Minahal nga mga Igsoon:

Ang atong gugma sa Diyos ug sa mga tawo magpalihok nato nga ‘adtoon ang mga tawo sa tanang kanasoran ug tudloan sila aron mahimong mga tinun-an ug bawtismohan sila.’ (Mat. 28:​19, 20; Mar. 12:​28-31) Ang masakripisyohon nga gugma dako kaayog epekto. Makatandog ni sa kasingkasing niadtong “nakiling sa pagdawat sa kamatuoran nga motultol sa kinabuhing walay kataposan.”—Buh. 13:48.

Sa una, nagpokus ta sa pag-memorize sa atong giandam nga mga presentasyon ug sa pagbilin ug mga literatura. Karon, kinahanglan natong pauswagon ang atong paagi sa pagpakig-estorya sa mga tawo. Gusto natong magpakitag gugma sa uban pinaagi sa paghisgot ug mga topiko nga makapainteres kanila. Sa ato pa, kinahanglang andam tang mag-adjust ug hunahunaon nato pag-ayo ang gikabalak-an ug interes sa mga tawo. Sa unsang paagi makatabang ni nga brosyur sa paghimo niana?

Ang brosyur naay 12 ka leksiyon nga nagpasiugda sa mga hiyas nga kinahanglan natong ugmaron aron makapakita tag gugma ug makahimog tinun-an. Ang matag leksiyon gibase sa usa ka asoy sa Bibliya diin si Jesus o ang laing ebanghelisador sa unang siglo nagpakitag espesipikong hiyas diha sa ministeryo. Ang tumong, dili aron mag-memorize ug mga presentasyon, kondili aron mangitag mga paagi nga makapakita tag gugma sa mga tawo. Bisag ang matag hiyas gikinahanglan sa tanang bahin sa atong ministeryo, konsiderahon nato kon sa unsang paagi ang espesipikong mga hiyas ilabinang gikinahanglan dihang magsugod ug panag-estorya, magbalikduaw, o magdumalag pagtuon sa Bibliya.

Samtang imong konsiderahon ang matag leksiyon, hunahunaa pag-ayo kon sa unsang paagi mapakita nimo ang hiyas nga gihisgotan dihang makig-estorya ka sa mga tawo sa inyong lugar. Paningkamoti nga molalom ang imong gugma kang Jehova ug sa mga tawo. Daghang paagi ang makatabang nimo nga makab-ot ang imong tumong sa paghimog tinun-an. Pero labaw sa tanan, ang gugma ang makatabang nimo.

Gipabilhan namo ang dakong pribilehiyo nga nagkahiusa ta sa pag-alagad. (Sof. 3:9) Hinaot dagaya kang panalanginan ni Jehova samtang padayon kang nagpakitag gugma sa mga tawo ug naghimog mga tinun-an!