1. Unsay angay natong himoon aron maseguro nga ang atong pagsimba makapalipay kang Jehova, ug ngano?

SI Jesus miingon: “Ang matuod nga mga magsisimba magsimba sa Amahan sa espiritu ug kamatuoran, kay sa pagkatinuod, ang Amahan nangitag mga tawo nga ingon niini sa pagsimba kaniya.” (Juan 4:23; 6:44) Angayng segurohon kanunay sa matag usa kanato “kon unsay dalawaton sa Ginoo.” (Efeso 5:10) Kini dili kanunayng sayon. Naningkamot si Satanas sa pagpahisalaag nato aron mohimo tag mga butang nga dili makapalipay kang Jehova.​—Pinadayag 12:9.

2. Ipatin-aw kon unsay nahitabo duol sa Bukid sa Sinai.

² Unsay himoon ni Satanas aron mapahisalaag ta? Ang usa ka paagi mao nga libogon ta niya kon unsay husto ug kon unsay sayop. Matikdi kon unsay nahitabo sa nasod sa Israel dihang nagkampo sila duol sa Bukid sa Sinai. Mitungas si Moises sa bukid, ug ang mga tawo naghulat sa iyang pagbalik sa kampo. Sa ngadtongadto, gipul-an silag hinulat ug gihangyo nila si Aaron nga maghimog diyos para nila. Naghimo siyag bulawang idolo nga pormag nating baka. Dayon nagpista ang katawhan. Nanayaw sila palibot sa nating baka ug giyukboan  kini. Nagtuo sila nga ang ilang pagyukbo niini maoy pagsimba kang Jehova. Pero ang ilang pag-isip niini ingong “pista para kang Jehova” wala maghimo niini nga husto. Giisip kini ni Jehova nga idolatriya, ug daghan kanila ang namatay. (Exodo 32:1-6, 10, 28) Unsay atong makat-onan niini? Ayawg pailad. “Ayawg hikap ug bisan unsang hugaw,” ug patudlo kang Jehova kon unsay husto ug kon unsay sayop.​—Isaias 52:11; Ezequiel 44:23; Galacia 5:9.

3, 4. Nganong maayong susihon ang sinugdanan sa daghang popular nga selebrasyon?

³ Sa dinhi pa si Jesus sa yuta, iyang gibansay ang mga apostoles nga mahimong panig-ingnan sa putli nga pagsimba. Human sa iyang kamatayon, padayong gitudloan sa mga apostoles ang bag-ong mga tinun-an bahin sa mga prinsipyo ni Jehova. Pero human mamatay ang mga apostoles, gipasulod sa bakak nga mga magtutudlo diha sa kongregasyon ang sayop nga mga ideya ug paganong mga kostumbre ug selebrasyon. Ila pa ganing giilisdan ang ngalan sa pipila ka paganong selebrasyon aron mahimo kining Kristohanon kunohay. (2 Tesalonica 2:7, 10; 2 Juan 6, 7) Daghan sa maong mga selebrasyon ang popular gihapon karon, ug kini nagpasiugda gihapog bakak nga mga pagtulon-an, lakip ang demonismo. *​—Pinadayag 18:2-4, 23.

⁴ Sa tibuok kalibotan, ang mga selebrasyon ug mga holiday importante kaayong bahin sa kinabuhi sa tawo. Pero, samtang padayon kang magkat-on sa  panglantaw ni Jehova, imong makita nga kinahanglan nimong usbon ang imong panghunahuna bahin sa pipila ka selebrasyon. Tingali dili kini sayon, pero makasalig ka sa tabang ni Jehova. Atong susihon ang sinugdanan sa pipila ka popular nga selebrasyon aron masabtan nato ang pagbati ni Jehova bahin niini.

5. Unsay ebidensiya nga si Jesus wala matawo sa Disyembre 25?

⁵ Sa daghang bahin sa kalibotan, ang Pasko gisaulog sa Disyembre 25, nga gituohan sa kadaghanan ingong adlawng natawhan ni Jesus. Dili mabasa sa Bibliya kon unsang adlawa ug bulana natawo si Jesus, pero naghisgot ni bahin sa panahon nga nahitabo kini. Si Lucas misulat nga dihang natawo si Jesus sa Betlehem, ang ‘mga magbalantay sa karnero nagpabilin sa gawas,’ nga nagbantay sa ilang mga hayop. (Lucas 2:8-11) Sa Disyembre, mag-ulan, magniyebe, ug tugnaw kaayo sa Betlehem, busa ang mga magbalantay dili magpabilin sa gawas uban sa ilang mga hayop panahon sa kagabhion. Unsay atong makat-onan niini? Si Jesus natawo dihang dili kaayo tugnaw, busa dili kadto Disyembre. Ang Bibliya ug ang ebidensiya sa kasaysayan parehong nagpakita nga natawo siya sa mga bulan nga karon nailhang Septiyembre ug Oktubre.

6, 7. (a) Unsay sinugdanan sa daghang popular nga mga kostumbre sa Pasko? (b) Unsay angayng rason sa atong paghatag ug regalo?

⁶ Busa sa unsang paagi nagsugod ang Pasko? Gikan kini sa paganong mga pista, sama sa Saturnalia nga pista sa mga Romano, usa ka selebrasyon nga gipahinungod kang Saturno, ang diyos sa pagpanguma. Ang The Encyclopedia Americana nag-ingon: “Ang Saturnalia,  nga pista sa mga Romano nga gisaulog sa tungatunga sa Disyembre, maoy gibasehan sa daghang kostumbre sa paglipaylipay panahon sa Pasko. Pananglitan, gibase niini nga selebrasyon ang engrandeng kombira, paghatag ug mga regalo, ug pagdagkot ug mga kandila.” Dugang pa, ang adlawng natawhan ni Mithra, nga diyos-adlaw sa mga Persianhon, gisaulog sa Disyembre 25.

⁷ Pero kadaghanan sa nagsaulog ug Pasko karon wala maghunahuna sa paganong sinugdanan niini. Ila lang kining giisip ingong panahon nga magkauban ang  pamilya, mangaon ug lamiang pagkaon, ug manghatag ug pinaskohan. Siyempre, gimahal nato ang atong pamilya ug mga higala, ug gusto ni Jehova nga ang iyang mga alagad maghinatagay. Sumala pa sa 2 Corinto 9:7, “Gihigugma sa Diyos ang nagahatag nga malipayon.” Pero dili gusto ni Jehova nga manghatag lang ta sa espesyal nga mga okasyon. Ang katawhan ni Jehova malipayng manghatag ug regalo ug makig-uban sa ilang mga higala ug pamilya sa bisan unsang panahon, nga wala magdahom ug balos. Manghatag sila kay gihigugma nila ang usag usa.​—Lucas 14:12-14.

8. Bag-o bang natawo si Jesus dihang gidad-an siyag mga regalo sa mga astrologo? Ipatin-aw.

⁸ Aron suportahan ang ideya bahin sa paghatag ug regalo panahon sa Pasko, daghan ang moingon nga dihay tulo ka hari nga nagdalag mga regalo para sa bag-ong natawo nga si Jesus didto sa kuwadra. Tinuod, dihay mga lalaki nga mibisita kang Jesus ug nagdalag mga regalo. Panahon sa Bibliya, komon ang pagdalag regalo para sa importanteng tawo. (1 Hari 10:1, 2, 10, 13) Pero nahibalo ba ka nga ang Bibliya nag-ingon nga kini nga mga lalaki maoy mga astrologo, mga tawo nga naghimog madyik ug wala magsimba kang Jehova? Dugang pa, wala sila mobisita kang Jesus didto sa kuwadra dihang gipanganak siya. Sa ulahi na sila mibisita, dihang naa na sa balay ang batang si Jesus.​—Mateo 2:1, 2, 11.

9. Sa Bibliya, kinsay nagsaulog ug birthday?

⁹ Makapalipay ang pagkatawo sa usa ka bata. (Salmo 127:3) Pero wala na magpasabot nga magsaulog tag birthday. Hunahunaa kini: Sa Bibliya, duha lang ang  nagsaulog ug birthday, ang Paraon sa Ehipto ug si Haring Herodes Antipas. (Basaha ang Genesis 40:20-22; Marcos 6:21-29.) Sila dili mga alagad ni Jehova. Ang tinuod, wala tay mabasa sa Bibliya nga dihay alagad ni Jehova nga nagsaulog ug birthday.

10. Unsay pag-isip sa unang mga Kristohanon bahin sa birthday?

¹⁰ Sumala sa The World Book Encyclopedia, ang unang mga Kristohanon nag-isip sa pagsaulog ug birthday ingong paganong kostumbre. Ang ingon niana nga kostumbre gibase sa bakak nga mga pagtulon-an. Pananglitan, ang mga Grego kaniadto nagtuo nga ang matag tawo gipanalipdan sa espiritu nga presente dihang siya gipanganak. Ug sila nagtuo nga ang maong espiritu konektado sa diyos nga gipanganak sa samang petsa nga gipanganak ang maong tawo. Dugang pa, ang birthday konektado sa astrolohiya ug horoscope.

11. Unsay pagbati ni Jehova sa atong pagkamanggihatagon?

¹¹ Para sa daghan, ang ilang birthday maoy espesyal nga adlaw nga sila angayng pakitaag apresasyon ug gugma. Pero ikapakita nato ang gugma sa atong pamilya ug mga higala dili lang sa usa ka espesipikong adlaw kondili sa bisan unsang panahon. Gusto ni Jehova nga maayo ta ug manggihatagon sa tanang panahon. (Basaha ang Buhat 20:35.) Gihatagan ta niyag kinabuhi maong pasalamatan nato siya adlaw-adlaw, dili lang sa panahon sa atong birthday.​—Salmo 8:3, 4; 36:9.

12. Nganong ang adlaw sa atong kamatayon mas maayo kay sa atong adlawng natawhan?

¹² Ang Ecclesiastes 7:1 nag-ingon: “Ang maayong ngalan mas maayo pa kay sa maayong lana, ug ang adlaw sa kamatayon mas maayo kay sa adlawng natawhan.” Nganong ang adlaw sa atong kamatayon  mas maayo kay sa atong adlawng natawhan? Dihang natawo ta, wala pa tay nahimo sa atong kinabuhi, maayo man o daotan. Pero dihang gamiton nato ang atong kinabuhi sa pag-alagad kang Jehova ug sa pagbuhat ug maayo ngadto sa uban, naghimo tag “maayong ngalan,” o reputasyon, ug hinumdoman ta ni Jehova bisag patay na ta. (Job 14:14, 15) Ang katawhan ni Jehova dili magsaulog sa ilang birthday o sa birthday ni Jesus.  Gani, ang gisugo lang ni Jesus nga saulogon mao ang Memoryal sa iyang kamatayon.​—Lucas 22:17-20; Hebreohanon 1:3, 4.

13, 14. Sa unsa konektado ang pagsaulog sa Easter?

¹³ Daghan ang nagtuo nga nagsaulog sila sa pagkabanhaw ni Jesus dihang magsaulog silag Easter. Pero ang tinuod, ang Easter konektado kang Eostre, Anglo-Saxon nga paganong diyosa sa banagbanag ug tingpamulak. Ang The Dictionary of Mythology nag-ingon nga siya diyosa sa pagsanay. Ang ubang kostumbre sa Easter konektado niini. Pananglitan, ang mga itlog “iladong mga simbolo sa bag-ong kinabuhi ug pagkabanhaw,” nag-ingon ang Encyclopædia Britannica. Ang mga koneho sab dugay nang gigamit diha sa paganong pagsimba ingong simbolo sa pagsanay. Klaro nga ang Easter walay koneksiyon sa pagkabanhaw ni Jesus.

¹⁴ Malipay kaha si Jehova dihang makita niya nga gisagol sa mga tawo ang mga kostumbre sa bakak nga relihiyon ug ang pagkabanhaw sa iyang Anak? Dili gyod. (2 Corinto 6:17, 18) Ang tinuod, wala gyod moingon si Jehova nga saulogon nato ang pagkabanhaw ni Jesus.

15. Unsay sinugdanan sa Halloween?

¹⁵ Ang Halloween, nga gitawag sab ug All Hallows’ Eve o bisperas sa Todos los Santos, konektado sa mga ungo, duwende, ug multo. Dugay na ni nga selebrasyon. Sa takdol nga bulan nga kinadul-an sa Nobyembre 1, ang karaang mga Celt sa Britain ug Ireland nagsaulog sa pista sa Samhain. Nagtuo sila nga sa maong  pista, ang mga espiritu sa mga patay mamalik sa yuta. Ang mga tawo maghalad ug pagkaon ug ilimnon aron dili sila unsaon sa mga espiritu. Dihang ang mga bata magsul-ob ug mga costume, moadto sa mga balay, ug moingong “Trick or treat,” wala sila makaamgo nga ila diayng gisundog kining karaang kostumbre nga iya sa demonyo.

16, 17. Unsay angay natong sayron dihang magplanog kasal?

¹⁶ Ang kasal maoy usa ka malipayong okasyon. Ginahimo kini sa daghang paagi sa lainlaing bahin sa kalibotan. Sagad dili na hunahunaon sa mga tawo kon unsay gigikanan sa mga kostumbre sa kasal maong wala sila mahibalo nga ang uban niini naggikan sa paganong mga pagtulon-an. Pero angayng segurohon sa mga Kristohanon nga nagplanong magminyo nga ang ilang kasal makapalipay kang Jehova. Kon ilang sayron ang gigikanan sa mga kostumbre sa kasal, makahimo silag maayong mga desisyon.​—Marcos 10:6-9.

¹⁷ Ang pipila ka kostumbre sa kasal gituohan nga magdalag ‘suwerte’ sa magtiayon. (Isaias 65:11) Pananglitan, sa ubang lugar, itsahan sa mga tawo ug bugas ang kinasal. Nagtuo sila nga makahatag ni sa magtiayon ug mga anak, kalipay, taas nga kinabuhi, ug proteksiyon gikan sa daotan. Pero likayan sa mga Kristohanon ang mga kostumbre nga konektado sa bakak nga relihiyon.​—Basaha ang 2 Corinto 6:14-18.

18. Unsa ang ubang prinsipyo sa Bibliya para sa mga kasal?

¹⁸ Gusto sa mga Kristohanon nga ang ilang kasal malipayon ug may dignidad ug ang tanang manambong malipay. Dihang pasultihon sa atubangan ang mga bisita  sa Kristohanong kasal, angay silang mag-amping nga kini dili makapakaulaw, bastos, o walay tahod sa kinasal o sa uban. (Proverbio 26:18, 19; Lucas 6:31; 10:27) Likayan sa Kristohanong kasal ang “mapasigarbohong pagpakita sa mga nabatonan.” (1 Juan 2:16) Kon nagplano kag kasal, paneguroa nga malipay ka dihang imo ning handomon.​—Tan-awa ang Endnote 28.

19, 20. Unsay sinugdanan sa pag-toast?

¹⁹ Naandan na sa mga kasal ug ubang mga tapoktapok ang pag-toast. Dihang mag-toast, ang usa mopahayag ug mga panghinaot samtang ang uban moisa sa ilang baso. Unsay angayng panglantaw sa mga Kristohanon sa pag-toast?

²⁰ Ang International Handbook on Alcohol and Culture nag-ingon nga ang pag-toast lagmit naggikan sa karaang pagano nga kostumbre “diin ang sagradong likido itanyag ngadto sa mga diyos.” Gihimo kini “ingong baylo sa panghinaot, usa ka pag-ampo nga gisumaryo sa mga pulong nga ‘hinaot motaas pa ang imong kinabuhi!’ o ‘hinaot mamaayo ang imong panglawas!’” Ang mga tawo kaniadto moisa sa ilang kopa aron mangayog panalangin sa ilang mga diyos. Pero si Jehova dili mohatag ug mga panalangin nianang paagiha.​—Juan 14:6; 16:23.

21. Unsa pa nga mga selebrasyon ang angayng likayan sa mga Kristohanon?

²¹ Dihang modesisyon ka kon moapil ba o dili sa usa ka selebrasyon, hunahunaa kon unsang kinaiya  ug panggawi ang gipasiugda niini. Pananglitan, ang ubang selebrasyon ug karnabal naglakip sa law-ay nga sinayawan, pagpatuyang ug inom, ug imoralidad. Kini mahimong nagpasiugda sab sa nasyonalismo ug paagi sa pagkinabuhi sa mga bayot ug tomboy. Kon moapil ta niini nga mga selebrasyon, gidumtan ba gyod nato ang gidumtan ni Jehova?​—Salmo 1:1, 2; 97:10; 119:37.

22. Unsay makatabang sa usa ka Kristohanon sa pagdesisyon kon moapil ba siya sa usa ka selebrasyon?

²² Ang mga Kristohanon angay gyod nga mag-amping nga dili moapil sa mga selebrasyon nga wala magpasidungog sa Diyos. Si apostol Pablo misulat: “Kon kamo magkaon o mag-inom o magbuhat ug bisan unsa, himoa ang tanan alang sa kahimayaan sa Diyos.” (1 Corinto 10:31; tan-awa ang Endnote 29.) Hinuon, dili tanang selebrasyon ang konektado sa imoralidad, bakak nga relihiyon, o nasyonalismo. Kon walay nasupak nga mga prinsipyo sa Bibliya, kita ang modesisyon kon moapil ba ta sa usa ka selebrasyon. Kinahanglan sab natong hunahunaon ang epekto sa atong desisyon ngadto sa uban.

23, 24. Unsaon nato pagpatin-aw ang atong desisyon bahin sa pipila ka selebrasyon ngadto sa atong dili Saksi nga mga paryente?

²³ Lagmit mihunong na ka sa pag-apil sa mga selebrasyon nga wala magpasidungog kang Jehova. Tungod niini, ang pipila sa imong pamilya nga dili Saksi basin maghunahuna nga dili ka ganahan nila o dili na ka gustong makig-uban nila. Para nila, sa mga holiday  lang magkauban ang pamilya. Busa unsay imong himoon? Dunay daghang paagi nga mapasaligan nimo sila nga gihigugma ug gipabilhan nimo sila. (Proverbio 11:25; Ecclesiastes 3:12, 13) Puwede nimo silang imbitahon nga makig-uban nimo sa ubang okasyon.

²⁴ Kon gustong mahibalo ang imong mga paryente kon nganong dili na ka moapil sa ubang holiday, dunay mga impormasyon sa atong mga publikasyon ug sa jw.org/ceb nga makatabang aron imong mapatin-aw ang mga rason. Ayaw ipabati nga gusto nimo silang debatehon o pugson nga sundogon ka. Pasabta sila nga daghan kag gikonsiderar sa wala pa ka modesisyon. Kalma lang, ug ‘himoa ang imong sinultihan nga kanunayng maayo, tinimplahag asin.’​—Colosas 4:6.

25, 26. Unsaon pagtabang sa mga ginikanan ang ilang mga anak sa paghigugma sa mga sukdanan ni Jehova?

²⁵ Kitang tanan kinahanglang nakasabot pag-ayo kon nganong dili ta makigbahin sa pipila ka selebrasyon. (Hebreohanon 5:14) Tumong nato nga mapalipay si Jehova. Kon ginikanan ta, kinahanglang mogahin tag panahon nga tabangan ang atong mga anak nga masabtan ug higugmaon ang mga prinsipyo sa Bibliya. Dihang makombinsir sila nga si Jehova tinuod ug mahimo nilang higala, sila sab maningkamot nga mapalipay siya.​—Isaias 48:17, 18; 1 Pedro 3:15.

²⁶ Malipay si Jehova nga makita tang naningkamot sa pagsimba niya sa hinlo ug matinud-anong paagi. (Juan 4:23) Pero daghan ang nagtuo nga imposibleng magmatinud-anon niining dili matinud-anon nga kalibotan. Tinuod ba na? Ato nang hisgotan sa sunod kapitulo.