1-3. (a) Unsay atong makat-onan sa Proverbio 13:20? (b) Nganong kinahanglan natong pilion ang atong mga higala?

NAKAMATIKOD na ba kag bata nga nagtan-aw sa iyang ginikanan? Bisag dili pa siya makasulti, matuhop sa iyang hunahuna ang tanan niyang makita ug madungog. Sa magkadako siya, masundog na niya ang iyang ginikanan. Dili ikatingala nga masundog sab sa mga hamtong ang mga hunahuna o lihok sa mga tawo nga pirme nilang makauban.

² Ang Proverbio 13:20 nag-ingon: “Ang naglakaw uban sa mga maalamon mahimong maalamon.” Dinhi ang ideya sa “naglakaw uban” sa usa ka tawo naglakip sa paggahin ug panahon uban niya. Wala kini magpasabot nga basta lang nakig-uban. Usa ka eskolar sa Bibliya nag-ingon nga ang paglakaw uban sa usa ka tawo naglakip sa ideya sa pagmahal sa maong tawo ug sa pagbati nga suod kaniya. Dakog impluwensiya nato kadtong kanunay natong kauban, ilabina kadtong suod nato.

³ Ang atong mga higala dunay maayo o daotang epekto kanato. Ang Proverbio 13:20 nagpadayon: “Ang makig-uban sa mga buangbuang masugamak sa  kadaot.” Sa Hebreohanong pinulongan, ang ‘pagpakig-uban’ mahimong magkahulogan usab ug pagpakighigala. (Proverbio 22:24) Ang mga higala nga nahigugma sa Diyos modasig nato nga magmatinumanon kaniya. Aron matabangan ta sa pagpilig maayong mga higala, hisgotan nato kon kinsay pilion ni Jehova nga iyang mga higala.

4. Nganong dakong kadungganan nga mahimong higala sa Diyos? Nganong gitawag ni Jehova si Abraham nga “akong higala”?

⁴ Si Jehova, ang Soberano sa Uniberso, naghatag natog kahigayonan nga mahimong iyang higala. Dako kini nga kadungganan. Pilion pag-ayo ni Jehova ang iyang mga higala. Iyang pilion kadtong nahigugma ug may pagtuo kaniya. Usa ka pananglitan mao si Abraham. Andam siyang mobuhat sa bisan unsa alang sa Diyos. Sa daghang higayon, gipakita niya nga siya matinumanon ug masinugtanon. Andam pa gani niyang isakripisyo ang iyang anak nga si Isaac. Siya may pagtuo nga “ang Diyos makahimo sa pagbanhaw sa iyang anak.” (Hebreohanon 11:17-19; Genesis 22:1, 2, 9-13) Si Abraham matinumanon ug masinugtanon, ug gitawag siya ni Jehova nga “akong higala.”​—Isaias 41:8; Santiago 2:21-23.

5. Unsay pagbati ni Jehova niadtong maunongon kaniya?

⁵ Bililhon kang Jehova ang iyang mga higala. Para sa iyang mga higala, mas importante ang pagkamaunongon kaniya kay sa bisan unsang butang. (Basaha ang 2 Samuel 22:26.) Sila maunongon ug masinugtanon kay ilang gihigugma siya. Ang Bibliya nag-ingon nga ang Diyos ‘makigsuod sa matul-id,’ kadtong mosunod  kaniya. (Proverbio 3:32) Gidapit ni Jehova ang iyang mga higala nga mahimong espesyal nga dinapit sa iyang “tolda.” Gidapit niya sila nga mosimba ug moampo kaniya sa bisan unsang panahon.​—Salmo 15:1-5.

6. Unsaon nato pagpakita nga gihigugma nato si Jesus?

⁶ Si Jesus miingon: “Kon ang usa nahigugma kanako, sundon niya ang akong pulong ug higugmaon siya sa akong Amahan.” (Juan 14:23) Busa aron mahimong higala ni Jehova, kinahanglan sab natong higugmaon si Jesus ug sundon ang iyang mga sugo. Pananglitan, sundon nato ang sugo ni Jesus nga isangyaw ang maayong balita ug maghimog mga tinun-an. (Mateo 28:19, 20; Juan 14:15, 21) Kay gihigugma nato si Jesus, atong ‘sundon pag-ayo ang iyang mga tunob.’ (1 Pedro 2:21) Malipay si Jehova nga makita nga naningkamot ta sa pagsundog sa iyang Anak diha sa atong sinultihan ug binuhatan.

7. Nganong angay natong segurohon nga mga higala sab ni Jehova ang atong mga higala?

⁷ Ang mga higala ni Jehova matinumanon, maunongon, ug masinugtanon, ug ilang gihigugma ang iyang Anak. Ingon niana ba sab ang atong mga higala? Kon ang imong mga higala nagsundog kang Jesus ug puliki sa pagtudlo sa uban bahin sa Gingharian sa Diyos, makatabang sila nimo nga mahimong mas maayong tawo ug magpabiling maunongon kang Jehova.

8. Unsay imong ganahan sa panaghigalaay ni Ruth ug Noemi?

⁸ Sa Bibliya, daghan tag mabasa nga panaghigalaay, sama nianang kang Ruth ug sa iyang ugangan nga  si Noemi. Lainlain silag kagikan, ug si Noemi mas magulang kang Ruth. Pero nahimo silang suod nga managhigala kay gihigugma nila si Jehova. Dihang si Noemi gusto nang mobiya sa Moab ug mobalik sa Israel, si Ruth miuban kaniya. Iyang giingnan si Noemi: “Ang imong katawhan mahimong akong katawhan, ug ang imong Diyos akong Diyos.” (Ruth 1:14, 16) Maayo kaayo si Ruth kang Noemi. Pag-abot nila sa Israel, si Ruth naningkamot aron matabangan ang iyang higala. Gimahal pag-ayo ni Noemi si Ruth ug iya siyang ginatambagan. Si Ruth namati kaniya, ug tungod niana, sila nakadawat ug daghang panalangin.​—Ruth 3:6.

9. Unsay imong ganahan sa panaghigalaay ni David ug Jonatan?

⁹ Si David ug Jonatan suod sab nga managhigala ug maunongon kang Jehova. Si Jonatan mga 30 ka tuig nga mas magulang kang David ug maoy sunod nga mahimong hari sa Israel. (1 Samuel 17:33; 31:2; 2 Samuel 5:4) Pero pagkahibalo niya nga si David ang gipili ni Jehova nga mahimong hari, wala siya masina o makigkompetensiya. Hinuon, gibuhat niya ang tanan aron suportahan si David. Pananglitan, dihang nameligro si David, gipalig-on ni Jonatan “ang pagsalig ni David kang Jehova.” Gipameligro pa gani niya ang iyang kinabuhi para kang David. (1 Samuel 23:16, 17) Si David maunongon sab nga higala. Siya misaad nga atimanon ang pamilya ni Jonatan, ug iya kanang gituman bisag namatay na si Jonatan.​—1 Samuel 18:1; 20:15-17, 30-34; 2 Samuel 9:1-7.

10. Unsay imong nakat-onan sa panaghigalaay sa tulo ka Hebreohanon?

¹⁰ Ang managhigala nga si Sadrak, Mesak, ug Abednego  maoy Hebreohanong mga bata nga gidala palayo sa ilang pamilya. Kay layo sa ilang pamilya, sila nagtinabangay aron magpabiling matinumanon kang Jehova. Sa hamtong na sila, nasulayan ang ilang pagtuo dihang gisugo sila ni Haring Nabucodonosor sa pagsimba sa estatuwang bulawan. Ang tulo ka managhigala midumili sa pagsunod ug miingon sa hari: “Dili mi moalagad sa imong mga diyos o mosimba sa estatuwang bulawan nga imong gipatindog.” Dihang gisulayan ang ilang pagtuo, kini nga managhigala nagpabiling maunongon sa ilang Diyos.​—Daniel 1:1-17; 3:12, 16-28.

11. Nganong nahibalo ta nga si Pablo ug Timoteo suod nga managhigala?

¹¹ Dihang nahimamat ni apostol Pablo ang batan-on nga si Timoteo, iyang nakita nga gihigugma ni Timoteo si Jehova ug ang kongregasyon. Busa iyang gibansay si Timoteo sa pagtabang sa mga igsoon sa daghang dapit. (Buhat 16:1-8; 17:10-14) Si Timoteo naningkamot pag-ayo maong si Pablo nakaingon: “Siya nagpaulipon kanako sa pagpauswag sa maayong balita.” Nahibalo si Pablo nga si Timoteo “tinuod nga mag-atiman” sa mga igsoon. Samtang sila nagtinabangay sa pag-alagad kang Jehova, si Pablo ug Timoteo nahimong suod nga managhigala.​—Filipos 2:20-22; 1 Corinto 4:17.

12, 13. (a) Nganong kinahanglan natong pilion ug maayo ang atong mga higala bisan diha sa kongregasyon? (b) Nganong gihatag ni apostol Pablo ang pasidaan sa 1 Corinto 15:33?

¹² Sa kongregasyon, makakat-on ta sa atong mga  igsoon ug matabangan nato ang usag usa aron makapabiling matinumanon. (Basaha ang Roma 1:11, 12.) Apan bisan diha sa kongregasyon, kinahanglang pilion nato ang atong suod nga mga higala. Ang atong mga igsoon lainlaig kultura ug kagikan. Ang uban bag-ohan ug ang uban dugay nang nag-alagad kang Jehova. Nagkinahanglag panahon nga molalom ang relasyon sa usa ka tawo kang Jehova, sama nga nagkinahanglag panahon nga mohinog ang prutas. Busa kinahanglang magpakita tag pailob ug gugma sa usag usa ug kanunayng mamilig maayong mga higala.​—Roma 14:1; 15:1; Hebreohanon 5:12–6:3.

 ¹³ Usahay motungha sa kongregasyon ang usa ka seryosong kahimtang, ug kinahanglan tang mag-amping. Lagmit ang usa ka igsoon may ginahimo nga supak sa Bibliya. O ang usa may pagkareklamador nga makadaot sa kongregasyon. Dili na kini ikatingala, kay bisag sa unang siglo, may mga panahon nga dihay mga problema ang kongregasyon. Gani gipasidan-an ni apostol Pablo ang mga Kristohanon kaniadto: “Ayawg pahisalaag. Ang daotang pakig-uban makadaot sa mapuslanong pamatasan.” (1 Corinto 15:12, 33) Gipasidan-an usab ni Pablo si Timoteo nga pilion niyag maayo ang iyang suod nga mga higala. Kana sab ang angay natong himoon.​—Basaha ang 2 Timoteo 2:20-22.

14. Unsay epekto sa atong pagpilig mga higala diha sa atong relasyon kang Jehova?

¹⁴ Angay natong panalipdan ang atong relasyon kang Jehova. Kini ang labing bililhong butang nga atong nabatonan. Busa dili ta makigsuod niadtong makapahuyang sa atong pagtuo ug makadaot sa maong relasyon. Hinumdomi nga kon ituslob nato ang espongha sa suka, dili nato madahom nga tubig ang masuhop niini. Sa samang paagi, kon ang atong mga higala nagbuhat ug sayop, dili nato madahom nga masayonan ta sa paghimog husto. Kinahanglang pilion natog maayo ang atong suod nga mga higala.​—1 Corinto 5:6; 2 Tesalonica 3:6, 7, 14.

15. Unsay imong himoon aron makabaton kag maayong mga higala sa kongregasyon?

¹⁵ Makita nimo diha sa kongregasyon ang mga tawong nahigugma kang Jehova. Puwede nimo silang  mahimong suod nga mga higala. (Salmo 133:1) Pakighigala dili lang sa mga parehas nimog edad o kagikan. Hinumdomi nga si Jonatan magulang kaayo kang David, ug si Ruth manghod kaayo kang Noemi. Sundon nato ang tambag sa Bibliya: “Buksi pag-ayo ang inyong kasingkasing.” (2 Corinto 6:13; basaha ang 1 Pedro 2:17.) Kon maningkamot ka sa pagsundog kang Jehova, modaghan ang gustong makighigala nimo.

16, 17. Kon dunay nakapasilo nato sa kongregasyon, unsay dili nato buhaton?

¹⁶ Ang matag membro sa pamilya lainlain ug personalidad, opinyon, ug pamaagi. Ingon sab niana ang kongregasyon. Kini nga mga kalainan lamas sa kinabuhi, ug daghan tag makat-onan sa usag usa. Pero usahay kini ang hinungdan nga masaypan natog sabot ang mga igsoon ug maglagot ta nila. May panahon nga masilo o masakitan ta. (Proverbio 12:18) Angay ba tang maluya o mobiya sa kongregasyon tungod niini?

¹⁷ Dili. Bisag dunay makapasilo nato, dili ta angayng mobiya sa kongregasyon. Dili si Jehova ang nakapasakit nato. Gihatagan ta niyag kinabuhi ug uban pang butang. Takos siya sa atong gugma ug pagkamaunongon. (Pinadayag 4:11) Ang kongregasyon regalo ni Jehova nga motabang nato aron magpabiling lig-on ang atong pagtuo. (Hebreohanon 13:17) Dili gyod nato kini isalikway tungod lang kay may nakapasilo nato.​—Basaha ang Salmo 119:165.

18. (a) Unsay makatabang aron maayo tag relasyon sa mga igsoon? (b) Nganong angay tang magpasaylo?

 ¹⁸ Gihigugma nato ang mga igsoon ug gusto nato nga maayo tag relasyon nila. Si Jehova wala magdahom ug kahingpitan kang bisan kinsa, ug kinahanglang ingon ana sab ta. (Proverbio 17:9; 1 Pedro 4:8) Kitang tanan masayop, apan ang gugma motabang nato nga “kinasingkasing nga magpinasayloay.” (Colosas 3:13) Tungod sa gugma, dili nato padak-on ang ginagmay nga dili pagsinabtanay. Tinuod, kon may nakapasilo nato, dili kana daling mawala sa atong hunahuna. Mas sayon nga masuko ug maghambin ug kapungot batok nianang tawhana. Pero kini makapahimo natong negatibo ug dili malipayon. Sa laing bahin, kon pasayloon nato ang nakapasilo nato, magmalinawon ang atong hunahuna, magkahiusa ang kongregasyon, ug labaw sa tanan, makabaton tag maayong relasyon kang Jehova.​—Mateo 6:14, 15; Lucas 17:3, 4; Roma 14:19.

19. Kanus-a nato angayng hunongon ang pagpakig-uban sa usa ka membro sa kongregasyon?

¹⁹ Diha sa pamilya, himoon sa matag membro ang ilang papel aron magmalipayon ang usag usa. Pero hunahunaa kon dunay morebelde. Gihimo ang tanan aron tabangan siya, pero dili siya magpatabang. Lagmit modesisyon siyang molayas, o kaha palayason siya sa ulo sa pamilya. Mahitabo usab kana sa kongregasyon. Ang usa ka tawo lagmit nagsigeg himog butang nga makapasuko kang Jehova ug makadaot sa kongregasyon. Dili siya magpatabang ug gipakita  niya nga dili na siya gustong mahimong bahin sa kongregasyon. Lagmit modesisyon siya nga mobiya sa kongregasyon, o kaha ipalagpot siya. Kon mahitabo kana, ang Bibliya klarong nag-ingon nga “mohunong na sa pagpakig-uban” kaniya. (Basaha ang 1 Corinto 5:11-13; 2 Juan 9-11) Lisod kaayo ni kon higala nato siya o kaha membro sa atong pamilya. Pero sa kahimtang nga sama niini, kinahanglan nga mas magmaunongon ta kang Jehova.​—Tan-awa ang Endnote 8.

20, 21. (a) Nganong pagpakitag gugma ang pagpalagpot? (b) Nganong kinahanglan nga pilion natog maayo ang atong mga higala?

²⁰ Ang kahikayan sa pagpalagpot nagpakita sa gugma ni Jehova. Mapanalipdan niini ang kongregasyon gikan niadtong walay pagpabili sa mga sukdanan ni Jehova. (1 Corinto 5:7; Hebreohanon 12:15, 16) Kini makatabang nga mapakita nato ang atong gugma sa balaang ngalan ni Jehova, sa iyang taas nga mga sukdanan, ug kang Jehova mismo. (1 Pedro 1:15, 16) Ang pagpalagpot maoy pagpakita sab ug gugma ngadto sa usa nga dili na bahin sa kongregasyon. Kining bug-at nga disiplina mahimong makatabang niya nga makaamgo nga sayop ang iyang gihimo ug modasig niya nga magbag-o. Daghang napalagpot ang mibalik kang Jehova ug mainitong gidawat pag-usab sa kongregasyon.​—Hebreohanon 12:11.

²¹ Ang atong mga higala duna gyoy epekto kanato. Busa kinahanglang pilion nato silag maayo. Kon gihigugma nato ang gihigugma ni Jehova, makauban nato kadtong makatabang nato sa pagpabiling matinumanon kaniya hangtod sa hangtod.