1-3. (a) Nganong seguroon sa inahan nga hinlo ang iyang anak? (b) Nganong gusto ni Jehova nga hinlo ang iyang katawhan?

HUNAHUNAA ang usa ka mahigugmaong inahan nga nag-andam sa iyang anak nga moeskuwela. Seguroon niya nga nakaligo ang iyang anak ug hinlo ug hapsay ang sinina niini. Makatabang ni nga dili masakit ang iyang anak ug makita sa uban nga giatiman siya sa iyang ginikanan.

² Ang atong Amahan, si Jehova, gusto nga kita hinlo ug putli. (Salmo 18:26) Nahibalo siya nga ang pagkahinlo  makaayo nato. Ug kon hinlo ta, mapasidunggan nato siya.​—Ezequiel 36:22; basaha ang 1 Pedro 2:12.

³ Unsay ipasabot sa pagkahinlo? Ug nganong makaayo ni kanato? Samtang tubagon nato kini, basig naa tay makita nga angay natong usbon.

4, 5. (a) Nganong angay tang mahimong hinlo? (b) Unsay atong makat-onan sa kalalangan bahin sa pag-isip ni Jehova sa kahinlo?

⁴ Ang panig-ingnan ni Jehova nagtudlo nato nga kita kinahanglang hinlo ug putli. (Levitico 11:44, 45) Busa ang pangunang rason nga angay tang mahimong hinlo mao nga gusto natong ‘sundogon ang Diyos.’​—Efeso 5:1.

⁵ Daghan tag makat-onan sa kalalangan bahin sa pag-isip ni Jehova sa kahinlo. Si Jehova nagbuhat ug mga siklo sa kinaiyahan aron magpabiling hinlo ang hangin ug tubig. (Jeremias 10:12) Hunahunaa ang daghang paagi nga ang yuta mahinloan rag iya, bisan pag gihugawan kini sa tawo. Pananglitan, si Jehova naghimo ug gagmitoyng mga mikrobyo, nga makita lang sa mikroskopyo. Iproseso sa mga mikrobyo ang makahilo nga mga hugaw aron dili na kini makadaot. Kuyaw kaayo ni nga proseso. Bisan gani ang mga siyentista naggamit ug pipila sa maong mga mikrobyo aron hinloan ang polusyon.​—Roma 1:20.

6, 7. Giunsa pagpakita sa Balaod ni Moises nga ang mga magsisimba ni Jehova kinahanglang hinlo?

⁶ Makita sab nato kon unsa ka importante ang kahinlo diha sa Balaod nga gihatag ni Jehova sa Israel pinaagi kang Moises. Pananglitan, ang katawhan kinahanglang hinlo sa pisikal aron ang ilang pagsimba dawaton  ni Jehova. Sa Adlaw sa Pagtabon sa Sala, kinahanglang kaduha maligo ang hataas nga saserdote. (Levitico 16:4, 23, 24) Ug sa dili pa maghalad ang ubang saserdote, kinahanglan silang manghunaw ug manghimasa. (Exodo 30:17-21; 2 Cronicas 4:6) Sa ubang situwasyon, kamatayon ang silot kon lapason ang mga balaod sa kahinlo.​—Levitico 15:31; Numeros 19:17-20.

⁷ Komosta karon? Daghan tag makat-onan bahin sa mga sukdanan ni Jehova diha sa Balaod. (Malaquias 3:6) Gipakita niini nga kinahanglang hinlo ang iyang mga magsisimba. Wala mausab ang iyang sukdanan. Karon, gidahom gihapon niya nga ang iyang mga magsisimba hinlo ug putli.​—Santiago 1:27.

8. Unsay ipasabot sa pagkahimong hinlo?

⁸ Sa panglantaw ni Jehova, ang pagkahimong hinlo dili lang kay hinlo sa lawas, sinina, ug balay. Kini naglakip sa tibuok natong kinabuhi. Apil niini ang atong pagsimba, panggawi, ug hunahuna. Oo, aron hinlo ta sa panglantaw ni Jehova, kinahanglang hinlo ta ug putli sa tanang bahin sa atong kinabuhi.

9, 10. Unsay ipasabot sa pagkahimong hinlo diha sa atong pagsimba?

⁹ Putli nga pagsimba. Dili ta makigbahin sa bakak nga pagsimba sa bisan unsang paagi. Dihang ang mga Israelinhon binihag pa didto sa Babilonya, gilibotan silag mga tawo nga sakop sa imoral ug pagano nga relihiyon. Gitagna ni Isaias nga mobalik sila sa Israel ug tukoron pag-usab ang putli nga pagsimba. Giingnan sila ni Jehova: “Gula dinha, ayawg hikap ug bisan unsang hugaw! Gula sa iyang taliwala, pagpabilin mong hinlo.”  Ang ilang pagsimba dili angayng sagolan sa mga pagtulon-an, batasan, o kostumbre sa bakak nga relihiyon sa Babilonya.​—Isaias 52:11.

¹⁰ Ang matuod nga mga Kristohanon karon naglikay sab sa bakak nga relihiyon. (Basaha ang 1 Corinto 10:21.) Sa tibuok kalibotan, daghang iladong mga tradisyon, kostumbre, ug tinuohan ang gikan sa mga pagtulon-an sa bakak nga relihiyon. Pananglitan, sa daghang kultura, ang mga tawo nagtuo nga inigkamatay nato naay bahin nato nga magpabiling buhi, ug daghang kostumbre ang gibase niini nga pagtulon-an. (Ecclesiastes 9:5, 6, 10) Kinahanglang likayan sa mga Kristohanon ang maong mga kostumbre. Basig pugson ta sa atong pamilya nga moapil niini. Pero kay gusto nato nga isipong hinlo ni Jehova, dili ta magpadala nila.​—Buhat 5:29.

11. Unsay ipasabot sa pagkahimong hinlo diha sa atong panggawi?

¹¹ Putli nga panggawi. Aron isipon tang putli ni Jehova, angay natong likayan ang tanang matang sa seksuwal nga imoralidad. (Basaha ang Efeso 5:5.) Sa Bibliya, giingnan ta ni Jehova nga ‘mokalagiw gikan sa seksuwal nga imoralidad.’ Klaro niyang gisulti nga kadtong imoral ug dili maghinulsol “dili makapanunod sa Gingharian sa Diyos.”​—1 Corinto 6:9, 10, 18; tan-awa ang Endnote 22.

12, 13. Nganong kinahanglang hinlo ang atong hunahuna?

¹² Putli nga hunahuna. Sagad ang atong gihunahuna maoy atong buhaton. (Mateo 5:28; 15:18, 19) Kon putli ang atong hunahuna, putli sab ang atong panggawi. Siyempre dili ta hingpit, busa matag karon ug unya makahunahuna tag dili maayo. Kon mahitabo  na, ato dayon kining wad-on. Kay kon dili, sa kadugayan mahimo nang dili putli ang atong kasingkasing. Tingali gusto na natong himoon ang kanunay natong gihunahuna. Tungod niana, kinahanglang pun-on nato ang atong hunahuna ug putli nga mga butang. (Basaha ang Filipos 4:8.) Busa likayan nato ang imoral o bayolenteng kalingawan. Mag-amping ta sa pagpili kon unsay basahon, tan-awon, ug hisgotan.​—Salmo 19:8, 9.

¹³ Aron magpabilin sa gugma sa Diyos, kinahanglang putli ang atong pagsimba, panggawi, ug hunahuna. Pero importante sab kang Jehova nga hinlo ta sa pisikal.

14. Nganong importante nga hinlo ta sa pisikal?

¹⁴ Kon kanunayng hinlo ang atong lawas ug palibot, makahatag nig kaayohan kanato ug sa uban. Maayo ang atong bation, ug ganahan ang uban nga makig-uban nato. Pero dunay mas importanteng rason kon nganong angayng hinlo ta sa pisikal. Makapasidungog ni kang Jehova. Hunahunaa kini: Kon makakita kag bata nga kanunayng bulingit, dili maayo ang imong panglantaw sa iyang ginikanan. Sa susama, kon hugaw ta ug dili mangareglar, mapasipalahan si Jehova. Si Pablo miingon: “Wala gyod mi maghatag ug bisan unsang hinungdan sa pagkapandol, aron dili makitaag sayop ang among ministeryo; apan sa tanang paagi ginarekomendar namo ang among kaugalingon ingong mga ministro sa Diyos.”​—2 Corinto 6:3, 4.

15, 16. Unsay himoon aron kanunay tang hinlo?

¹⁵ Atong lawas ug sinina. Batasanon nato nga hinlo  ta kada adlaw. Pananglitan, kanunay tang maligo, kada adlaw kon posible. Manghunaw ta gamit ang sabon ug tubig ilabina sa dili pa magluto o mokaon ug, labaw na gyod, human mogamit sa kasilyas o mohikap ug hugaw. Morag simple rang butang ang paghunaw, pero kinahanglan ni aron dili mapasapasa ang bakterya ug sakit. Makaluwas nig kinabuhi. Kon walay kasilyas o awasanan sa hugaw (sewage system), naa gihapoy maayong paagi nga mahipos ang hugaw. Ang mga Israelinhon walay kasilyas, maong ilubong nila sa yuta ang ilang hugaw, nga layo sa mga balay ug tuboran sa tubig.​—Deuteronomio 23:12, 13.

¹⁶ Ang atong sinina dili kinahanglang luho, mahalon, o kinabag-ohan. Pero kinahanglan nga hapsay ug hinlo kini. (Basaha ang 1 Timoteo 2:9, 10.) Gusto  nato nga ang atong hitsura kanunayng magpasidungog kang Jehova.​—Tito 2:10.

17. Nganong maningkamot ta nga kanunayng hinlo ang atong balay ug palibot?

¹⁷ Atong balay ug palibot. Bisan asa ta nagpuyo, kinahanglang limpiyo kanunay ang atong balay. Seguroon sab nato nga hinlo ang atong sakyanan, motor, o bisikleta, ilabina kon gamiton ni padulong sa tigom o sa pagsangyaw. Kon buot hunahunaon, dihang nagsangyaw ta, nakigsulti ta sa uban bahin sa kinabuhi diha sa hinlo nga paraisong yuta. (Lucas 23:43; Pinadayag 11:18) Ang hitsura sa atong balay ug palibot magpakita nga nangandam na ta karon sa kinabuhi nianang hinlo nga bag-ong kalibotan.

18. Nganong mentinahon nato ang kahinlo sa atong dapit sa pagsimba?

¹⁸ Atong dapit sa pagsimba. Gipakita nato nga importante ang kahinlo pinaagi sa pagmentinar sa kahinlo sa atong tigomanan, sa Kingdom Hall man o sa asembliyahanan. Kon dunay motambong sa unang higayon sa Kingdom Hall, sagad mamatikdan niya ang kahinlo. Kini makapasidungog kang Jehova. Ingong membro sa kongregasyon, duna tay kahigayonan nga motabang sa paghinlo sa atong Kingdom Hall ug sa pagmentinar niini.​—2 Cronicas 34:10.

19. Unsay angay natong likayan?

¹⁹ Bisag wala nganli sa Bibliya ang tanang bisyo nga angay natong likayan, kini dunay mga prinsipyo nga makatabang nato nga masabtan ang pagbati ni Jehova niini. Dili siya gustong manigarilyo ta o maghuboghubog o magdroga. Kon higala ta sa Diyos, likayan nato kini. Ngano? Kay gitahod nato pag-ayo ang kinabuhi.  Ang maong mga bisyo makapamubo sa atong kinabuhi ug makadaot nato ug sa uban. Daghan ang naningkamot nga hunongon kini tungod sa ilang panglawas. Pero, ingong higala ni Jehova, duna tay maayo kaayong rason nga hunongon kini​—ang atong gugma sa Diyos. Usa ka batan-ong babaye miingon: “Sa tabang ni Jehova, gihinloan nako ang akong kinabuhi ug gihunong ang akong pagkaadik. . . . Dili gyod nako ni mahimo sa kaugalingon nakong paningkamot.” Hisgotan nato ang lima ka prinsipyo sa Bibliya nga makatabang sa paghunong sa makadaot nga mga bisyo.

20, 21. Unsang mga bisyo ang gusto ni Jehova nga atong likayan o hunongon?

²⁰ “Kay nabatonan man nato kini nga mga saad, hinloan nato ang atong kaugalingon sa tanang kahugawan sa unod ug espiritu, aron mahimo tang mas balaan samtang nahadlok ta sa Diyos.” (2 Corinto 7:1) Gusto ni Jehova nga likayan o hunongon nato ang hugawng mga bisyo nga makadaot sa atong hunahuna o lawas.

²¹ Ang usa ka importanteng rason nga “hinloan nato ang atong kaugalingon sa tanang kahugawan” mabasa nato sa 2 Corinto 6:17, 18. Giingnan ta ni Jehova: “Hunong na sa paghikap sa hugawng butang.” Unya siya misaad: “Pasudlon mo nako. Ug ako mahimong inyong amahan, ug kamo mahimong akong mga anak.” Oo, higugmaon ta ni Jehova sama sa paghigugma sa amahan sa iyang mga anak kon likayan nato ang bisan unsang makapahugaw nato sa iyang atubangan.

22-25. Unsang mga prinsipyo sa Kasulatan ang makatabang nato sa paglikay sa hugawng mga bisyo?

²² “Higugmaa si Jehova nga imong Diyos sa tibuok  mong kasingkasing, sa tibuok mong kalag, ug sa tibuok mong hunahuna.” (Mateo 22:37) Kini ang labing importanteng sugo. (Mateo 22:38) Si Jehova takos sa atong bug-os nga gugma. Unsaon nato siya paghigugma sa bug-os kon duna tay buhaton nga makapamubo sa atong kinabuhi o makadaot sa atong utok? Busa buhaton nato ang tanan aron ipakita nga gitahod nato ang kinabuhi nga iyang gihatag.

²³ “[Si Jehova] ang naghatag sa tanang tawo ug kinabuhi ug gininhawa ug tanang butang.” (Buhat 17:24, 25) Kon hatagan kag espesyal nga regalo sa imong higala, imo ba ning ilabay? Ang kinabuhi maoy talagsaong regalo gikan kang Jehova. Pabilhan gyod nato ni. Busa gamiton nato ang atong kinabuhi sa paagi nga makahimaya kaniya.​—Salmo 36:9.

²⁴ “Higugmaa ang imong isigkatawo sama sa imong kaugalingon.” (Mateo 22:39) Dili lang kita ang madaot sa hugawng mga bisyo, hasta pod ang mga tawo sa atong palibot, kinsa sagad mga gihigugma nato. Pananglitan, ang nagpuyo uban sa hinigarilyo mahimong mag-antos ug grabeng sakit tungod lang sa aso sa sigarilyo. Apan kon hunongon nato ang daotang mga bisyo, gipakita nato sa mga tawo sa atong palibot nga gihigugma nato sila.​—1 Juan 4:20, 21.

²⁵ “Padayon silang pahinumdomi nga magpasakop ug magmasinugtanon sa mga gobyerno ug mga awtoridad.” (Tito 3:1) Sa daghang nasod, duna silay balaod nga nagdili sa paghupot o paggamit sa pipila ka droga. Tungod kay gisugo ta ni Jehova sa pagtahod sa gobyerno, sundon nato ang maong mga balaod.​—Roma 13:1.

26. (a) Unsay atong himoon aron dawaton ni Jehova ang atong pagsimba? (b) Nganong ang pagpabiling hinlo sa atubangan sa Diyos mao ang kinamaayohang paagi sa pagkinabuhi?

 ²⁶ Kon gusto natong mahimong higala ni Jehova, kinahanglan tingali tang mohimog kausaban. Kon mao, sugdan dayon nato kini. Dili kanunayng sayon ang paghunong sa hugawng bisyo, pero mahimo nato kini! Si Jehova nagsaad nga tabangan ta niya. Siya miingon: “Ako, si Jehova, ang imong Diyos, ang Usa nga nagtudlo kanimo aron makabaton kag kaayohan, ang Usa nga naggiya kanimo sa dalan nga angay nimong laktan.” (Isaias 48:17) Kon himoon nato ang atong maarangan nga magpabiling hinlo ug putli, makaseguro ta nga kita nagpasidungog sa atong Diyos.