1, 2. Nganong malipay si Jehova nga makakita nga kita naningkamot nga magmaminatud-on? Iilustrar.

MIGAWAS sa tindahan ang inahan ug iyang batang lalaki. Ang bata kalit nga mihunong, ug mibanaag sa iyang nawong ang kakurat. Nagbitbit siyag gamayng dulaan nga iyang nakuha sa tindahan. Nakalimot siya sa pag-uli niana o paghangyo sa iyang inahan nga paliton kana. Siya nabalaka ug nagpatabang sa iyang inahan. Gipasaligan siya sa iyang inahan ug namalik sila sa tindahan aron ikauli ang dulaan ug mangayog pasaylo. Samtang giuli sa bata ang dulaan, mibatig kalipay ug garbo ang inahan. Ngano?

² Malipay gayong mahibalo ang mga ginikanan nga gipabilhan sa ilang mga anak ang pagkamaminatud-on. Mao man ang atong langitnong Amahan, “ang Diyos sa kamatuoran.” (Salmo 31:5) Siya malipayng makakita nga kita naningkamot nga magmaminatud-on samtang magakahamtong kita sa espirituwal. Kay buot natong pahimut-an siya ug magpabilin sa iyang gugma, ikapahayag usab nato ang pagbati ni apostol Pablo: “Buot namong magmaminatud-on sa tanang butang.” (Hebreohanon 13:18) Atong hisgotan ang upat ka pangunang natad sa kinabuhi diin lisdan gayod kita usahay nga magmaminatud-on. Dayon hisgotan nato ang moresultang mga kaayohan.

3-5. (a) Unsay gipasidaan kanato sa Pulong sa Diyos bahin sa mga kapeligrohan sa paglimbong sa kaugalingon? (b) Unsay makatabang kanato nga magmaminatud-on sa kaugalingon?

³ Ang atong unang suliran mao ang pagkahimong maminatud-on  sa kaugalingon. Kay dili man kita hingpit, dali ra kitang malimbongan sa kaugalingon. Pananglitan, giingnan ni Jesus ang mga Kristohanon sa Laodicea nga gilimbongan nila ang ilang kaugalingon sa paghunahuna nga sila dato nga sa pagkatinuod sila “kabos ug buta ug hubo” sa espirituwal nga paagi​—alaot ug makaluluoy gayod. (Pinadayag 3:17) Ang ilang paglimbong sa kaugalingon mas nagpameligro hinuon sa ilang kahimtang.

⁴ Makahinumdom ka usab nga si Santiago nagpasidaan: “Kon may tawo nga naghunahuna nga siya usa ka debotadong magsisimba apan dili magbusal sa iyang dila, hinunoa nagpadayon sa paglimbong sa iyang kaugalingong kasingkasing, ang dagway sa pagsimba niining tawhana walay kapuslanan.” (Santiago 1:26) Kon atong hunahunaon nga kita makagamit sa atong dila sa dili-hustong paagi ug dawaton gihapon ni Jehova ang atong pagsimba, gilimbongan nato ang atong kaugalingon. Makawang ug anugon lang ang atong pagsimba kang Jehova. Unsay makapanalipod kanato batok nianang maong makadaot nga buhat?

⁵ Nianang mga bersikuloha, gitandi ni Santiago ang kamatuoran sa pulong sa Diyos ngadto sa usa ka salamin. Siya nagtambag kanato sa pagsud-ong pag-ayo sa hingpit nga balaod sa Diyos ug pagpahiuyon niana. (Santiago 1:23-25) Ang Bibliya makatabang nga kita magmaminatud-on sa atong kaugalingon ug makasabot kon unsa gayoy pauswagon. (Lamentaciones 3:40; Haggeo 1:5) Makaampo usab kita ug makahangyo kang Jehova sa pagsusi kanato, nga tabangan kitang makasabot ug makatul-id sa bisan unsang seryosong mga depekto. (Salmo 139:23, 24) Ang pagkadili-maminatud-on maoy kahuyangan nga dili daling mamatikdan, ug angay natong isipon kini sama sa pag-isip niini sa atong langitnong Amahan. Ang Proverbio 3:32 nag-ingon: “Ang hiwi nga tawo maoy dulumtanan kang Jehova, apan ang Iyang pagpakigsuod anaa uban sa mga matul-id.” Si Jehova makatabang kanato aron ang atong pagbati ug pagtan-aw sa kaugalingon sama sa iya. Hinumdomi nga si Pablo miingon: “Buot namong  magmaminatud-on sa tanang butang.” Dili kita mahingpit sa pagkakaron, apan makapaningkamot gayod kita nga magmaminatud-on.

6. Nganong ang bana ug asawa kinahanglang magmaminatud-on sa usag usa, ug unsang mga kapeligrohan ang ilang malikayan?

⁶ Ang pagkamaminatud-on angay nga usa ka ilhanan sa Kristohanong pamilya. Busa, ang bana ug asawa kinahanglang magmaminatud-on sa usag usa. Walay luna diha sa Kristohanong panagtiayon ang makadaot, hugaw nga binuhatan sama sa pagbirigbirig sa lain, sekretong pagpakigrelasyon diha sa Internet, o paggamit ug bisan unsang matang sa pornograpiya. Nagbuhat niana sa tago ang pipila ka minyong mga Kristohanon. Kana maoy pagkadili-maminatud-on. Matikdi ang giingon sa matinumanong Haring David: “Wala ako molingkod uban sa mga tawo sa kabakakan; ug dili ako mosulod uban niadtong magpakaaron-ingnon.” (Salmo 26:4) Kon ikaw minyo, likayi gayod ang buhat nga makapatental kanimo sa pagtago niana sa imong kapikas!

7, 8. Unsang mga panig-ingnan sa Bibliya ang makatabang aron makakat-on ang mga anak sa pagpabili sa pagkamaminatud-on?

⁷ Sa pagtudlo sa mga ginikanan nga pabilhan sa ilang mga anak ang pagkamaminatud-on, maalamong mogamit silag mga panig-ingnan sa Bibliya. Sa pagpasidaan bahin sa pagkadili-maminatud-on, ikapunting nila si Acan, nga nangawat ug misulay sa pagtago  sa iyang gibuhat; si Gehazi, nga namakak aron makasapi; ug si Judas, nga nangawat ug nagbudhi kang Jesus.​—Josue 6:17-19; 7:11-25; 2 Hari 5:14-16, 20-27; Mateo 26:14, 15; Juan 12:6.

⁸ Kon bahin sa maayong mga panig-ingnan sa pagkamaminatud-on, anaay mga asoy sama sa kang Jacob, kinsa nag-agda sa iyang mga anak nga iuli ang salapi diha sa ilang mga sako kay nagtuo siyang nasayop lang kadto pagbutang; kang Jepte ug sa iyang anak babaye, nga bisan pa sa dakong sakripisyo, nagtuman sa panaad sa iyang amahan; ug kang Jesus, kinsa maisogong nagpaila sa iyang kaugalingon atubangan sa magubtanong panon aron matuman ang tagna ug mapanalipdan ang iyang mga higala. (Genesis 43:12; Maghuhukom 11:30-40; Juan 18:3-11) Kining pipila ka panig-ingnan tipik ra sa bililhong mga impormasyon nga anaa sa Pulong sa Diyos nga makatabang sa mga ginikanan sa pagtudlo sa ilang mga anak sa pagmahal ug pagpabili sa pagkamaminatud-on.

9. Unsay angayng likayan sa mga ginikanan aron mahimo silang panig-ingnan sa pagkamaminatud-on alang sa ilang mga anak, ug nganong hinungdanon kana?

⁹ Ang pagtudlo bahin sa pagkamaminatud-on maoy responsabilidad sa mga ginikanan. Nangutana si apostol Pablo: “Ikaw ba nga nagatudlo sa uban, dili magtudlo sa imong kaugalingon? Ikaw nga nagawali nga ‘Ayaw pangawat,’ nagapangawat ka ba?” (Roma 2:21) Makapalibog sa mga anak kon ang mga ginikanan magtudlo ug pagkamaminatud-on apan sila mismo dili maminatud-on. Ipakamatarong tingali nila ang gagmayng pagpangawat ug pagbakak pinaagi sa pag-ingong “Ay, naandan na man ni” o “Para gamayng bakak.” Sa tinuoray, ang pagpangawat maoy pagpangawat gayod bisag pilay kantidad, ug ang pagpamakak maoy pagpamakak gayod bisag unsay ulohan o bisag tipik ra nga bakak. * (Lucas 16:10) Dali rang mamatikdan sa mga bata ang pagkasalingkapaw ug  kana makadaot gayod kanila. (Efeso 6:4) Apan kon makakat-on sila sa pagkamaminatud-on gikan sa mga panig-ingnan sa ilang mga ginikanan, lagmit gayong mohamtong sila nga makadayeg kang Jehova niining dili-maminatud-ong kalibotan.​—Proverbio 22:6.

10. Mahitungod sa maminatud-ong pagpakigsulti sa mga isigkamagtutuo, unsang mga pasidaan ang atong hinumdoman?

¹⁰ Mabansay kitang magmaminatud-on kon kanunay kitang makig-uban sa mga isigka-Kristohanon. Sumala sa atong nakat-onan sa Kapitulo 12, angay natong bantayan ang atong paggamit sa katakos sa pagsulti, ilabina taliwala sa atong mga igsoon sa pagtuo. Dali rang motimang sa makadaot nga tabi o pagbutangbutang ang kasagarang estoryahay! Kon iasoy nato sa uban ang estorya nga wala nato masusi kon tinuod ba, makasabwag kitag bakak, busa labing maayo nga atong pugngan ang atong baba. (Proverbio 10:19) Sa laing bahin, tingali may nahibaloan kitang tinuod, apan wala kana magpasabot nga angay nato kanang ipanulti. Wala tingali kitay labot niana, o dili pagpakitag kalulot kon atong isulti kana sa uban. (1 Tesalonica 4:11) Ipakamatarong sa uban ang bulgar nga pagpanulti ingong pagkamaminatud-on, apan ang atong mga pulong angay nga kanunayng madanihon ug maluloton.​—Colosas 4:6.

11, 12. (a) Sa unsang paagi mograbe ang problema niadtong nalangkit sa seryosong sala? (b) Unsa ang pipila ka kabakakan nga gipasiugda ni Satanas bahin sa seryosong mga sala, ug unsaon nato pagbuntog kana? (c) Sa unsang paagi magmaminatud-on kita sa organisasyon ni Jehova?

 ¹¹ Ilabinang hinungdanon nga magmaminatud-on kita sa mga nagdumala sa kongregasyon. Mograbe ang problema sa pipila nga nalangkit sa seryosong sala kon mosulay sila sa pagtago sa ilang sala ug mamakak sa mga ansiyano sa kongregasyon sa dihang pangutan-on. Mahimo pa gani silang doble-kara, nga magpatuo nga nag-alagad kang Jehova samtang naghimog seryosong sala. Busa, ang tibuok niyang pagkinabuhi maoy kabakakan. (Salmo 12:2) Ang uban mag-inabogado nga ang itug-an ngadto sa mga ansiyano maoy bahin lang sa kamatuoran samtang ililong ang hinungdanong mga impormasyon. (Buhat 5:1-11) Ang maong pagkadili-maminatud-on sagad naggikan sa pagtuo sa mga kabakakan nga gipasiugda ni Satanas.​—Tan-awa ang kahon nga “ Kabakakan nga Gipasiugda ni Satanas Bahin sa Seryosong mga Sala.”

¹² Hinungdanon usab nga magmaminatud-on kita sa organisasyon ni Jehova sa dihang mosulat kitag tubag sa mga pangutana. Pananglitan, kon magtaho kita sa atong kalihokan sa pagsangyaw, ampingan nato nga tinuod ang atong isulat. Sa susama, kon magpil-ap kitag aplikasyon alang sa usa ka pribilehiyo sa pag-alagad, isulat gayod nato ang tinuod nga kahimtang sa atong panglawas o ubang bahin sa atong pagkatawo ug pag-alagad.​—Proverbio 6:16-19.

13. Sa unsang paagi kita magmaminatud-on kon kita amo o empleyado sa isigkamagtutuo?

¹³ Kita magmaminatud-on usab sa atong mga isigkamagtutuo kon bahin sa negosyo. Usahay magsosyo sa negosyo ang mga Saksi. Magbantay sila nga dili estoryahan ang ilang negosyo diha sa Kingdom Hall o samtang nagsangyaw. Lagmit ang usa amo ug ang lain empleyado. Kon mga igsoon sa pagtuo ang atong mga empleyado, kinahanglang magmaminatud-on kita kanila, nga suweldohan sila sa eksaktong panahon, sa gikasabotang kantidad, ug uban ang mga benepisyo sumala sa balaod. (1 Timoteo 5:18; Santiago 5:1-4) Sa pikas bahin, kon  kita empleyado sa usa ka igsoon, motrabaho kitag eksakto nga angay sa atong suweldo. (2 Tesalonica 3:10) Dili nato dahomon ang espesyal nga pagtagad tungod sa atong pagkaparehog relihiyon, nga isipon natong angay tang hatagag bakasyon, mga benepisyo, o ubang mga bentaha nga wala ihatag sa uban.​—Efeso 6:5-8.

14. Kon ang mga Kristohanon magkasosyo sa negosyo, unsay maalamon nilang himoon ingong panagana, ug ngano?

¹⁴ Komosta kon kita may kasosyo sa negosyo sa pagpamuhonan o pagpautang? Adunay usa ka hinungdanong prinsipyo sa Bibliya nga ikapadapat: Isulat ang tanang gikasabotan! Pananglitan, sa dihang si Jeremias mipalit ug lote, nagpahimo siyag duha ka kopya nga dokumento nga pirmadog mga saksi, ug gitipigan kini ingong ebidensiya nga magamit sa kaulahian. (Jeremias 32:9-12; tan-awa usab ang Genesis 23:16-20.) Sa dihang makignegosyo sa mga isigkamagtutuo, ang paghimog samang detalyadong dokumento wala magpasabot nga kamo walay pagsalig sa usag usa. Hinunoa, kini panagang sa mga di-pagsinabtanay, kahiubos, ug mga panagbangi. Angayng hinumdoman sa mga Kristohanong magkasosyo nga ang ilang negosyo dili angayng magdaot sa panaghiusa ug kalinaw sa kongregasyon. *​—1 Corinto 6:1-8.

15. Unsay panghunahuna ni Jehova bahin sa malimbongong mga paagi sa negosyo, ug unsay panghunahuna sa mga Kristohanon bahin nianang mga buhata nga kasagaran karon?

¹⁵ Dili lang sulod sa kongregasyon nga ang Kristohanon magmaminatud-on. Si Pablo miingon: “Buot namong magmaminatud-on sa tanang butang.” (Hebreohanon 13:18) Interesado kaayo ang atong Maglalalang bahin sa pagkamaminatud-on labot sa mga negosyo. Sa basahong Proverbio lamang, upat ka higayong gihisgotan nga gikinahanglan ang eksaktong timbangan. (Proverbio 11:1; 16:11; 20:10, 23) Sa karaang  mga panahon, kasagarang gigamit ang mga timbangan alang sa mga baligya ug sa salaping ibayad niana. Ang mga negosyanteng limbongan mogamit ug duha ka hugpong sa igtitimbang nga mga bato ug usa ka dili-eksaktong timbangan sa paglimbong sa mga kustomer. * Gidumtan ni Jehova kanang mga buhata! Aron magpabilin sa iyang gugma, likayan gayod nato ang tanang panglimbong maylabot sa negosyo.

16, 17. Unsang mga panglimbong ang kasagaran sa kalibotan karon, ug unsay determinadong buhaton sa matuod nga mga Kristohanon?

¹⁶ Dili kita matingala nga kaylap ang panglimbong kay si Satanas man ang magmamando niining kalibotana. Matag adlaw moatubang kitag mga tentasyon aron dili magmaminatud-on. Sa dihang ang mga tawo mangaplay ug trabaho, kasagarang sila mamakak ug maghinobra, nga mag-imbentog mga pamatuod bahin sa ilang mga katakos ug eksperyensiya sa trabaho. Sa dihang pil-apan sa mga tawo ang mga porma sa imigrasyon, buhis, insyurans, ug ubang susama niini, kasagarang dili-tinuod ang ilang isulat aron makuha ang ilang gusto. Mangopya ang daghang estudyante panahon sa mga pasulit, o sa dihang pasulaton silag mga komposisyon ug mga taho alang sa eskuylahan, mosusi sila sa Internet ug kopyahon kon unsay ilang makita didto ug angkonon nga ila kana. Ug kon ang mga tawo may mga transaksiyon sa korap nga mga opisyales, kasagarang manghiphip sila aron makuha ang ilang gusto. Kana gayoy atong madahom niining kalibotan nga daghan kaayo ang ‘mahigugmaon sa ilang kaugalingon, mahigugmaon sa salapi, . . . walay gugma sa pagkamaayo.’​—2 Timoteo 3:1-5.

¹⁷ Determinado gayod ang matuod nga mga Kristohanon nga dili mohimo niining mga buhata. Hinuon, lisod usahay nga magmaminatud-on tungod kay ang mga limbongan daw nagmalamposon ug miasenso pa sa kalibotan karon. (Salmo  73:1-8) Sa samang panahon, may mga Kristohanon nga nagkalisod sa panalapi kay gusto nilang magmaminatud-on “sa tanang butang.” Takos ba ang maong mga pagsakripisyo? Takos gayod! Apan ngano? Unsang mga panalangin ang moresulta gumikan sa pagkamaminatud-on?

18. Nganong bililhon kaayo ang dungog sa pagkamaminatud-on?

¹⁸ Pipila ra ka butang sa kinabuhi ang mas bililhon kay sa dungog sa pagkamaminatud-on ug pagkakasaligan. (Tan-awa ang kahon nga “ “Maminatud-on ba Gayod Ako?”) Ug si bisan kinsa mahimong makabaton niana! Wala kini mag-agad sa imong abilidad, bahandi, katahom, kahimtang sa katilingban, o sa bisan unsang butang nga dili nimo makontrolar. Bisan pa niana, daghan ang napakyas sa pagbaton niini. Talagsaon gayod kini. (Miqueas 7:2) Ang pipila mobiaybiay tingali apan ang uban mopabili sa imong pagkamaminatud-on, ug ang resulta niana mao nga sila mosalig ug motahod kanimo. Daghang Saksi ni Jehova ang nakabenepisyo sa pinansiyal kay sila nagmaminatud-on. Nagpabilin sila sa trabaho sa dihang gipapahawa ang dili-maminatud-ong mga empleyado, o nakatrabaho sila sa dihang gikinahanglan kaayo ang maminatud-ong mga empleyado.

19. Sa unsang paagi ang pagkamaminatud-on makaapektar sa atong tanlag ug sa atong relasyon kang Jehova?

¹⁹ Kon nahitabo kana kanimo o wala, imong masayran nga ang pagkamaminatud-on daghag kaayohan. Makabaton kag hinlong tanlag. Si Pablo misulat: “Kami masaligon nga kami may maminatud-ong tanlag.” (Hebreohanon 13:18) Dugang pa, ang imong maayong dungog himatikdan gayod sa atong mahigugmaon nga langitnong Amahan, kay siya nahigugma sa mga tawong maminatud-on. (Salmo 15:1, 2; Proverbio 22:1) Busa kon ikaw maminatud-on, mas makapabilin ka sa gugma sa Diyos, ug kana ang kinalabwang ganti nga atong mabatonan. Ang sunod natong susihon mao ang usa ka ulohang nalangkit sa pagkamaminatud-on: ang hunahuna ni Jehova bahin sa pagtrabaho.