1, 2. Unsay angay natong masabtan bahin kang Satanas ug sa mga demonyo?

NINDOT unya ang kinabuhi sa bag-ong kalibotan ni Jehova. Magkinabuhi na gyod ta sumala sa katuyoan ni Jehova para nato. Pero karon nagkinabuhi ta sa kalibotan nga gikontrolar ni Satanas ug sa iyang mga demonyo. (2 Corinto 4:4) Bisag dili nato sila makita, sila tinuod ug gamhanan kaayo.

² Niining kapituloha, atong hisgotan kon unsaon nga makapabilin tang suod kang Jehova ug mapanalipdan ang atong kaugalingon kang Satanas. Si Jehova nagsaad nga tabangan ta niya. Pero kinahanglang masabtan nato ang mga paagi ni Satanas ug sa iyang mga demonyo sa paglimbong ug pag-atake kanato.

3. Unsay gustong himoon sa Yawa kanato?

³ Si Satanas miingon nga ang mga tawo nagsimba kuno kang Jehova tungod lang sa mga kaayohan nga madawat ug mohunong kuno ta sa pag-alagad kon magkalisod na. (Basaha ang Job 2:4, 5.) Kon dunay gusto nga makakat-on bahin kang Jehova, makita kana ni Satanas ug sa mga demonyo ug maningkamot sila nga babagan siya. Masuko sila kon dunay magpahinungod  kang Jehova ug mabawtismohan. Sa Bibliya, ang Yawa gipakasama sa “leyon nga nagngulob, nga nangitag matukob.” (1 Pedro 5:8) Gusto ni Satanas nga madaot ang atong relasyon kang Jehova.​—Salmo 7:1, 2; 2 Timoteo 3:12.

4, 5. (a) Unsay dili mahimo ni Satanas? (b) Unsay ipasabot nga ‘suklan ang Yawa’?

⁴ Pero dili ta angayng mahadlok kang Satanas ug sa iyang mga demonyo. Gilimitehan ni Jehova ang ilang mahimo kanato. Misaad siya nga “usa ka dakong panon” sa matuod nga mga Kristohanon ang maluwas sa  “dakong kasakitan.” (Pinadayag 7:9, 14) Dili gyod kana mapugngan sa Yawa kay panalipdan ni Jehova ang Iyang katawhan.

⁵ Kon magpabilin tang suod kang Jehova, dili mabungkag ni Satanas ang atong relasyon Kaniya. Gipasaligan ta sa Pulong sa Diyos: “Si Jehova magauban kaninyo basta dili mo mobiya kaniya.” (2 Cronicas 15:2; basaha ang 1 Corinto 10:13.) Daghang matinumanong mga alagad sa una, sama kang Abel, Enoc, Noe, Sara, ug Moises, ang misukol sa Yawa pinaagi sa pagpabiling suod kang Jehova. (Hebreohanon 11:4-40) Mahimo sab nato kana. Ang Pulong sa Diyos nag-ingon: “Sukli ang Yawa, ug siya mokalagiw gikan kaninyo.”​—Santiago 4:7.

6. Unsaon ta pag-atake ni Satanas?

⁶ Bisag nahibalo si Satanas nga gilimitehan ni Jehova ang iyang mahimo kanato, maningkamot gihapon siya nga mohuyang ang atong relasyon sa Diyos. Karon, si Satanas daghag paagi sa pag-atake, ug ang iyang mga estratehiya linibo ka tuig na niyang gigamit. Unsa ang pipila niana?

7. Nganong ginaatake ni Satanas ang katawhan ni Jehova?

⁷ Si apostol Juan misulat: “Ang tibuok kalibotan nailalom sa gahom sa usa nga daotan.” (1 Juan 5:19) Kontrolado ni Satanas kining daotan nga kalibotan ug gusto sab niyang kontrolahon ang katawhan ni Jehova. (Miqueas 4:1; Juan 15:19; Pinadayag 12:12, 17) Ang Yawa nahibalo nga mubo na lang ang iyang panahon, busa gipresyur niya pag-ayo ang matag usa kanato aron dili ta magmaunongon sa Diyos. Usahay ang pag-atake sa Yawa direkta, pero may panahon nga dili kini daling mamatikdan.

8. Unsay angayng hinumdoman sa matag Kristohanon?

 ⁸ Ang Efeso 6:12 nag-ingon: “Kita dunay pakig-away [“pakigdumog,” footnote] . . . batok sa daotang espiritung mga puwersa sa langit.” Ang matag Kristohanon dunay pakig-away batok sa Yawa ug sa mga demonyo. Angay natong hinumdoman nga apil niini nga pakig-away ang tanang nagpahinungod kang Jehova. Sa sulat ni apostol Pablo sa mga taga-Efeso, katulo niya awhaga ang mga Kristohanon nga ‘mobarog nga lig-on.’​—Efeso 6:11, 13, 14.

9. Unsay gipaningkamotan ni Satanas ug sa mga demonyo nga himoon kanato?

⁹ Naningkamot si Satanas ug ang mga demonyo sa paglimbong nato sa lainlaing paagi. Lagmit nasuklan nato si Satanas sa usa niya ka paagi. Pero dili ni garantiya nga masuklan nato ang uban pa niyang paagi. Maningkamot siya nga mahibaloan ang atong mga kahuyangan aron ipahiuyon niana ang bitik nga iyang gamiton. Pero dili ta magpabitik, kay ang Bibliya nagtudlo nato bahin sa mga bitik sa Yawa. (2 Corinto 2:11; tan-awa ang Endnote 31.) Usa niini mao ang demonismo.

10. (a) Unsa ang demonismo? (b) Unsay panglantaw ni Jehova sa demonismo?

¹⁰ Ang demonismo mao ang pagpakiglabot sa mga demonyo, sama sa pagpanagna, pagpang-ungo, pagpanglamat, o pagpakig-estorya sa patay. Ang Bibliya nag-ingon nga ang demonismo ‘dulumtanan,’ ug dili puwedeng makiglangkit ta sa demonismo ug unya magsimba kang Jehova. (Deuteronomio 18:10-12; Pinadayag 21:8) Angayng likayan sa mga Kristohanon ang tanang matang sa demonismo.​—Roma 12:9.

11. Unsay mahimong resulta kon mainteres ta sa mga gahomgahom ug sa mga dili ingon nato?

 ¹¹ Nahibalo si Satanas nga kon interesado ta sa mga gahomgahom ug sa mga dili ingon nato, sayon ra para niya nga hayloon ta ngadto sa demonismo. Ang bisan unsang matang sa demonismo makadaot sa atong relasyon kang Jehova.

12. Sa unsang paagi impluwensiyahan ni Satanas ang atong hunahuna?

¹² Naningkamot si Satanas nga libogon ang mga tawo. Anam-anam siyang magtanom ug mga pagduhaduha, hangtod nga ang mga tawo maghunahuna nga “ang maayo daotan ug ang daotan maayo.” (Isaias 5:20) Gipasiugda sa Yawa nga ang tambag sa Bibliya dili mosaler ug mas magmalipayon ta kon balewalaon nato ang mga sukdanan sa Diyos.

13. Unsay mga pananglitan nga si Satanas nagtanom ug mga pagduhaduha?

¹³ Ang pagsabwag ug mga pagduhaduha maoy epektibo kaayong paagi ni Satanas. Dugay na niya ning gigamit. Sa tanaman sa Eden, iyang gipangutana si Eva aron siya magduhaduha: “Tinuod ba nga miingon ang Diyos nga dili mo angayng mokaon sa bunga sa tanang kahoy sa tanaman?” (Genesis 3:1) Dayon sa panahon ni Job, gipangutana ni Satanas si Jehova atubangan sa mga anghel: “Mahadlok kaha si Job sa Diyos sa wala lamay hinungdan?” (Job 1:9) Human sa bawtismo ni Jesus, gihagit siya ni Satanas: “Kon ikaw anak sa Diyos, himoang tinapay kining mga bato.”​—Mateo 4:3.

14. Unsay gihimo ni Satanas aron ang mga tawo magduhaduha kon peligroso ba ang demonismo?

¹⁴ Padayon gihapon karon ang Yawa sa pagtanom ug  mga pagduhaduha. Gihimo ni Satanas nga daw dili sayop ang pipila ka matang sa demonismo aron ang mga tawo magduhaduha kon daotan ba gyod ang demonismo. Bisan gani ang pipila ka Kristohanon wala makabantay sa mga kapeligrohan niini. (2 Corinto 11:3) Busa unsaon nato pagpanalipod ang atong kaugalingon? Unsay atong himoon aron dili ta malimbongan ni Satanas? Susihon nato ang duha ka butang nga posible tang malimbongan: kalingawan ug pagpatambal.

15. Sa unsang paagi malangkit ta sa mga demonyo pinaagi sa atong kalingawan?

¹⁵ Karon, daghang pelikula, video, salida sa TV, computer game, ug website ang nagpasiugdag mga demonyo, madyik, ug gahomgahom. Para sa daghan, makalingaw ni ug dili makadaot. Wala sila makaamgo sa kapeligrohan kon makiglangkit sila sa mga demonyo. Ang usa ka tawo mahimong malangkit sa demonismo pinaagi sa horoscope, panghimalad, tarot nga mga baraha, ug bolang kristal. Gihimo kini sa Yawa nga daw misteryoso, makalingaw, ug dili ra peligroso. Ang usa ka tawo lagmit maghunahuna nga wala ray daotan sa pagtan-awg bisan unsa bahin sa demonyo o gahomgahom basta dili siya mohimog mga buhat sa demonismo. Nganong peligroso ang maong panghunahuna?​—1 Corinto 10:12.

16. Nganong angay natong likayan ang kalingawan nga nagpasiugdag mga gahomgahom ug dili ingon nato?

¹⁶ Si Satanas ug ang mga demonyo dili makabasa sa atong hunahuna. Pero mahibaloan nila kon unsay atong gitinguha ug gihunahuna pinaagi sa pagpaniid sa atong mga desisyon para sa kaugalingon ug sa pamilya,  lakip sa gipili natong kalingawan. Kon pilion nato ang mga pelikula, musika, o basahon bahin sa espiritismo, pagpanglamat, mga nademonyohan, ungo, bampira, o uban pang sama niana, mahibalo si Satanas ug ang mga demonyo nga interesado ta nila. Dayon, maningkamot sila nga malangkit ta pag-ayo sa demonismo.​—Basaha ang Galacia 6:7.

17. Sa unsang paagi pahimuslan ni Satanas ang atong tinguha alang sa maayong panglawas?

¹⁷ Pahimuslan sab ni Satanas ang atong tinguha alang sa maayong panglawas. Daghan karon ang nagmasakiton. Lagmit gisulayan na sa usa ka tawo ang lainlaing paagi sa pagtambal pero walay alibyo. (Marcos  5:25, 26) Posible pa gani siyang madesperado ug sulayan ang tanang paagi sa pagtambal. Pero ingong Kristohanon, kinahanglan tang mag-amping nga ang pilion natong paagi sa pagtambal wala maglangkit ug “salamangka.”​—Isaias 1:13.

18. Unsang mga paagi sa pagtambal ang angayng likayan sa usa ka Kristohanon?

¹⁸ Sa karaang Israel, dihay pipila nga naggamit ug “salamangka.” Giingnan sila ni Jehova: “Dihang bayawon ninyo ang inyong mga kamot, dili ko motan-aw kaninyo. Bisan pag kadaghan mo moampo, dili ko mamati.” (Isaias 1:15) Tiaw mo na​—si Jehova dili mamati sa ilang pag-ampo! Dili nato gusto nga mohimog bisan unsa nga makadaot sa atong relasyon kang Jehova ug maoy hinungdan nga dili ta niya tabangan, ilabina dihang magsakit ta. (Salmo 41:3) Busa angay natong sayron kon ang usa ka paagi sa pagtambal nasagolan ba ug demonismo o espiritismo. (Mateo 6:13) Kon namatikdan nato nga kini posibleng konektado sa demonismo, angay nato ning likayan!​—Tan-awa ang Endnote 32.

19. Unsay gihimo sa Yawa aron ang mga tawo mahadlok?

¹⁹ Ang ubang tawo nagtuo nga dili tinuod ang Yawa ug mga demonyo. Pero para sa uban, tinuod sila base sa ilang nasinatian. Daghan ang nahadlok sa daotang mga espiritu ug naulipon sa mga patuotuo. Ang uban nagsabwag ug kahadlok pinaagi sa pagsugilon ug mga estorya bahin sa mga demonyo ug sa makalilisang nga mga butang nga mahimo nila sa tawo. Sagad, malingaw ang mga tawo niini nga mga estorya ug eksayted nga isugilon ni sa uban. Tungod sa maong mga estorya, ang mga tawo mahadlok sa Yawa.

20. Sa unsang paagi masabwag nato ang mga bakak ni Satanas?

 ²⁰ Hunahuna kini​—gusto ni Satanas nga ang mga tawo mahadlok niya. (2 Tesalonica 2:9, 10) Bakakon siya, ug nahibalo siya kon unsaon pag-impluwensiya sa hunahuna niadtong interesado sa demonismo ug iyang patuohon sila sa mga butang nga dili tinuod. Kining mga tawhana magsugilon ug mga estorya bahin sa ila kunong nakita ug nadungog. Dihang balikbalik nga isugilon kini nga mga estorya, kini mapasobrahan. Dili nato gustong tabangan si Satanas sa paghadlok sa mga tawo pinaagi sa pagsugilon sa maong mga estorya.​—Juan 8:44; 2 Timoteo 2:16.

21. Imbes magsugilon ug mga estorya bahin sa mga demonyo, unsay angay natong iestorya?

²¹ Kon ang usa ka alagad ni Jehova dunay kasinatian sa mga demonyo, dili niya kini isugilon aron lingawon ang uban. Ang katawhan ni Jehova dili angayng mahadlok sa kon unsay mahimo sa Yawa ug sa mga demonyo. Hinuon, magpokus ta kang Jesus ug sa gahom nga gihatag ni Jehova kaniya. (Hebreohanon 12:2) Wala lingawa ni Jesus ang iyang mga tinun-an ug mga estorya bahin sa mga demonyo. Nagpokus siya sa mensahe sa Gingharian ug sa “halangdong mga butang sa Diyos.”​—Buhat 2:11; Lucas 8:1; Roma 1:11, 12.

22. Unsay determinado nimong himoon?

²² Hinumdomi nga ang tumong ni Satanas mao ang pagdaot sa atong relasyon kang Jehova. Himoon niya ang tanan aron siya molampos. Pero nahibalo ta sa mga paagi sa Yawa ug determinado ta nga likayan ang tanang matang sa demonismo. Dili nato hatagag higayon ang Yawa. (Basaha ang Efeso 4:27.) Oo, kon suklan nato ang Yawa, dili ta niya mabitik ug makasalig ta sa panalipod ni Jehova.​—Efeso 6:11.