Diyos sinugdanan  pa lang. Pananglitan, kon duna tay gihigugma, labaw pa ang atong himoon kay sa pag-ingon lang nga gihigugma nato siya. Tungod sa gugma, gusto natong magkinabuhi sa paagi nga makapalipay niya. Sa susama, ang imong gugma kang Jehova mipalihok nimo nga himoon kon unsay makapalipay niya. Dihang milalom ang maong gugma, lagmit nagpahinungod ka kaniya ug nagpabawtismo. Pinaagi niana, misaad ka nga alagaran si Jehova hangtod sa hangtod. (Basaha ang Roma 14:7, 8.) Unsaon nimo pagtuman ang maong saad?

7. Kon gihigugma nato si Jehova, unsay atong himoon? Unsa ang pipila niya ka sugo?

⁷ Kay gihigugma nato si Jehova, “atong tumanon ang iyang mga sugo.” Sa Bibliya, atong makat-onan kon unsay gusto ni Jehova nga atong paagi sa pagkinabuhi. Pananglitan, siya miingon nga sayop nga maghuboghubog, mangawat, mamakak, makigsekso sa dili kapikas, o mosimba kang bisan kinsa o sa bisan unsa gawas kaniya.​—1 Corinto 5:11; 6:18; 10:14; Efeso 4:28; Colosas 3:9.

8, 9. Unsaon nato pagkahibalo kon unsay gusto ni Jehova nga buhaton nato sa mga kahimtang nga walay espesipikong balaod sa Bibliya? Paghatag ug pananglitan.

⁸ Pero aron mapalipay si Jehova, dili lang pagsunod sa iyang mga sugo ang angay natong himoon. Wala ta niya hatagig listahan sa mga balaod alang sa tanang bahin sa atong kinabuhi. Busa may panahon nga walay espesipikong balaod ang Bibliya sa kon unsay angay natong buhaton. Unsaon nato paghimog maayong desisyon? (Efeso 5:17) Sa Bibliya dunay mga prinsipyo, pangunang mga kamatuoran nga magtudlo  nato sa panglantaw ni Jehova. Ug sa pagbasa nato sa Bibliya, mailhan nato ang iyang personalidad. Atong mahibaloan ang iyang panghunahuna ug kon unsay iyang gusto ug gidumtan.​—Basaha ang Salmo 97:10; Proverbio 6:16-19; tan-awa ang Endnote 1.

⁹ Pananglitan, unsaon nato pagdesisyon kon unsay tan-awon sa TV o Internet? Si Jehova walay espesipikong gisulti kon unsay angay natong buhaton. Apan naghatag siyag mga prinsipyo aron makahimo tag maayong mga desisyon. Daghan sa kalingawan karon bayolente ug bahin sa sekso. Sa Bibliya, si Jehova miingon nga “ginadumtan niya ang bisan kinsa nga nahigugma sa kapintasan” ug iyang ‘hukman ang mga naghimog seksuwal nga imoralidad.’ (Salmo 11:5; Hebreohanon 13:4) Sa unsang paagi makatabang nato kini nga mga prinsipyo sa paghimog maayong mga desisyon? Dihang mahibaloan nato nga ang usa ka butang gidumtan ni Jehova o giisip niyang imoral, angay nato kining likayan.

10, 11. Nganong tumanon nato si Jehova?

¹⁰ Nganong tumanon nato si Jehova? Dili tungod kay naglikay lang tag silot o problema nga resulta sa dili maayong mga desisyon. (Galacia 6:7) Tumanon nato si Jehova kay gihigugma nato siya. Sama nga gusto sa mga bata nga mapalipay ang ilang amahan, gusto sab natong mapalipay ang atong langitnong Amahan. Wala nay mas maayo pa kay sa pagkahibalo nga napalipay nato si Jehova!​—Salmo 5:12; Proverbio 12:2; tan-awa ang Endnote 2.

¹¹ Tumanon nato si Jehova dili lang dihang sayon ang paghimo niini o dihang wala na tay laing kapilian.  Ug dili ta mamili kon unsa nga balaod o sukdanan niya ang atong sundon. (Deuteronomio 12:32) Bug-os nato siyang tumanon, sama sa salmista kinsa miingon: “Nalipay ko sa imong kasugoan, oo, gihigugma nako kini.” (Salmo 119:47; Roma 6:17) Sundogon nato si Noe. Iyang gipakita ang iyang gugma kang Jehova pinaagi sa pagtuman sa tanang gisugo ni Jehova kaniya. Ang Bibliya nag-ingon nga “gisunod gayod niya kon unsay gisugo.” (Genesis 6:22) Gusto ba nimo nga isulti sab na ni Jehova bahin nimo?

12. Unsay atong himoon aron mapalipay si Jehova?

¹² Unsay pagbati ni Jehova dihang tumanon nato siya? Malipay ang iyang kasingkasing. (Proverbio 11:20; 27:11) Tiaw mo na! Mapalipay nato ang Maglalalang sa uniberso dihang tumanon nato siya. Pero dili ta niya pugson. Gihatagan ta niyag kagawasan sa pagpili kon husto o sayop ba ang atong himoon. Gusto ni Jehova nga ang atong gugma kaniya maoy mopalihok nato sa paghimog maayong desisyon aron kita magmalipayon.​—Deuteronomio 30:15, 16, 19, 20; tan-awa ang Endnote 3.

13, 14. Giunsa nato pagkahibalo nga ang mga sugo ni Jehova dili kaayo lisod tumanon? Iilustrar.

¹³ Komosta man kon naghunahuna ta nga ang mga sugo ni Jehova lisod kaayong tumanon o estrikto kaayo? Ang Bibliya tin-awng nag-ingon: “Dili bug-at ang iyang mga sugo.” (1 Juan 5:3) Ang Gregong pulong nga gihubad ug “bug-at” gigamit sa ubang teksto sa pagtumong sa dili makataronganong mga lagda o sa mga tawo nga gustong kontrolahon o pasakitan ang  uban. (Mateo 23:4; Buhat 20:29, 30) Busa ang mga sugo ni Jehova dili “bug-at,” sa ato pa, dili kaayo lisod tumanon. Siya kanunayng makataronganon sa iyang gipangayo kanato.

¹⁴ Pananglitan, mitabang ka sa imong higala nga mobalhin ug balay. Gisulod niya sa mga kahon ang tanan niyang gamit. Ang uban gaan ug sayon dad-on, pero ang uban bug-at kaayo nga kinahanglang alsahon ug duha ka tawo. Sugoon kaha ka sa imong higala nga ikaw ray alsa sa bug-at kaayong kahon? Dili gyod! Ngano? Kay dili siya gustong mapiang ka. Sama sa maong higala, dili gyod ta sugoon ni Jehova sa pagbuhat ug butang nga lisod kaayo. (Deuteronomio 30:11-14) Nakasabot si Jehova sa atong kahimtang. “Nahibalo siya pag-ayo sa atong pagkaumol, ug ginahinumdoman niya nga kita abog.”​—Salmo 103:14.

15. Nganong makaseguro ta nga ang mga sugo ni Jehova makahatag natog kaayohan?

¹⁵ Giingnan ni Moises ang nasod sa Israel nga ang mga sugo ni Jehova makahatag nilag “dumalayong kaayohan” ug ang ilang pagkamasinugtanon motabang nila nga ‘magpabiling buhi.’ (Deuteronomio 5:28-33; 6:24) Tinuod sab na karon. Bisan unsa nga ipabuhat ni Jehova kanato makahatag ug kaayohan. (Basaha ang Isaias 48:17.) Ang atong Amahan, si Jehova, nahibalo gayod kon unsay kinamaayohan para nato. (Roma 11:33) Ang Bibliya nag-ingon: “Ang Diyos gugma.” (1 Juan 4:8) Sa ato pa, ang tanang gisulti ug gibuhat ni Jehova maoy tungod sa gugma.

16. Nganong makaingon ta nga posible tang magmasinugtanon bisag dili hingpit ug nagkinabuhi sa daotang kalibotan?

¹⁶ Dili kanunayng sayon ang pagtuman sa Diyos.  Nagkinabuhi ta sa daotang kalibotan nga gimandoan sa Yawa. Naningkamot siyang impluwensiyahan ang mga tawo sa pagbuhat ug daotan. (1 Juan 5:19) Kinahanglan sab tang makig-away sa atong dili hingpit nga mga hunahuna ug pagbati, kay kini moimpluwensiya nato sa pagsupak sa Diyos. (Roma 7:21-25) Apan ang atong gugma kang Jehova mohatag natog determinasyon sa pagbuhat sa husto. Makita niya nga naningkamot tang motuman kaniya, ug tabangan ta niya pinaagi sa paghatag kanato sa iyang gamhanang balaang espiritu. (1 Samuel 15:22, 23; Buhat 5:32) Ang balaang espiritu motabang nato nga maugmad ang mga hiyas nga makapasayon sa pagtuman kaniya.​—Galacia 5:22, 23.

17, 18. (a) Unsay atong makat-onan niini nga libro? (b) Unsay hisgotan sa sunod kapitulo?

¹⁷ Niining libroha, makat-onan nato kon unsaon pagkinabuhi sa paagi nga makapalipay kang Jehova. Atong makat-onan kon unsaon pagpadapat ang iyang mga prinsipyo ug sukdanan sa moralidad. Hinumdomi nga dili ta pugson ni Jehova nga tumanon siya. Kon magmasinugtanon ta, moarang-arang ang atong kinabuhi ug duna tay nindot nga kaugmaon. Labaw sa tanan, ang atong pagkamasinugtanon magpakita kon unsa ka dako ang atong gugma sa Diyos.​—Tan-awa ang Endnote 4.

¹⁸ Aron matabangan ta nga mahibaloan kon unsay husto ug sayop, si Jehova naghatag natog konsensiya. Kon bansayon nato kini, makatabang ni nato sa ‘pagtuman sa iyang mga sugo.’ Busa, unsa ang konsensiya, ug unsaon kini pagbansay? Atong sayron.