Ikaw makakat-on bahin kang Jehova pinaagi sa pagbasa sa Bibliya. Dugay na kanhi ang Diyos nagpili ug pipila ka tawo nga maoy mosulat sa iyang mga hunahuna. Kadto nga mga sinulat gitawag ug Bibliya. Karong adlawa kita makakat-on bahin sa Diyos pinaagi sa pagbasa sa Bibliya. Tungod kay ang Bibliya naundan sa pulong, o mensahe, ni Jehova, gitawag usab kini nga Pulong sa Diyos. Makatuo kita sa gisulti sa Bibliya kay si Jehova dili gayod mamakak. “Imposible sa Diyos nga mamakak.” (Hebreohanon 6:18) Ang Pulong sa Diyos naundan sa kamatuoran.​—Juan 17:17.

Ang Bibliya maoy usa sa labing bililhong mga gasa sa Diyos alang kanato. Sama kinig usa ka sulat gikan sa usa ka mahigugmaong amahan ngadto sa iyang mga anak. Kini nagsugilon kanato bahin sa saad sa Diyos nga bag-ohon ang yuta ngadto sa usa ka kahibulongang dapit nga puy-an​—usa ka paraiso. Kini nagsugilon kanato sa iyang gibuhat sa nangagi, sa iyang ginabuhat karon, ug sa iyang buhaton sa umaabot alang sa iyang matinumanong mga anak. Motabang usab kini kanato sa pagsulbad sa atong mga suliran ug sa pagkaplag ug kalipay.​—2 Timoteo 3:16, 17.

 Ang mga Saksi ni Jehova maoy mga higala sa Diyos; tabangan ka nila nga makasabot sa gitudlo sa Bibliya. Sultihi lang sila nga ikaw gustong magtuon sa Bibliya. Dili sila magpabayad niini. (Mateo 10:8) Dugang pa, ikaw makatambong sa Kristohanong mga tigom. Gihimo kini sa mga dapit sa pagsimba nga gitawag ug mga Kingdom Hall. Kon ikaw motambong sa Kristohanong mga tigom, kusog nga mouswag ang imong kahibalo bahin sa Diyos.

Ikaw makakat-on bahin sa Diyos gikan sa mga butang nga iyang gihimo. Pananglitan, ang Bibliya nag-ingon: “Gilalang sa Diyos ang mga langit ug ang yuta.” (Genesis 1:1) Sa paglalang ni Jehova sa “mga langit,” iyang gibuhat ang adlaw. Karon unsay gisulti niini kanato bahin sa Diyos? Kini nagsugilon kanato nga si Jehova adunay dakong gahom. Siya lamang ang makahimog usa ka butang nga ingon ka puwersado sa adlaw. Nagsulti usab kini kanato nga si Jehova maalamon, kay nagkinahanglag kaalam ang pagbuhat sa adlaw, nga maoy naghatag kainit ug kahayag ug dili gayod mapalong.

Ang kalalangan ni Jehova nagpakita nga siya nahigugma kanato. Hunahunaa lamang ang tanang nagkalainlaing matang sa mga prutas nga ania sa yuta. Mahimo ra man nga usa lamang ka prutas ang itagana ni Jehova kanato​—o kaha wala. Hinunoa, gihatagan kita ni Jehova ug daghang matang sa mga prutas uban ang nagkadaiyang mga porma, gidak-on, kolor, ug kalami. Nagpakita kini nga si Jehova maoy Diyos kinsa dili lamang mahigugmaon kondili mahinatagon kaayo ug mahunahunaon ug maluloton usab.​—Salmo 104:24.