Sa tanang nahigugma kang Jehova nga Diyos ug sa iyang Pulong, ang Bibliya:

“Kamo mahibalo sa kamatuoran, ug ang kamatuoran magpahigawas kaninyo,” si Jesus miingon. (Juan 8:32) Hunahunaa ang imong gibati dihang una nimong nahibaloan ang kamatuoran diha sa Bibliya! Makapalipayng mahibaloan nga sa kalibotan nga punog kabakakan, makat-onan nato ang kamatuoran.​—2 Timoteo 3:1.

Gusto ni Jehova nga Diyos nga mahibaloan nato ang kamatuoran. Ug kay gihigugma nato ang mga tawo, gusto natong sultihan sila bahin niini. Pero labaw pa niana ang pag-alagad sa Diyos. Himoon nato ang atong maarangan nga magkinabuhi ingong mga Kristohanon kay gitahod nato pag-ayo ang mga prinsipyo ni Jehova. Gipatin-aw ni Jesus ang importanteng paagi nga atong mapamatud-an sa Diyos nga gihigugma nato siya. Siya miingon: “Kon sundon ninyo ang akong mga sugo, kamo magpabilin sa akong gugma, sama nga ako nagsunod sa mga sugo sa Amahan ug nagpabilin sa iyang gugma.”​—Juan 15:10.

Gihigugma gyod ni Jesus ang iyang Amahan, ug gibuhat niya ang tanang gipahimo sa iyang Amahan. Kon sundogon nato si Jesus sa atong pagkinabuhi, higugmaon ta ni Jehova ug magmalipayon gyod ta. Sama sa giingon ni Jesus, “karon nga nahibalo na mo niini, malipayon mo kon inyo kining himoon.”​—Juan 13:17.

Hinaot kini nga publikasyon makatabang nimo nga magkinabuhi subay sa kamatuoran sa Bibliya ug mahimong higala sa Diyos. Nag-ampo mi nga molambo ang imong gugma sa Diyos ug magpabilin ka “sa gugma sa Diyos . . . nga motultol sa kinabuhing walay kataposan.”​—Judas 21.