1-3. (a) Unsay gibati sa daghang tawo bahin sa ilang trabaho? (b) Unsang mga pangutana ang tubagon niining kapituloha?

ANG mga tawo sa tibuok kalibotan naningkamot aron matagan-an ang ilang kaugalingon ug ang ilang pamilya. Daghan ang dili ganahan sa ilang trabaho, ug ang uban gani dili malipayng moadto sa ilang trabahoan kada adlaw. Kon mao nay imong gibati, unsay himoon nimo aron malipay ka ug ganahan sa imong trabaho?

² Si Jehova miingon: “Ang matag usa mokaon ug moinom ug malipay sa tanan niyang paghago. Kini ang gasa sa Diyos.” (Ecclesiastes 3:13) Gilalang ta ni Jehova nga may panginahanglan ug tinguha nga motrabaho. Gusto niya nga malipay ta sa atong ginahimo.​—Basaha ang Ecclesiastes 2:24; 5:18.

³ Busa unsay makatabang aron malipay ta sa atong trabaho? Unsa nga trabaho ang angayng likayan sa mga Kristohanon? Unsaon nato pagbalanse ang atong trabaho ug ang atong pagsimba kang Jehova? Ug unsa ang labing importanteng buluhaton nga atong mahimo?

4, 5. Unsay panglantaw ni Jehova sa trabaho?

⁴ Si Jehova ganahan kaayong motrabaho. Ang Genesis 1:1 nag-ingon: “Sa sinugdan gibuhat sa Diyos ang  langit ug ang yuta.” Human niya buhata ang yuta ug ang tanang butang niini, siya miingon nga ang iyang gilalang “maayo kaayo.” (Genesis 1:31) Ang atong Maglalalang nalipay sa iyang gibuhat.​—1 Timoteo 1:11.

⁵ Si Jehova kanunayng nagtrabaho. Si Jesus miingon: “Ang akong Amahan nagpadayon sa pagbuhat hangtod karon.” (Juan 5:17) Bisag wala ta mahibalo sa tanang makapahinganghang butang nga ginabuhat ni Jehova, nahibalo ta sa pipila niini. Siya padayong nagpili niadtong magmando uban sa iyang Anak, si Jesu-Kristo, ingong bahin sa Gingharian. (2 Corinto 5:17) Si Jehova aktibo sab nga naggiya ug nag-atiman sa mga tawo. Tungod sa buluhatong pagsangyaw sa tibuok kalibotan, minilyon ang nakaila kang Jehova ug may paglaom nga mabuhi hangtod sa hangtod sa paraisong yuta.​—Juan 6:44; Roma 6:23.

6, 7. Unsang klaseha sa magbubuhat si Jesus?

⁶ Sama sa iyang Amahan, si Jesus ganahan pod kaayong motrabaho. Sa wala pa siya moanhi sa yuta, siya ang “batid nga magbubuhat,” nga nagtabang sa Diyos sa paglalang sa tanang butang sa langit ug yuta. (Proverbio 8:22-31; Colosas 1:15-17) Sa dinhi siya sa yuta, si Jesus padayong nagkugi sa pagtrabaho. Sa batan-on pa, siya nahimong hanas nga panday, nga lagmit naghimog mga gamit ug mga balay. Hanas kaayo siya sa iyang trabaho maong nailhan siyang “panday.”​—Marcos 6:3.

⁷ Pero ang labing importanteng buluhaton ni Jesus sa yuta mao ang pagsangyaw sa maayong balita ug pagtudlo sa mga tawo bahin kang Jehova. Diha siyay tulo ka tuig ug tunga aron mahuman ang iyang ministeryo, maong nagkugi siya sayo sa buntag hangtod sa lawom nga kagabhion. (Lucas 21:37, 38; Juan 3:2) Si Jesus  nagbaktas ug ginatos ka kilometro sa abogon nga dalan, nga nagsangyaw sa maayong balita ngadto sa daghang tawo kutob sa mahimo.​—Lucas 8:1.

8, 9. Nganong nalipay si Jesus sa iyang buluhaton?

⁸ Para kang Jesus, ang pagbuhat sa buluhaton sa Diyos samag pagkaon. Kini nakahatag niyag kusog ug kalig-on. Dihay mga panahon nga nagkugi siya pag-ayo maong wala na siyay panahong mokaon. (Juan 4:31-38) Gigamit niya ang matag kahigayonan nga tabangan ang uban nga makakat-on bahin sa iyang Amahan. Kanay rason nga nakasulti siya kang Jehova: “Natapos nako ang buluhaton nga imong gihatag kanako, busa ikaw akong nahimaya dinhi sa yuta.”​—Juan 17:4.

⁹ Klaro nga si Jehova ug si Jesus kugihan kaayo ug mibatig kalipay ug katagbawan sa ilang buluhaton. Gusto natong ‘sundogon ang Diyos’ ug ‘sundon pag-ayo ang mga tunob’ ni Jesus. (Efeso 5:1; 1 Pedro 2:21) Kanay rason nga magkugi ta ug maningkamot nga buhaton ang atong maarangan sa tanan natong himoon.

10, 11. Unsay makatabang aron magmapositibo ta sa atong trabaho?

¹⁰ Ingong katawhan ni Jehova, naningkamot ta aron matagan-an ang atong kaugalingon ug ang atong pamilya. Gusto natong malipay sa atong trabaho, pero dili kini kanunayng sayon. Busa unsay atong himoon kon dili ta ganahan sa atong trabaho?

¹¹ Magmapositibo. Mahimong dili nato mausab kon asa ta nagtrabaho o kon unsa ka daghan ang atong trabaho, pero mausab nato ang atong panglantaw. Makatabang kon masabtan nato ang gidahom ni Jehova  kanato. Pananglitan: Gidahom ni Jehova nga ang ulo sa pamilya magtagana sa panginahanglan sa iyang pamilya kutob sa iyang maarangan. Gani, ang Bibliya nag-ingon nga kadtong dili magtagana para sa iyang pamilya “mas daotan pa kay sa tawong walay pagtuo.” (1 Timoteo 5:8) Kon ulo ka sa pamilya, maningkamot kang matagan-an ang imong pamilya. Gusto man nimo o dili ang imong trabaho, nahibalo ka nga ang paghimo niini nakapalipay kang Jehova.

12. Unsay mga kaayohan kon kugihan ug matinud-anon ka?

¹² Kinahanglang kugihan ug matinud-anon ka. Makatabang ni nga malipay ka sa imong trabaho. (Proverbio 12:24; 22:29) Saligan ka sa imong amo. Importante sa mga amo ang matinud-anong mga empleyado kay dili sila mangawat ug kuwarta, butang, o panahon. (Efeso 4:28) Labaw sa tanan, kon kugihan ug matinud-anon ka, nahibalo si Jehova niini. “Hinlo ang [imong] konsensiya” kay nahibalo ka nga nakapalipay ka sa Diyos nga imong gihigugma.​—Hebreohanon 13:18; Colosas 3:22-24.

13. Unsa pay resulta kon matinud-anon ta sa trabahoan?

¹³ Hinumdomi nga ang imong panggawi sa trabahoan makadayeg kang Jehova. Lain kining rason nga malipay ta sa atong trabaho. (Tito 2:9, 10) Posible pa gani nga mainteres ang imong katrabaho nga magtuon sa Bibliya tungod sa imong maayong panggawi.​—Basaha ang Proverbio 27:11; 1 Pedro 2:12.

14-16. Unsay angay natong hunahunaon dihang magpilig trabaho?

¹⁴ Ang Bibliya wala maghatag ug listahan sa mga trabaho nga angayng dawaton o dili sa usa ka Kristohanon. Pero duna kiniy mga prinsipyo nga makatabang  aron makahimo tag maayong mga desisyon. (Proverbio 2:6) Base sa mga prinsipyo sa Bibliya, mahimong pangutan-on nato ang atong kaugalingon sa mosunod nga mga pangutana.

¹⁵ Kini bang trabahoa magpresyur nako nga mohimog butang nga sayop sa panglantaw ni Jehova? Nakat-onan nato ang mga buhat nga gidumtan ni Jehova, sama sa pagpangawat ug pagpamakak. (Exodo 20:4; Buhat 15:29; Efeso 4:28; Pinadayag 21:8) Busa likayi ang bisan unsang trabaho nga supak sa mga sukdanan ni Jehova.​—Basaha ang 1 Juan 5:3.

 ¹⁶ Kini bang trabahoa nagsuportar o nagpasiugda ug buhat nga gisaway ni Jehova? Pananglitan, unsa man kon gitanyagan ka nga motrabaho sa tindahan sa sigarilyo? Dili sayop ang pagpaninda. Pero nahibalo ka sa panglantaw ni Jehova sa pagpanigarilyo. Busa bisag dili ka manigarilyo, dili ba nimo bation nga mora ra pod ug nagdasig ka sa uban nga mahimong ‘hugaw sa unod’?​—2 Corinto 7:1.

17. Unsay makatabang nato sa paghimog mga desisyon nga makapalipay sa Diyos?

¹⁷ Pinaagi sa paggamit sa mga prinsipyo sa Bibliya, mahisama ta sa mga tawong gihisgotan sa Hebreohanon 5:14, ‘kinsa pinaagi sa paggamit sa ilang mga katakos sa panghunahuna, nahibalo kon unsaon pag-ila ang maayo ug ang daotan.’ Hunahunaa kini: ‘Kon dawaton nako ning trabahoa, mapandol ba ang uban? Mabiyaan ba nako ang akong kapikas ug mga anak aron moadto sa laing nasod? Unsa unyay epekto niini kanila?’

18. Nganong dili kanunayng sayon ang pagpokus sa atong pagsimba?

¹⁸ Dili kanunayng sayon ang pag-una sa atong pagsimba kang Jehova niining “kuyaw nga mga panahong lisod sagubangon.” (2 Timoteo 3:1) Lisod ang pagpangitag trabaho ug pagpaningkamot nga dili mawad-ag trabaho. Kinahanglan natong tagan-an ang atong pamilya, pero nahibalo ta nga angayng unahon ang atong pagsimba. Dili nato tugotan nga mahimong mas importante kanato ang materyal nga mga butang. (1 Timoteo 6:9, 10) Busa unsaon nato ‘pagseguro ang mas importanteng mga butang’ ug matagan-an sab ang atong pamilya?​—Filipos 1:10.

19. Sa unsang paagi makatabang nato ang pagsalig kang Jehova aron balanse ta sa atong trabaho?

 ¹⁹ Salig kang Jehova sa bug-os. (Basaha ang Proverbio 3:5, 6.) Nasayod ta nga ang Diyos nahibalo gyod kon unsay atong gikinahanglan ug gimahal ta niya pag-ayo. (Salmo 37:25; 1 Pedro 5:7) Ang iyang Pulong nag-ingon: “Ayaw ninyog higugmaa ang kuwarta, hinuon magmakontento mo kon unsay naa ninyo. Kay [ang Diyos] nag-ingon: ‘Dili gyod ka nako biyaan, ug dili gyod ka nako talikdan.’” (Hebreohanon 13:5) Dili gusto ni Jehova nga kanunay tang mabalaka sa pagtagana para sa atong pamilya. Kadaghan niyang gipakita nga makatagana siya para sa iyang katawhan. (Mateo 6:25-32) Bisag unsa pay kahimtang sa atong trabaho, kanunay tang magtuon sa Pulong sa Diyos, mosangyaw sa maayong balita, ug motambong sa Kristohanong mga tigom.​—Mateo 24:14; Hebreohanon 10:24, 25.

20. Unsay himoon aron magpabiling simple ang atong kinabuhi?

²⁰ Ipokus kanunay ang imong mata. (Basaha ang Mateo 6:22, 23.) Nagpasabot ni nga kinahanglang simple ang imong kinabuhi aron makapokus ka sa pag-alagad kang Jehova. Nahibalo ta nga dili maalamon kon himoon natong mas importante ang kuwarta, hayahay nga kinabuhi, o kinabag-ohang mga gadyet kay sa atong pagpakighigala sa Diyos. Busa unsay makatabang nato nga unahon ang mga butang nga angayng unahon? Maningkamot ta nga dili mangutang. Kon nakautang na ka, paningkamoti nga mogamaygamay ni o mabayran. Kon dili ta magbantay, basig mahurot sa materyal nga mga butang ang atong panahon ug kusog, ug dili na ta makagahin ug panahon sa pag-ampo, pagtuon, o pagsangyaw. Imbes tugotan nato nga mahimong komplikado  ang atong kinabuhi tungod sa materyal nga mga butang, magmakontento ta sa pangunang mga panginahanglan sama sa pagkaon ug sinina. (1 Timoteo 6:8) Ug bisag unsay atong kahimtang, maayong susihon nato matag karon ug unya kon duna pa ba tay mahimo sa pag-alagad kang Jehova sa mas bug-os pa.

21. Nganong angay tang modesisyon kon unsay unahon sa atong kinabuhi?

²¹ Kinahanglang husto ang atong mga prayoridad. Kinahanglang maalamon natong gamiton ang atong panahon, kusog, ug materyal nga mga butang. Kon  dili ta mag-amping, ang dili kaayo importanteng mga butang, sama sa edukasyon o kuwarta, makahurot sa atong bililhong panahon. Si Jesus miingon: “Unaha kanunay ang pagpangita sa Gingharian.” (Mateo 6:33) Ang atong mga desisyon, nabatasan, ginahimo adlaw-adlaw, ug mga tumong magpakita kon unsay numero uno sa atong kasingkasing.

22, 23. (a) Unsa ang labing importanteng buluhaton nato ingong mga Kristohanon? (b) Unsay makatabang nato nga malipay sa atong trabaho?

²² Ang atong labing importanteng buluhaton mao ang pag-alagad kang Jehova ug pagsangyaw sa maayong balita. (Mateo 24:14; 28:19, 20) Sama kang Jesus, himoon nato ang atong maarangan niini nga buluhaton. Ang uban mibalhin sa mga lugar nga may dakong panginahanglan sa mga magwawali. Ang uban nagkat-on ug laing pinulongan aron makasangyaw niadtong nagsulti sa maong pinulongan. Pangutan-a kadtong nakahimo na niini. Sultihan ka nila nga sila nahimong mas malipayon ug mas tagbaw.​—Basaha ang Proverbio 10:22.

²³ Karon, mogahin tag taas nga panahon sa trabahoan o mangitag ekstrang trabaho aron lang matagan-an ang pangunang panginahanglan sa atong pamilya. Nahibalo niini si Jehova, ug giapresyar niya ang tanan natong ginahimo. Busa padayon natong sundogon si Jehova ug si Jesus pinaagi sa atong pagkugi bisag unsa pay atong trabaho. Ug hinaot hinumdoman nato nga ang labing importanteng buluhaton mao ang pag-alagad kang Jehova ug pagsangyaw sa maayong balita sa Gingharian sa Diyos. Makahatag nig tinuod nga kalipay.