1-3. (a) Unsay pagbati sa daghang tawo bahin sa ilang trabaho? (b) Unsang tinamdan bahin sa trabaho ang gidasig sa Bibliya, ug unsang mga pangutana ang atong hisgotan niining kapituloha?

DAGHANG tawo sa kalibotan karon dili malipay nga motrabaho. Kay sila maghago man ug daghang oras sa trabahong dili nila gusto, dili sila gustong mosulod sa trabaho adlaw-adlaw. Sa unsang paagi sila madasig ug magmatagbawon sa ilang trabaho?

² Gidasig sa Bibliya ang pagbaton ug hustong tinamdan bahin sa paghago. Kini nag-ingon nga ang paghago ug ang resulta niini maoy gasa. Si Solomon misulat: “Ang matag tawo mokaon ug moinom ug magpahimulos ug maayo sa tanan niyang kahago. Kini ang gasa sa Diyos.” (Ecclesiastes 3:13) Kay gihigugma kita ni Jehova ug gitinguha kanunay ang atong kaayohan, gusto niyang matagbaw kita sa atong trabaho ug makapahimulos sa mga resulta niana. Aron magpabilin kita sa iyang gugma, angay kitang magkinabuhi uyon sa iyang panghunahuna ug mga prinsipyo bahin sa trabaho.​—Ecclesiastes 2:24; 5:18.

³ Niining kapituloha, atong hisgotan ang upat ka pangutana: Sa unsang paagi makita nato ang kaayohan sa atong paghago? Unsang mga matang sa trabaho ang dili angayan sa matuod nga mga Kristohanon? Sa unsang paagi mabalanse nato ang sekular nga trabaho ug ang mga kalihokan sa pagsimba? Ug unsa ang atong labing hinungdanong buluhaton? Apan ato unang susihon ang panig-ingnan sa duha ka labing kugihang mga magbubuhat sa uniberso​—si Jehova nga Diyos ug si Jesu-Kristo.

4, 5. Sa unsang paagi gipakita sa Bibliya nga daghan kaayog nabuhat si Jehova?

⁴ Si Jehova mao ang Kinalabwang Magbubuhat. Ang Genesis 1:1 nag-ingon: “Sa sinugdan gilalang sa Diyos ang mga langit ug ang yuta.” Sa dihang natapos sa Diyos ang iyang pagpanglalang maylabot sa yuta, iyang gipahayag ang mga resulta ingong “maayo kaayo.” (Genesis 1:31) Sa laing mga pulong, bug-os siyang natagbaw sa tanan niyang gibuhat maylabot sa yuta. Si Jehova, “ang malipayong Diyos,” nagkalipay gayod sa daghan niyang nabuhat.​—1 Timoteo 1:11.

⁵ Dili gayod mohunong sa pagbuhat ang atong makugihong Diyos. Milabay na ang daghang katuigan human sa paglalang sa yuta ug sa tanang butang niini nga si Jesus miingon: “Ang akong Amahan nagpadayon sa pagbuhat hangtod karon.” (Juan 5:17) Unsa bay ginabuhat sa Amahan? Gikan sa langit nga iyang puy-anan, siya nagpadayon sa paggiya ug pag-atiman sa katawhan. Siya nagpatunghag “usa ka bag-ong linalang,” ang dinihogan-sa-espiritung mga Kristohanon nga mahimong mga kaubang magmamando ni Jesus sa langit. (2 Corinto 5:17) Siya padayong nagbuhat aron matuman ang iyang katuyoan alang sa mga tawo​—aron kadtong nahigugma kaniya makabatog walay-kataposang kinabuhi sa usa ka bag-ong kalibotan. (Roma 6:23) Gikahimut-an pag-ayo ni Jehova ang mga resulta sa maong pagbuhat. Milyonmilyon ang midawat sa mensahe sa Gingharian, nga gikabig sa Diyos ug nagpasibo sa ilang kinabuhi aron magpabilin sa iyang gugma.​—Juan 6:44.

6, 7. Unsay rekord ni Jesus bahin sa pagkakugihan?

⁶ Adunay maayong rekord si Jesus ingong makugihong magbubuhat sulod sa taas na kaayong panahon. Sa wala pa moanhi sa yuta ingong tawo, siya nag-alagad sa Diyos ingong “batid nga magbubuhat” sa paglalang sa tanang butang “sa langit ug sa yuta.” (Proverbio 8:22-31; Colosas 1:15-17) Samtang dinhi si Jesus sa yuta, siya nagmakugihon sa pagbuhat. Nakakat-on  siya sa pagpanukod sa dihang bata pa mao nga siya nailhang “ang panday.” * (Marcos 6:3) Ang pagpamanday hago ug nagkinahanglag lainlaing kahanas​—ilabina kay wala pa niadtoy demakina nga tiglaras ug kahoy, tindahag gamit nga puthaw, ug dekoryenteng mga hiramenta. Imo bang mahanduraw si Jesus nga milakaw aron makaremedyog tabla, nga tingali mamutol pag kahoy ug magguyod niana paingon sa iyang gitrabahoan? Imo bang mahulagway nga siya nagtukod ug mga balay, nga nag-andam ug nagtaod sa mga sagbayan ug mga parulos, naggamag mga pultahan ug mga muwebles? Walay duhaduha nga si Jesus natagbaw gayod sa pulido niyang trabaho.

⁷ Si Jesus ilabinang nagmakugihon ug puliki kaayo sa hinungdanon-kaayong buluhaton sa pagsangyaw sulod sa tulo ka tuig ug tunga. Kay buot niyang masangyawan ang daghang tawo, wala siya mag-usik ug panahon, nga misayog bangon ug misangyaw hangtod sa gabii. (Lucas 21:37, 38; Juan 3:2) Mipanaw siya “gikan sa siyudad ug siyudad ug gikan sa balangay ug balangay, nga nagwali ug nagpahayag sa maayong balita sa gingharian sa Diyos.” (Lucas 8:1) Literal nga gibaktas ni Jesus ang ginatos ka kilometros sa abogong mga dalan aron ikasangyaw ang mensahe sa maayong balita ngadto sa katawhan.

8, 9. Sa unsang paagi nakita ni Jesus ang kaayohan sa iyang paghago?

⁸ Nakita ba ni Jesus ang kaayohan sa iyang paghago sa ministeryo? Oo! Mipugas siyag mga binhi sa kamatuoran sa Gingharian, ug nagbilig mga umahan nga hinog na aron anihon. Nalig-on gayod si Jesus tungod sa pagtuman sa buluhaton sa Diyos nga andam siyang dili mokaon aron lang mabuhat kana. (Juan 4:31-38) Hunahunaa lang ang iyang katagbawan nga sa pagkatapos sa iyang ministeryo sa yuta siya matinud-anong nakataho sa iyang Amahan: “Gihimaya ko ikaw dinhi sa yuta, kay natapos ko ang buluhaton nga imong gihatag kanako aron buhaton.”​—Juan 17:4.

 ⁹ Walay duhaduha nga si Jehova ug si Jesus mao ang kinalabwang mga panig-ingnan niadtong nakakita sa kaayohan sa ilang paghago. Tungod sa atong gugma kang Jehova, kita madasig nga “mahimong mga tigsundog sa Diyos.” (Efeso 5:1) Tungod sa atong gugma kang Jesus, kita madasig nga ‘mosunod pag-ayo sa iyang mga tunob.’ (1 Pedro 2:21) Busa atong susihon karon kon sa unsang paagi makakita usab kitag kaayohan sa atong paghago.

10, 11. Unsay makatabang aron makaugmad kitag positibong tinamdan bahin sa atong trabaho?

¹⁰ Mahimong bahin sa kinabuhi sa matuod nga mga Kristohanon ang sekular nga trabaho. Buot natong matagbaw sa atong trabaho, apan tingali lisod kini kaayo kon wala kita makagusto niana. Sa unsang paagi makakita kitag kaayohan sa atong trabaho kon kana ang kahimtang?

¹¹ Pinaagi sa pag-ugmad ug positibong tinamdan. Dili nato kanunayng mausab ang kahimtang, apan mausab nato ang atong tinamdan. Ang pagpamalandong sa hunahuna sa Diyos makatabang aron makaugmad kitag positibong tinamdan bahin sa trabaho. Pananglitan, kon ikaw ulo sa pamilya, hunahunaa nga ang imong trabaho, bisag morag ubos, makabuhi sa imong pamilya. Ang pagtagana sa materyal nga mga panginahanglan sa imong pamilya sa ingon nga paagi maoy bililhon gayod sa mga mata sa Diyos. Ang iyang Pulong nag-ingon nga ang wala magtagana alang sa iyang pamilya “mas daotan pa kay sa tawong walay pagtuo.” (1 Timoteo 5:8) Ang pag-ila nga ang imong trabaho maoy usa ka paagi sa pagtuman sa hinatag-sa-Diyos nga responsabilidad makatabang nga mobati kag katagbawan niana nga mahimong wala batia sa imong mga isigkatrabahante.

12. Sa unsang mga paagi magantihon ang pagkamakugihon ug pagkamaminatud-on sa atong trabahoan?

¹² Pinaagi sa pagkamakugihon ug pagkamaminatud-on. Ang pagkakugihan ug pagkapulidong motrabaho mahimong moresulta  sa mga panalangin. Ang kugihan, pulidong mga trabahador kasagarang pabilhan sa ilang mga amo. (Proverbio 12:24; 22:29) Kay matuod man kitang mga Kristohanon, angay usab kitang magmaminatud-on diha sa atong trabahoan pinaagi sa dili pagpangawat ug kuwarta, materyales, o oras gikan sa atong amo. (Efeso 4:28) Ingon sa atong nasabtan sa miaging kapitulo, magantihon ang pagkamaminatud-on. Ang maminatud-ong empleyado lagmit saligan. Mamatikdan man o dili sa atong amo ang atong pagkakugihan, magmatagbawon kita tungod sa pagbaton ug “maminatud-ong tanlag” ug sa pagkahibalo nga nagpahimuot kita sa Diyos nga atong gihigugma.​—Hebreohanon 13:18; Colosas 3:22-24.

13. Unsa kahay moresulta kon kita maayog panggawi diha sa trabahoan?

 ¹³ Pinaagi sa pag-ila nga ang atong panggawi makahimaya sa Diyos. Kon huptan nato ang hataas nga sukdanan sa Kristohanong panggawi diha sa atong trabahoan, lagmit mamatikdan kini sa uban. Unsay resulta? Kita “makadayandayan sa pagtulon-an sa atong Manluluwas, ang Diyos.” (Tito 2:9, 10) Oo, tungod sa atong maayong panggawi, makita sa uban nga madanihon ang atong paagi sa pagsimba ug sila madani. Pagkadako sa imong kalipay kon may isigkatrabahante nga modawat sa kamatuoran tungod sa imong maayong panggawi! Labaw sa tanan, tagda kini: Di ba mas magantihon ang pagkahibalo nga ang imong maayong panggawi naghimaya kang Jehova ug nakapalipay sa iyang kasingkasing?​—Proverbio 27:11; 1 Pedro 2:12.

14-16. Kon mohimo kitag mga desisyon bahin sa trabaho, unsang hinungdanong mga pangutana ang angay natong tagdon?

¹⁴ Ang Bibliya walay detalyadong instruksiyon kon unsang matang sa sekular nga trabaho ang angayng dawaton o dili. Wala hinuon kini magpasabot nga makadawat ra kitag bisan unsang matang sa trabaho. Makatabang ang Kasulatan kanato sa pagpilig mapuslanon, uyon sa balaod nga trabaho nga makapahimuot sa Diyos ug sa paglikay sa trabaho nga dili makapahimuot kaniya. (Proverbio 2:6) Sa dihang mohimo kitag mga desisyon bahin sa sekular nga trabaho, adunay duha ka hinungdanong pangutana nga atong tagdon.

¹⁵ Kini bang trabahoa mismo gidili sa Bibliya? Tin-awng gidili sa Pulong sa Diyos ang pagpangawat, pagbakak, ug paggamag mga idolo. (Exodo 20:4; Buhat 15:29; Efeso 4:28; Pinadayag 21:8) Atong isalikway ang bisan unsang sekular nga trabaho nga mag-obligar kanato sa pagbuhat nianang mga butanga. Tungod sa atong gugma kang Jehova, dili gayod kita modawat ug trabaho nga naglakip sa mga buhat nga naglapas sa mga sugo sa Diyos.​—1 Juan 5:3.

 ¹⁶ Makasala ba ko o makaambit sa usa ka daotang buhat kon himoon ko kining trabahoa? Tagda kini nga pananglitan. Ang pagtrabaho ingong receptionist dili mismo daotan. Apan, unsa man kon ang Kristohanon tanyagan nianang trabahoa diha sa usa ka klinika sa aborsiyon? Itugot nato, wala siya obligaha nga motabang sa pagtaktak sa batang gisabak. Bisan pa niana, dili ba ang iyang regular nga pagtrabaho nagsuportar sa klinika sa aborsiyon nga maoy usa ka buhat nga supak sa Pulong sa Diyos? (Exodo 21:22-24) Kay ato mang gihigugma si  Jehova, dili nato buot malangkit sa dili-Kasulatanhong mga buhat.

17. (a) Unsang mga butang ang atong susihon pag-ayo sa dihang mohimog mga desisyon bahin sa sekular nga trabaho? (Tan-awa ang kahon nga “ Angay Ko Bang Dawaton ang Trabaho?”) (b) Sa unsang paagi ang atong tanlag makatabang kanato sa paghimog mga desisyon nga makapahimuot sa Diyos?

¹⁷ Masulbad ang daghang isyu bahin sa sekular nga trabaho kon susihon pag-ayo ang mga tubag sa duha ka hinungdanong pangutana sa parapo 15 ug 16. Dugang pa, may lain pang mga butang nga atong susihon pag-ayo sa dihang mohimo kitag mga desisyon bahin sa sekular nga trabaho. * Dili kita makadahom nga mohatag ang “matinumanon ug maalamong ulipon” ug mga lagda kabahin sa tanang kahimtang nga mahimong motungha. Dinhi nato angayng gamiton ang hait nga  salabotan. Ingon sa atong nakat-onan sa Kapitulo 2, angay natong tudloan ug bansayon ang atong tanlag pinaagi sa pagtuon kon unsaon pagpadapat ang Pulong sa Diyos sa atong adlaw-adlaw nga pagkinabuhi. Kay ang atong ‘mga gahom sa pagsabot nabansay pinaagi sa paggamit’ sa ingon nga paagi, ang atong tanlag makatabang kanato sa paghimog mga desisyon nga makapahimuot sa Diyos ug kita makapabilin sa iyang gugma.​—Hebreohanon 5:14.

18. Nganong dili sayon ang paghupot ug espirituwal nga panimbang?

¹⁸ Dili sayon ang paghupot ug espirituwal nga panimbang niining “kataposang mga adlaw” uban ang “makuyaw nga mga panahong lisod sagubangon.” (2 Timoteo 3:1) Mahimong lisod kaayo ang pagpangitag trabaho ug paghupot niana. Ingong matuod nga mga Kristohanon, atong nasabtan nga hinungdanong kita magkugi aron makabuhi sa atong pamilya. Apan kon dili kita magbantay, ang pagpamit-os diha sa trabahoan o ang mananakod nga pagkamateryalistiko sa kalibotan mahimong makababag sa atong pag-alagad sa Diyos. (1 Timoteo 6:9, 10) Atong hisgotan kon sa unsang paagi kita padayong makapanimbang, nga matino “ang mas hinungdanong mga butang.”​—Filipos 1:10.

19. Nganong angay kitang mosalig sa bug-os kang Jehova, ug kana makatabang kanato sa paglikay sa unsa?

¹⁹ Salig sa bug-os kang Jehova. (Proverbio 3:5, 6) Dili ba siya takos man sa maong pagsalig? Kon buot sabton, siya may kahingawa kanato. (1 Pedro 5:7) Mas nahibalo siya sa atong mga panginahanglan kay kanato, ug dili mubo ang iyang kamot. (Salmo 37:25) Busa maayong patalinghogan nato ang iyang pahinumdom diha sa iyang Pulong: “Himoa ang inyong paagi sa pagkinabuhi nga mahigawas sa gugma sa salapi, samtang kamo magmakontento sa presenteng mga butang. Kay [ang Diyos] nag-ingon: ‘Dili ko gayod ikaw pagabiyaan ni sa bisan unsang paagi pagatalikdan.’” (Hebreohanon 13:5) Daghang bug-os-panahong mga alagad ang makapamatuod nga  ang Diyos makatagana sa mga kinahanglanon sa kinabuhi. Kon bug-os kitang mosalig nga si Jehova mag-atiman kanato, dili kita sobrang mabalaka bahin sa pagbuhi sa atong pamilya. (Mateo 6:25-32) Dili nato tugotan nga mapasagdan ang pagsangyaw sa maayong balita ug ang pagtambong sa mga tigom tungod sa atong sekular nga trabaho.​—Mateo 24:14; Hebreohanon 10:24, 25.

20. Unsay kahulogan sa paghupot ug yano nga mata, ug sa unsang paagi padayon nimong mahuptan kana?

 ²⁰ Hupti ang yano nga mata. (Mateo 6:22, 23) Ang paghupot ug yano nga mata nagpasabot nga himoon natong yano ang atong pagkinabuhi. Ang yano nga mata sa usa ka Kristohanon motutok lang sa usa ra ka katuyoan​—ang pagbuhat sa kabubut-on sa Diyos. Kon tukma nga pagkatutok ang atong mata, dili kita malinga sa pagpangagpas ug dakog-suweldo nga trabaho ug maluhong pagkinabuhi. Dili usab kita malinga sa way-kataposang pangagpas sa labing bag-o ug nindot nga materyal nga mga butang nga gipasiatab sa mga tig-anunsiyo nga kinahanglanon aron kita magmalipayon. Sa unsang paagi padayon nimong mahuptan ang yano nga mata? Likayi ang sobrang pagpangutang. Ayawg gubta ang imong kinabuhi pinaagig mga kabtangan nga gastoso kaayog panahon ug pagtagad. Patalinghogi ang tambag sa Bibliya nga makontento kon aduna kanay “makaon ug ikabesti.” (1 Timoteo 6:8) Paningkamoti gayod nga mahimong yano ang imong pagkinabuhi.

21. Nganong angay natong tinoon kon unsay angayng unahon, ug unsay angay natong unahon sa atong kinabuhi?

²¹ Unaha ang espirituwal nga mga butang, ug ipadayon kana. Kay limitado ra man kitag panahon adlaw-adlaw, tinoon nato kon unsay angayng unahon. Kon dili nato kana himoon, mahurot ang atong bililhong panahon sa dili-hinungdanong mga butang ug dili na matagad ang mas hinungdanon. Unsay angay natong unahon sa atong kinabuhi? Gipasiugda sa daghan sa kalibotan ang pagkuhag edukasyon sa unibersidad aron makabaton ug dakog-suweldo nga karera niining sistemaha. Apan giawhag ni Jesus ang iyang mga sumusunod nga “magpadayon sa pagpangita pag-una sa gingharian.” (Mateo 6:33) Siyempre, ingong matuod nga mga Kristohanon, atong giuna ang Gingharian sa Diyos sa atong kinabuhi. Ang atong pagkinabuhi​—atong mga pagpili, mga tumong, ug mga kalihokan—​angayng magpakita nga ang intereses sa Gingharian ug kabubut-on sa Diyos mas hinungdanon kanato kay sa materyal nga mga butang ug sekular nga mga pangagpas.

22, 23. (a) Unsa ang pangunang buluhaton sa matuod nga mga Kristohanon, ug sa unsang paagi ikapakita nato nga kini hinungdanon kanato? (Tan-awa ang kahon nga “ Ang Resulta sa Akong Desisyon mao ang Malipayon ug Matagbawong Kinabuhi.”) (b) Unsay imong determinasyon bahin sa sekular nga trabaho?

²² Kay nahibalo nga nagkinabuhi na kita nga halalom na kaayo sa panahon sa kataposan, isentro nato ang atong pagtagad sa pangunang buluhaton sa matuod nga mga Kristohanon​—ang pagwali ug paghimog tinun-an. (Mateo 24:14; 28:19, 20) Sama kang Jesus nga atong Sulondan, buot natong mapuliki kaayo niining nagaluwas-ug-kinabuhi nga buluhaton. Sa unsang paagi atong ikapakita nga hinungdanon kini kanato? Ang kadaghanang alagad sa Diyos bug-os-kasingkasing nga nagsangyaw ingong mga magmamantala sa kongregasyon. Gihikay sa pipila ang ilang kahimtang aron makapayunir o mahimong misyonaryo. Kay nakasabot nga hinungdanon ang espirituwal nga mga tumong, daghang ginikanan nagdasig sa ilang mga anak sa paghimo sa bug-os-panahong pag-alagad nga ilang karera. Nakita ba sa masibotong mga magmamantala sa Gingharian ang kaayohan sa ilang paghago sa ministeryo? Segurado! Ang bug-os-kalag nga pag-alagad kang Jehova maoy seguradong dalan ngadto sa malipayon, matagbawon, ug tugob sa mga panalangin nga kinabuhi.​—Proverbio 10:22.

²³ Ang daghan kanato kinahanglang mogugol ug daghang oras sa sekular nga trabaho aron makabuhi sa atong pamilya. Hinumdomi nga buot ni Jehova nga makakita kitag kaayohan sa atong paghago. Sa dihang ipahiuyon nato ang atong tinamdan ug mga buhat sa iyang panghunahuna ug mga prinsipyo, makasinati kitag katagbawan sa atong trabaho. Busa, magmadeterminado kita nga dili itugot nga ang atong sekular nga trabaho makababag sa atong pangunang buluhaton​—ang pagmantala sa maayong balita sa Gingharian sa Diyos. Pinaagi sa pag-una niini diha sa atong kinabuhi, gipakita nato ang atong gugma kang Jehova ug busa makapabilin kita sa iyang gugma.