Ikatulong adlaw na sukad si Natanael nahimong usa sa unang mga tinun-an ni Jesus. Mibiyahe si Jesus ug ang iyang bag-ong mga tinun-an paamihanan padulong sa ilang pinuy-anan, sa distrito sa Galilea. Moadto sila sa lungsod sa Cana, diin nagpuyo si Natanael. Ang Cana naa sa kabungtoran sa amihanan sa Nasaret, diin nagdako si Jesus. Giimbitar sila sa kombira sa kasal sa Cana.

Miadto sab sa kasal ang inahan ni Jesus. Kay higala man si Maria sa pamilya sa gikasal, lagmit mitabang siya sa pag-atiman sa daghang bisita. Busa nakamatikod dayon siya nga hapit nang mahurot ang bino, maong iyang giingnan si Jesus: “Wala na silay bino.”—Juan 2:3.

Morag mao toy paagi ni Maria sa pagsulti aron solusyonan ni Jesus ang problema. Si Jesus miingon: “Unsay atong labot niana?” (Juan 2:4) Ingong Hari nga gipili sa Diyos, ang angayng buhaton ni Jesus mao ang gisugo sa iyang Amahan sa langit, dili ang sugo sa iyang pamilya o mga higala. Busa gisalig ni Maria sa iyang anak kon unsay angayng himoon, ug giingnan ang mga tigsilbi: “Buhata ninyo bisag unsay iyang isulti.”—Juan 2:5.

Dunay unom ka banga, ang matag usa masudlag kapin sa 40 litros nga tubig. Gisugo ni Jesus ang mga tigsilbi: “Pun-ag tubig ang mga banga.” Dayon si Jesus miingon: “Pagkuha mo gikan niini ug dad-a ngadto sa tigdumala sa kombira.”—Juan 2:7, 8.

Ang tigdumala sa kombira mibilib sa maayong kalidad sa bino pero wala siya masayod nga nahimo to pinaagig milagro. Iyang giingnan ang lalaki nga gikasal: “Ang uban magdalit una ug maayong bino, ug dihang mangahubog na ang mga tawo, ayha pa nila idalit ang dili maayong bino. Apan ikaw, karon pa nimo gidalit ang maayong bino.”—Juan 2:10.

Kini ang unang milagro nga gihimo ni Jesus. Dihang nakita kini sa bag-ong mga tinun-an, milig-on ang ilang pagtuo kaniya. Dayon si Jesus, iyang inahan, ug iyang mga igsoong lalaki miadto sa siyudad sa Capernaum sa amihanan-kasadpan sa baybayon sa Dagat sa Galilea.