Kon ikaw buot nga mahimong higala sa Diyos, kinahanglang tumanon nimo ang relihiyon nga giuyonan sa Diyos. Matod ni Jesus nga “ang matuod nga mga magsisimba” mosimba sa Diyos uyon sa “kamatuoran.” (Juan 4:23, 24) Dunay usa lamang ka hustong paagi sa pagsimba sa Diyos. (Efeso 4:4-6) Ang matuod nga relihiyon motultol sa walay kataposang kinabuhi, ug ang bakak nga relihiyon motultol sa kalaglagan.​—Mateo 7:13, 14.

Imong maila ang matuod nga relihiyon pinaagi sa pagpaniid sa mga tawo nga nagatuman niana. Tungod kay si Jehova maayo, kadtong iyang tinuod nga mga magsisimba maoy maayo gayong mga tawo. Sama nga ang maayong punoan sa kahel mamungag maayong mga kahel, ang matuod nga relihiyon magpatunghag maayong mga tawo.​—Mateo 7:15-20.

Ang mga higala ni Jehova adunay dulot nga pagtahod sa Bibliya. Nasayod sila nga ang Bibliya gikan sa Diyos. Tugotan nila ang gisulti niini nga mogiya sa ilang mga kinabuhi, mosulbad sa ilang mga suliran, ug motabang nila nga mahibalo bahin sa Diyos. (2 Timoteo 3:16) Maningkamot sila sa pagbuhat kon unsay ilang isangyaw.

 Ang mga higala ni Jehova magpakitag gugma sa usag usa. Nagpakitag gugma si Jesus sa mga tawo pinaagi sa pagtudlo kanila bahin sa Diyos, pinaagi sa pagtambal sa mga masakiton. Kadtong nagatuman sa matuod nga relihiyon magpakita usab ug gugma sa uban. Sama kang Jesus, dili nila tamayon ang mga kabos o kadtong iya sa laing etnikong grupo. Matod ni Jesus nga mailhan sa mga tawo ang iyang mga tinun-an pinaagi sa gugma nga ilang ipakita sa usag usa.​—Juan 13:35.

Ang mga higala sa Diyos magpasidungog sa ngalan sa Diyos, nga Jehova. Kon ang usa ka tawo dili mogamit sa imong ngalan, kana bang tawhana mahimo nimong suod nga higala? Dili! Kon kita adunay higala, atong gamiton ang iyang ngalan ug kita mosultig maayong mga butang bahin nianang higalaa ngadto sa uban. Busa kadtong buot mahimong mga higala sa Diyos kinahanglang mogamit sa iyang ngalan ug mosulti bahin kaniya ngadto sa uban. Buot ni Jehova nga atong buhaton kana.​—Mateo 6:9; Roma 10:13, 14.

Sama kang Jesus, ang mga higala sa Diyos motudlo sa mga tawo bahin sa Gingharian sa Diyos. Ang Gingharian sa Diyos mao ang langitnong kagamhanan nga maghimo sa yuta nga usa ka paraiso. Ang mga higala sa Diyos mopaambit niining maayong balita bahin sa Gingharian sa Diyos ngadto sa uban.​—Mateo 24:14.

Ang mga Saksi ni Jehova naningkamot nga mahimong mga higala sa Diyos. Nagtahod sila sa Bibliya ug nahigugma sa usag usa. Naggamit ug nagpasidungog usab sila sa ngalan sa Diyos ug nagtudlo sa uban bahin sa Gingharian sa Diyos. Ang mga Saksi ni Jehova nagtuman sa matuod nga relihiyon sa yuta karong adlawa.