Ang daotang mga butang nga nagakahitabo karon sa yuta nagpakitang duol na ang Paraiso. Nag-ingon ang Bibliya nga atong makita ang makalilisang nga mga panahon sa dili pa moabot ang Paraiso. Nagkinabuhi kita karon sa maong mga panahon! Ania ang pipila ka mga butang nga giingon sa Bibliya nga mahitabo:

Dagkong mga gubat. “Ang nasod motindog batok nasod ug gingharian batok gingharian.” (Mateo 24:7) Kining tagnaa natuman na. Sukad sa tuig 1914, dihay duha ka gubat sa kalibotan ug daghang gogagmay nga mga gubat. Milyonmilyong tawo ang nangamatay tungod niini.

Pagdagsang sa sakit. Aduna unyay ‘mga kamatay sa lainlaing dapit.’ (Lucas 21:11) Natuman ba kini? Oo. Ang kanser, sakit sa kasingkasing, tesis, malarya, AIDS, ug ubang mga sakit nakapatay ug milyonmilyong tawo.

Kakulang sa pagkaon. Sa tibuok yuta may mga tawong dili igo ang pagkaon. Milyonmilyong tawo ang nangamatay sa gutom kada tuig. Kini maoy laing ilhanan nga moabot na ang Paraiso sa dili madugay. Ang Bibliya nag-ingon: “Aduna unyay mga kakulang sa pagkaon.”​—Marcos 13:8.

 Mga linog. ‘Aduna unyay . . . mga linog sa lainlaing dapit.’ (Mateo 24:7) Natuman usab kini sa atong panahon. Kapin sa usa ka milyong tawo ang nangamatay sa mga linog sukad sa 1914.

Daotang mga tawo. Ang mga tawo mahimong “mga mahigugmaon sa salapi” ug “mga mahigugmaon sa kaugalingon.” Sila mahimong “mga mahigugmaon sa kalipayan inay nga mga mahigugmaon sa Diyos.” Ang mga anak mahimong “dili-masinugtanon sa mga ginikanan.” (2 Timoteo 3:1-5) Dili ka ba mouyon nga dunay daghang tawo nga ingon niana karong adlawa? Wala silay pagtahod sa Diyos, ug ilang samokon kadtong maningkamot sa pagkahibalo bahin sa Diyos.

Krimen. Aduna unyay “pag-uswag sa kalapasan.” (Mateo 24:12) Lagmit mouyon ka nga ang krimen mas grabe kay sa nangaging katuigan. Bisan diin ang mga tawo nameligrong kawatan, limbongan, o pasakitan.

Kining tanan nagpakitang duol na ang Gingharian sa Diyos. Nag-ingon ang Bibliya: “Inigkakita ninyo niining mga butanga nga magakahitabo, hibaloi nga ang gingharian sa Diyos duol na.” (Lucas 21:31) Unsa ang Gingharian sa Diyos? Kini ang langitnong kagamhanan sa Diyos nga magpatunghag Paraiso niining yutaa. Pulihan sa Gingharian sa Diyos ang tawhanong mga kagamhanan.​—Daniel 2:44.