Dili tugotan ni Jehova ang mga tawong daotan sa pagdaot sa Paraiso. Ang iyang mga higala lamang ang magpuyo didto. Unsay mahitabo sa mga tawong daotan? Aron masayran ang tubag, tagda ang tinuod nga estorya ni Noe. Nagkinabuhi si Noe libolibong katuigan na kanhi. Maayo siyang tawo ug kanunayng nanlimbasog sa pagbuhat sa kabubut-on ni Jehova. Apan ang ubang mga tawo sa yuta nagbuhat ug daotang mga butang. Busa giingnan ni Jehova si Noe nga magpahinabo Siya ug lunop aron laglagon kadtong tanang tawong daotan. Giingnan niya si Noe nga magbuhat ug arka aron siya ug ang iyang pamilya dili mamatay inig-abot sa Lunop.​—Genesis 6:9-18.

Si Noe ug ang iyang pamilya nagbuhat ug arka. Gipasidan-an ni Noe ang mga tawo nga umaabot ang Lunop, apan wala sila maminaw kaniya. Nagpadayon sila pagbuhat ug daotang mga butang. Pagkahuman sa arka, gipasulod ni Noe ang mga hayop, ug siya ug ang iyang pamilya nanulod usab. Dayon gipahinabo ni Jehova ang kusog nga unos. Nagbunok sulod sa 40 ka adlaw ug 40 ka gabii. Gisanapan ug tubig ang tibuok yuta.​—Genesis 7:7-12.

 Nangamatay ang mga tawong daotan, apan si Noe ug ang iyang pamilya naluwas. Giluwas sila ni Jehova latas sa Lunop ngadto sa yuta nga nahinloan na sa pagkadaotan. (Genesis 7:22, 23) Nag-ingon ang Bibliya nga sa makausa pa moabot ang panahon nga laglagon ni Jehova kadtong modumili sa pagbuhat ug matarong. Ang maayong mga tawo dili laglagon. Sila mabuhi sa walay-kataposan sa Paraisong yuta.​—2 Pedro 2:5, 6, 9.

Karong adlawa daghang tawo ang nagbuhat ug daotan. Puno sa kasamok ang kalibotan. Sublisubling gipadala ni Jehova ang iyang mga Saksi aron pasidan-an ang mga tawo, apan ang kadaghanan dili buot maminaw sa mga pulong ni Jehova. Dili sila gustong mag-usab sa ilang mga dalan. Dili sila gustong modawat kon unsay giingon sa Diyos nga husto ug sayop. Unsay mahitabo niining mga tawhana? Mag-usab kaha sila sa umaabot? Daghan ang dili gayod mag-usab. Moabot ang panahon nga ang mga tawong daotan laglagon ug dili na gayod mabuhi pag-usab.​—Salmo 92:7.

Ang yuta dili laglagon; kini himoong usa ka paraiso. Kadtong mahimong mga higala sa Diyos mabuhi sa walay kataposan sa Paraiso sa yuta.​—Salmo 37:29.