Ang pagkahimong higala sa Diyos mao ang kinamaayohang butang nga mahitabo kanimo. Tudloan ka sa Diyos kon sa unsang paagi magmalipayon ug mobating luwas; ipahigawas ka niya gikan sa daghang sayop nga mga tinuohan ug makadaot nga mga buhat. Maminaw siya sa imong mga pag-ampo. Tabangan ka niya nga makabaton ug kalinaw sa kahiladman ug pagsalig. (Salmo 71:5; 73:28) Paluyohan ka sa Diyos panahon sa kalisdanan. (Salmo 18:18) Ug ang Diyos nagtanyag kanimo sa iyang gasa nga walay-kataposang kinabuhi.​—Roma 6:23.

Samtang ikaw makigsuod sa Diyos, ikaw masuod sa mga higala sa Diyos. Mahimo usab sila nga imong mga higala. Sa tinuoray, sila mahisamag mga igsoong lalaki ug babaye alang kanimo. Malipay sila nga motudlo kanimo bahin sa Diyos ug motabang ug modasig kanimo.

Kita dili katumbas sa Diyos. Samtang imong tinguhaon ang panaghigalaay uban sa Diyos, kinahanglang imong masabtan ang usa ka hinungdanong kamatuoran. Ang panaghigalaay uban sa Diyos dili panaghigalaay tali sa mga managsama. Siya mas tigulang ug mas maalamon kaayo ug mas gamhanan kay kanato. Siya ang atong may-katungod nga Magmamando. Busa kon kita buot nga mahimong iyang higala, kita kinahanglang maminaw kaniya ug mobuhat sa iyang ipabuhat kanato. Kini mosangpot kanunay sa atong kaayohan.​—Isaias 48:18.