1, 2. Nalangkit ka sa unsang proyekto sa pagtukod, ug nganong hinungdanon kaayo ang kalidad sa imong trabaho?

NAGHAGO ka pag-ayo sa usa ka gitukod nga proyekto. Dugaydugay na kining gisugdan ug padayon pa kining gitukod. Hangtod karon, ang trabaho may pagkalisod apan makapatagbaw. Bisag unsay mahitabo, determinado kang dili moundang o maglangaylangay kay ang imong kinabuhi ug kaugmaon maapektohan sa kalidad sa imong trabaho. Ngano? Kay ikaw man ang gitukod!

² Gipasiugda sa tinun-ang si Judas ang pagtukod nato sa atong kaugalingon. Sa giawhag niya ang mga Kristohanon nga ‘magpabilin sa gugma sa Diyos,’ iyang gipadayag usab nianang tekstoha kon unsay ilabinang makatabang kanato sa paghimo niana: “Pinaagi sa pagpalig-on sa inyong kaugalingon diha sa inyong labing balaan nga pagtuo.” (Judas 20, 21) Unsay pipila ka paagi nga mapalig-on pa nimo ang imong pagtuo aron makapabilin ka sa gugma sa Diyos? Atong hisgotan ang tulo ka bahin sa pagpanukod nga makatabang sa pagpalig-on pa sa imong pagtuo.

3-5. (a) Buot ni Satanas nga limbongan ka aron imong isipon nga unsa man ang mga balaod ni Jehova? (b) Unsay angay natong isipon bahin sa mga balaod sa Diyos, ug unsay angay natong bation tungod niana? Iilustrar.

³ Una sa tanan, angay natong lig-onon ang atong pagtuo sa mga balaod sa Diyos. Sa lakat sa pagtuon niining libroha, inyong  nahisgotan ang matarong nga mga balaod ni Jehova bahin sa panggawi. Unsay imong hunahuna bahin niana? Buot ni Satanas nga limbongan ka aron imong isipon nga mapig-oton ug mapintason ang mga balaod, mga prinsipyo, ug mga sukdanan ni Jehova. Gigamit niya kining taktikaha sukad nga nagmalamposon kini didto sa Eden. (Genesis 3:1-6) Malimbongan ka ba sa iyang taktika? Depende kana sa imong tinamdan.

⁴ Ingong ilustrasyon: Samtang nagsuroysuroy ka sa usa ka nindot nga parke, imong namatikdan ang lig-on ug habog nga koral sa usa ka bahin sa parke. Maorag matahom ang luyo sa koral. Sa sinugdan, nagtuo ka tingali nga ang koral way kapuslanan ug naghikaw sa imong kagawasan. Apan, sa imong paglili niini, nakakita kag mabangis nga leyon nga nangukoy sa usa ka tukbonon! Imo karong nasabtan nga panalipod diay ang koral. May peligroso bang manunukob nga nangukoy nimo karon? Ang Pulong sa Diyos nagpasidaan: “Hupti ninyo ang maayong panghunahuna, magmabinantayon. Ang inyong kaaway, ang Yawa, nagasuroysuroy sama sa usa ka leyon nga nagangulob, nga nagapangitag matukob.”​—1 Pedro 5:8.

⁵ Bangis nga manunukob si Satanas. Kay dili man gusto ni Jehova nga kita matukob ni Satanas, naghatag Siyag mga balaod nga manalipod kanato batok sa daghan niyang “malipatlipatong kaugdahan.” (Efeso 6:11) Busa dihang mamalandong kita sa mga balaod sa Diyos, angay natong isipon nga kana maoy pagpahayag sa gugma sa atong langitnong Amahan. Kon kanay atong pag-isip, mobati kitag kasegurohan ug kalipay. Ang tinun-ang si Santiago misulat: “Siya nga magasud-ong pag-ayo sa hingpit nga balaod nga iya sa kagawasan ug magpadayon diha niana . . . malipayon siya sa iyang pagbuhat niini.”​—Santiago 1:25.

6. Unsay labing maayong paagi aron molig-on ang imong pagtuo sa matarong nga mga balaod ug prinsipyo sa Diyos? Paghatag ug pananglitan.

⁶ Ang pagtuman sa mga sugo sa Diyos diha sa atong pagkinabuhi maoy labing maayong paagi aron malig-on ang atong pagtuo sa Maghahatag-Balaod ug sa kamaalamon sa iyang mga balaod. Pananglitan, ang “balaod ni Kristo” naglakip sa sugo ni  Jesus nga tudloan ang uban sa “tanang butang nga [iyang] gisugo.” (Galacia 6:2; Mateo 28:19, 20) Giisip usab nga seryoso sa mga Kristohanon ang sugo nga magkatigom alang sa pagsimba ug sa makapalig-ong panag-ubanay. (Hebreohanon 10:24, 25) Ang awhag bahin sa regular ug kinasingkasing nga pag-ampo kang Jehova nalakip usab sa mga sugo sa Diyos. (Mateo 6:5-8; 1 Tesalonica 5:17) Samtang gituman nato kanang mga sugoa diha sa atong pagkinabuhi, mas masabtan nato nga kana maoy mahigugmaong mga lagda ug mobati kitag kalipay ug katagbawan nga dili gayod nato makaplagan bisan asa niining gubot nga kalibotan. Samtang mamalandong ka nga ikaw nakabenepisyo sa pagsunod sa mga balaod sa Diyos, dili ba molig-on pa ang imong pagtuo niana?

7, 8. Sa unsang paagi ang Pulong sa Diyos nagpasalig niadtong nabalaka nga basin sila mapakyas sa pagtuman sa pagkamatarong paglabay sa katuigan?

⁷ Mabalaka usahay ang pipila nga basin lisod na kaayong tumanon ang mga balaod sa Diyos paglabay sa katuigan. Sila nahadlok nga basin sila mapakyas. Kon kanay imong pagbati, hinumdomi kining mga pulonga: “Ako, si Jehova, mao ang imong Diyos, ang Usa nga nagtudlo kanimo aron ikaw makabaton ug kaayohan, ang Usa nga nagpalakaw kanimo sa dalan nga angay mong pagalaktan. Oh kon ikaw mamati lamang unta gayod sa akong mga sugo! Niana ang imong kalinaw mahimong  sama gayod sa usa ka suba, ug ang imong pagkamatarong sama sa mga balod sa dagat.” (Isaias 48:17, 18) Imo bang napamalandong sukad kon unsa ka makapalig-on kanang mga pulonga?

⁸ Nagpahinumdom kanato si Jehova nianang tekstoha nga kita makabatog kaayohan kon ato siyang sugton. Siya nagsaad ug duha ka matang sa panalangin kon himoon nato kana. Una, ang atong kalinaw mahisamag suba​—malinawon, madagayaon, kanunayng nag-agos. Ikaduha, ang atong pagkamatarong mahisamag mga balod sa dagat. Kon mobarog ka sa baybayon ug mosud-ong sa way-undang nga pag-abot ug paglapya sa mga balod, imong bation nga maorag magpabilin ka hangtod sa hangtod. Nag-ingon si Jehova nga ang imong pagkamatarong mahisama niana. Basta maningkamot ka nga magmatinumanon kaniya, molampos ka gayod! (Salmo 55:22) Dili ba ang maong makapalipay nga mga saad makapalig-on sa imong pagtuo kang Jehova ug sa matarong niyang mga balaod?

9, 10. (a) Nganong ang pagkahamtong maoy talagsaong tumong alang sa mga Kristohanon? (b) Sa unsang paagi ang pagbatog espirituwal nga panghunahuna makapalipay kanato?

⁹ Ang ikaduhang bahin sa imong pagtukod gipadayag niining inspiradong mga pulong: “Manag-uswag kita ngadto sa pagkahamtong.” (Hebreohanon 6:1) Ang pagkahamtong maoy talagsaong tumong alang sa usa ka Kristohanon. Lahi sa kahingpitan nga dili nato makab-ot karon, ang pagkahamtong mahimong makab-ot. Dugang pa, samtang magkahamtong ang mga Kristohanon, sila magmalipayon sa pag-alagad kang Jehova. Ngano?

¹⁰ Isipon sa usa ka hamtong nga Kristohanon ang mga butang sumala sa punto-debista ni Jehova. (Juan 4:23) Si Pablo misulat: “Kadtong nahiuyon sa unod nagtumong sa ilang mga hunahuna diha sa mga butang sa unod, apan kadtong nahiuyon sa espiritu diha sa mga butang sa espiritu.” (Roma 8:5) Ang pagbatog unodnong panghunahuna dili kaayo makapalipay kay kini lagmit mahunahunaon sa kaugalingon, kortog panghunahuna, ug materyalistiko. Apan ang pagbatog espirituwal nga  panghunahuna makapalipay kay kini nasentro kang Jehova, “ang malipayong Diyos.” (1 Timoteo 1:11) Ang usa ka hamtong nga Kristohanon ikag nga magpahimuot kang Jehova ug magmalipayon bisan pag nailalom sa pagsulay. Ngano? Ang mga pagsulay mohatag kanatog kahigayonan sa pagpamatuod nga si Satanas bakakon ug sa pag-ugmad sa integridad, nga makapalipay sa atong langitnong Amahan.​—Proverbio 27:11; Santiago 1:2, 3.

11, 12. (a) Unsay giingon ni Pablo bahin sa “mga gahom sa pagsabot” sa usa ka Kristohanon, ug unsay kahulogan sa pulong nga gihubad ug ‘nabansay’? (b) Unsang pagbansay ang gikinahanglan sa lawas aron kini mahamtong ug mahanas?

¹¹ Maugmad ang Kristohanong pagkahamtong pinaagig pagbansay. Tagda kining bersikuloha: “Ang gahing pagkaon maoy alang sa mga tawong hamtong, alang kanila nga pinaagi sa paggamit nakabansay sa ilang mga gahom sa pagsabot aron sa pag-ila sa maayo ug sa daotan.” (Hebreohanon 5:14) Sa naghisgot si Pablo nga ang atong mga gahom sa pagsabot ‘nabansay,’ iyang gigamit ang Gregong pulong nga maoy kasagarang madungog diha sa mga gimnasyum sa Gresya sa unang siglo, kay kini mahubad nga ‘nabansay samag usa ka gymnast.’ Karon hunahunaa kon unsay nalangkit sa maong pagbansay.

¹² Ang mga bahin sa atong lawas dili pa kontrolado sa dihang kita gipanganak. Pananglitan, ang masuso dili pa antigong mopahimutang sa gagmay niyang mga kamot ug tiil. Busa, magpataka ra siyag warawara sa mga kamot nga maigo pa ang iyang nawong nga makuratan siya ug mapikal. Apan pinaagi sa paggamit sa mga bahin sa lawas, kini anam-anam nga mabansay. Ang masuso sa sinugdan mokamang, ngadtongadto magtuon paglakaw, ug kadugayan modalagan. * Apan komosta ang usa ka gymnast? Inigkakita nimo nga siya magbulobalintong sa hanas ug way-sipyat nga paagi, makahinapos ka gayod nga ang iyang  lawas nahisamag maayog-kondisyon nga makina. Ang maong kahanas dili sulagmang naangkon sa gymnast​—nakab-ot niya kana human sa daghang oras nga pagbansay. Matod sa Bibliya, kana nga pagbansay “may diyutayng kapuslanan.” Pagkamapuslanon pa ang pagbansay sa atong mga gahom sa pagsabot sa espirituwal nga mga butang!​—1 Timoteo 4:8.

13. Sa unsang paagi makabansay kita sa atong mga gahom sa pagsabot?

¹³ Daghan na kitag nahisgotan niining libroha nga makatabang kanimo sa pagbansay sa imong mga gahom sa pagsabot aron padayon kang magmatinumanon kang Jehova ingong hamtong nga Kristohanon. Mainampoong palandonga ang mga prinsipyo ug balaod sa Diyos sa paghimo nimog mga desisyon sa imong adlaw-adlaw nga kinabuhi. Sa matag higayong modesisyon ka, suknaa ang kaugalingon: ‘Unsang mga balaod o prinsipyo sa Bibliya ang nalangkit niini? Sa unsang paagi ikapadapat ko kini? Unsang mga buhata ang makapahimuot sa akong langitnong Amahan?’ (Proverbio 3:5, 6; Santiago 1:5) Ang pagdesisyon sa ingon nga paagi dugang makabansay sa imong mga gahom sa pagsabot ug kana makatabang nga ikaw mahimo ug makapabiling hamtong nga Kristohanon.

14. Unsang gana ang angay natong ugmaron aron motubo kita sa espirituwal, apan unsay atong bantayan?

¹⁴ Dili mohunong ang espirituwal nga pagtubo bisag nakab-ot na ang Kristohanong pagkahamtong. Ang pagtubo mag-agad sa gikaon. Busa si Pablo miingon: “Ang gahing pagkaon maoy alang sa mga tawong hamtong.” Kinahanglang mokaon ka kanunay ug gahing espirituwal nga pagkaon aron molig-on ang imong pagtuo. Kon tukma mong ipadapat ang imong nakat-onan, kana kaalam, ug ang Bibliya nag-ingon: “Ang kaalam  mao ang pangunang butang.” Busa, ugmaron gayod nato ang gana alang sa bililhong mga kamatuoran gikan sa atong Amahan. (Proverbio 4:5-7; 1 Pedro 2:2) Hinuon, ang pagkaadunay kahibalo ug diyosnong kaalam dili katarongan nga kita magmapahitas-on. Susihon nato kanunay ang atong kaugalingon kay ang garbo o ubang kahuyangan mahimong moturok ug motubo sa atong kasingkasing. Si Pablo misulat: “Padayong sulayi kon kamo anaa ba sa pagtuo, padayong pamatud-i kon unsa kamo sa inyong kaugalingon.”​—2 Corinto 13:5.

15. Nganong gikinahanglan ang gugma aron mahimo kitang hamtong nga mga Kristohanon?

¹⁵ Nahuman na tingali ang pagtukod sa balay, apan magpadayon gihapon ang trabaho. Kana nagkinahanglag pagmentinar ug pagreper, ug dugangan tingali kinig kuwarto kon mausab ang kahimtang. Unsay gikinahanglan aron mahimo ug magpabilin kitang hamtong nga Kristohanon? Labaw sa tanan, gugma. Angayng motubo ang atong gugma kang Jehova ug sa mga isigkamagtutuo. Kon wala kitay gugma, way kapuslanan ang tanan natong kahibalo ug mga buhat nga mahisamag makapikal nga kabanha. (1 Corinto 13:1-3) Tungod sa gugma, kita makakab-ot sa Kristohanong pagkahamtong ug magpadayon sa pagtubo.

16. Unsang matang sa pangisip ang gidasig ni Satanas ug unsang panalipod ang gitagana ni Jehova?

¹⁶ Atong hisgotan ang usa pa ka bahin sa imong pagtukod. Aron mahimo kang tinuod nga sumusunod ni Kristo, angay mong bantayan ang imong pangisip. Si Satanas, ang magmamando niining kalibotana, batid kaayo sa pag-impluwensiya sa pangisip sa mga tawo aron sila mawad-ag kadasig, pagsalig, ug paglaom. (Efeso 2:2) Peligroso ang maong pangisip alang sa usa ka Kristohanon sama ra sa bukbok alang sa balay nga gama sa kahoy. Ikalipay nga si Jehova nagtaganag usa ka hinungdanong panalipod​—ang paglaom.

17. Sa unsang paagi gipakita sa Pulong sa Diyos ang kahinungdanon sa paglaom?

¹⁷ Gihisgotan sa Bibliya ang lainlaing bahin sa espirituwal  nga armadura nga atong gikinahanglan sa pagpakigbisog kang Satanas ug niining kalibotana. Usa ka hinungdanong bahin sa armadura mao ang helmet, “ang paglaom sa kaluwasan.” (1 Tesalonica 5:8) Nasayod ang sundalo sa kapanahonan sa Bibliya nga siya dili makadugay sa pagpakiggubat kon wala siyay helmet. Ang helmet, nga kasagarang ginama sa metal ug gihal-op sa kalo nga gama sa panit sa mananap, magsagang sa mga paghapak sa ulo aron dili kini masamad. Ingon nga ang helmet panalipod sa ulo, ang paglaom panalipod usab sa imong kaisipan.

18, 19. Unsay gihatag nga panig-ingnan ni Jesus bahin sa paghupot ug paglaom, ug sa unsang paagi makasundog kita kaniya?

¹⁸ Si Jesus mao ang pangunang panig-ingnan kon bahin sa paghupot ug paglaom. Hinumdomi kon unsay iyang giantos sa kataposang gabii sa iyang pagkinabuhi sa yuta. Usa ka suod nga higala nagbudhi kaniya tungod sa salapi. Ang lain pang higala milimod nga nakaila kaniya. Gibiyaan siya sa uban ug sila nangalagiw. Gisalikway siya sa iyang mga katagilungsod, nga naninggit pa nga ipapatay siya sa mga Romanong sundalo pinaagi sa pagsakit kaniya hangtod mamatay. Kita makaingon gayod nga mas bug-at ang mga pagsulay nga gisagubang ni Jesus kay sa ato tingaling masagubang. Unsay nakatabang kaniya? Ang Hebreohanon 12:2 nagtubag: “Tungod sa kalipay nga gibutang sa iyang atubangan siya nag-antos sa estaka sa pagsakit, nga wala igsapayan ang kaulaw, ug milingkod sa tuong kamot sa trono sa Diyos.” Gihunahuna kanunay ni Jesus ang “kalipay nga gibutang sa iyang atubangan.”

¹⁹ Unsang kalipay ang gibutang sa atubangan ni Jesus? Aw, siya nahibalo nga siya makabalaan sa ngalan ni Jehova pinaagi sa pag-antos sa kalisdanan. Makahatag siyag kinalabwang pamatuod nga si Satanas bakakon. Ang maong paglaom nakahatag gayod kang Jesus ug kinadak-ang kalipay! Nahibalo usab siya nga si Jehova dagayang magaganti sa iyang pagkamatinumanon, nga hapit na ang talagsaong panahon nga siya mahiusa pag-usab sa iyang Amahan. Gihunahuna kanunay ni Jesus ang maong makapalipay nga paglaom latas sa kinalisdang mga panahon. Angay usab natong buhaton kana. May gibutang usab  nga kalipay sa atong atubangan. Matag usa kanato gihatagan ni Jehova ug dungganong pribilehiyo nga makatabang pagbalaan sa iyang dakong ngalan. Kita makapamatuod nga si Satanas bakakon pinaagi sa pagpili kang Jehova nga atong Soberano ug pagpabiling luwas diha sa gugma sa atong Amahan bisag unsa pang mga pagsulay ug tentasyon nga atong sagubangon.

20. Unsay makatabang kanimo sa paghupot sa positibo ug malaomong panghunahuna?

²⁰ Si Jehova dili lang andam kondili maikagon usab nga moganti sa matinumanon niyang mga alagad. (Isaias 30:18; Malaquias 3:10) Malipayon niyang tagbawon ang hustong mga tinguha sa kasingkasing sa iyang mga alagad. (Salmo 37:4) Busa isentro kanunay ang imong hunahuna sa paglaom nga matuman ang mga saad sa Diyos. Ayaw gayod padaog sa negatibo, daotan, ug tinuis nga panghunahuna sa daang kalibotan ni Satanas. Kon imong mamatikdan nga ang espiritu niining kalibotana inanayng nakayuhot sa imong kaisipan o kasingkasing, ampo nga mainiton kang Jehova alang sa “kalinaw sa Diyos nga labaw sa tanang panghunahuna.” Kanang hinatag-sa-Diyos nga kalinaw magbantay sa imong kasingkasing ug mga gahom sa pangisip.​—Filipos 4:6, 7.

21, 22. (a) Unsa ang mahimayaong paglaom sa “dakong panon”? (b) Unsang bahina sa Kristohanong paglaom ang labing hinungdanon kanimo, ug unsay imong determinasyon?

²¹ Pagkakulbahinam kana nga paglaom nga pamalandongon!  Kon ikaw bahin sa “dakong panon” nga ‘makalabang sa dakong kasakitan,’ hunahunaa ang kinabuhi nga hapit na nimong matagamtam. (Pinadayag 7:9, 14) Kay si Satanas ug iyang mga demonyo nangalaglag na, ikaw mobatig kahupayan nga dili hisabtan sa pagkakaron. Kay kinsa bay nakasinati sukad ug kinabuhi nga walay daotang impluwensiya ni Satanas? Kay wala nay kapit-osan, makalilipay gayod ang paghimo niining yutaa nga paraiso ubos sa pagmando ni Jesus ug sa iyang 144,000 ka kaubang mga magmamando sa langit! Makapahinam gayod ang kalaoman nga mahanaw na ang tanang sakit ug kaluyahon, nga sugaton ang nabanhaw natong mga minahal, nga magkinabuhi sumala sa kabubut-on sa Diyos alang kanato! Samtang mag-anam kita pagkahingpit, ang mas dakong ganti magkaduol gayod, ang saad nga gipadayag sa Roma 8:21​—ang “mahimayaong kagawasan sa mga anak sa Diyos.”

²² Buot ni Jehova nga makakab-ot ka ug mas dakong kagawasan kay sa imong mahanduraw. Ang dalan paingon niana nga kagawasan nagdepende sa pagkamasinugtanon. Dili ba angay kang maningkamot karon nga magmasinugtanon kang Jehova adlaw-adlaw? Nan, padayong lig-ona ang imong labing balaan nga pagtuo, aron makapabilin ka sa gugma sa Diyos hangtod sa kahangtoran!