LEKSIYON 04
Kinsa ang Diyos?
Halos sa tibuok kasaysayan, ang mga tawo nagsimbag daghang diyos. Pero ang Bibliya naghisgot ug usa ka Diyos nga “mas labaw kay sa ubang mga diyos.” (2 Cronicas 2:5) Kinsa siya? Ug nganong mas labaw siya sa tanang diyos nga ginasimba sa mga tawo? Niini nga leksiyon, sayra kon sa unsang paagi ipailaila niini nga Diyos ang iyang kaugalingon kanimo.
1. Unsay ngalan sa Diyos, ug nganong makaseguro ta nga gusto niyang mahibaloan nato ang iyang ngalan?
Gipailaila sa Diyos ang iyang kaugalingon diha sa Bibliya. Siya miingon: “Ako si Jehova. Kana ang akong ngalan.” (Basaha ang Isaias 42:5, 8.) Ang “Jehova” maoy hubad sa Hebreohanong ngalan nga posibleng nagkahulogang “Iyang Ipahinabo nga Mahimong.” Gusto ni Jehova nga mahibalo ta sa iyang ngalan. (Exodo 3:15) Nganong makaingon ta ana? Sa Bibliya, gipasulat niya ang iyang ngalan sa kapig 7,000 ka beses! a Ang ngalang Jehova iya lang sa ‘matuod nga Diyos sa langit ug sa yuta.’—Deuteronomio 4:39.
2. Unsay giingon sa Bibliya bahin kang Jehova?
Ang Bibliya nag-ingon nga sa tanang diyos nga gisimba sa mga tawo, si Jehova lang ang bugtong matuod nga Diyos. Ngano? Naay daghang rason. Si Jehova ang kinalabwan ug awtoridad, ug siya lang “ang Labing Hataas ibabaw sa tibuok yuta.” (Basaha ang Salmo 83:18.) Siya “ang Labing Gamhanan,” maong naa siyay gahom sa paghimo sa bisan unsa nga iyang gusto. Iyang ‘gilalang ang tanang butang’—ang uniberso ug ang tanang kinabuhi sa yuta. (Pinadayag 4:8, 11) Ug sa tanan nga naay kinabuhi, si Jehova lang ang walay sinugdanan ug walay kataposan.—Salmo 90:2.
TUN-IG DUGANG
Sayra ang kalainan sa mga titulo sa Diyos ug sa iyang espesyal nga ngalan. Dayon sayra kon sa unsang paagi ug kon ngano nga gipaila niya ang iyang ngalan kanimo.
3. Ang Diyos daghag titulo, pero usa ra ang iyang ngalan
Aron imong makita ang kalainan sa titulo ug sa ngalan, i-play ang VIDEO, ug dayon hisgoti ang mosunod nga pangutana:
-
Unsay kalainan sa titulo, sama sa “Ginoo,” ug sa ngalan?
Ang Bibliya nag-ingon nga ang mga tawo nagsimbag daghang diyos ug ginoo. Basaha ang Salmo 136:1-3, ug dayon hisgoti kini nga pangutana:
-
Kinsa “ang Diyos sa mga diyos” ug “ang Ginoo sa mga ginoo”?
4. Gusto ni Jehova nga mahibaloan nimo ang iyang ngalan ug gamiton kana
Unsay pamatuod nga gusto ni Jehova nga mahibaloan nimo ang iyang ngalan? I-play ang VIDEO, ug dayon hisgoti ang mosunod nga mga pangutana:
-
Sa imong hunahuna, gusto ba ni Jehova nga mailhan ang iyang ngalan? Ngano?
Gusto ni Jehova nga gamiton sa mga tawo ang iyang ngalan. Basaha ang Roma 10:13, ug dayon hisgoti kini nga mga pangutana:
-
Unsa ka importante nga gamiton ang ngalang Jehova, nga maoy ngalan sa Diyos?
-
Unsay imong bation kon naay makahinumdom ug mogamit sa imong ngalan?
-
Unsa kahay bation ni Jehova kon gamiton nimo ang iyang ngalan?
5. Gusto ni Jehova nga masuod ka kaniya
Usa ka babaye nga taga-Cambodia nga ginganlag Soten miingon nga dihang nahibaloan niya ang ngalan sa Diyos, gibati niya ang kalipay nga wala pa niya batia sukad. I-play ang VIDEO, ug dayon hisgoti ang mosunod nga pangutana:
-
Sa video, unsay epekto kang Soten dihang nahibaloan niya ang ngalan sa Diyos?
Sa dili pa nimo mahimong higala ang usa ka tawo, sagad sayron una nimo ang iyang ngalan. Basaha ang Santiago 4:8a, ug dayon hisgoti ang mosunod nga mga pangutana:
-
Unsay gidasig ni Jehova nga imong himoon?
-
Sa unsang paagi ang pagkahibalo ug paggamit sa ngalan sa Diyos makatabang nimo nga masuod kaniya?
ANG UBAN MOINGON: “Usa ra ang Diyos, maong dili na importante kon unsay imong itawag niya.”
-
Motuo ba ka nga Jehova ang ngalan sa Diyos?
-
Unsaon nimo pagpatin-aw sa uban nga gusto sa Diyos nga gamiton nato ang iyang ngalan?
SUMARYO
Jehova ang ngalan sa bugtong matuod nga Diyos. Gusto niya nga mahibaloan nato ang iyang ngalan ug gamiton kana aron masuod ta kaniya.
Review
-
Nganong lahi si Jehova sa tanang diyos nga gisimba sa mga tawo?
-
Nganong angay natong gamiton ang ngalan sa Diyos?
-
Unsay nagpamatuod nga gusto ni Jehova nga masuod ka kaniya?
SUSIHA
Sayra ang lima ka lig-ong ebidensiya nga nagpamatuod nga naa gyoy Diyos.
Sayra kon nganong katuohan nga ang Diyos walay sinugdanan ug walay kataposan.
“Kinsay Nagbuhat sa Diyos?” (Ang Bantayanang Torre, Agosto 1, 2014)
Sayra kon nganong angay natong gamiton ang ngalan sa Diyos, bisag wala ta mahibalo kon giunsa ni paglitok sa una.
Importante ba kon unsay atong itawag sa Diyos? Tan-awa kon nganong makaingon ta nga usa lang ang iyang ngalan.
a Para sa dugang impormasyon sa kahulogan sa ngalan sa Diyos ug kon nganong gitangtang ni sa ubang hubad sa Bibliya, tan-awa ang Apendise A4 sa Bag-ong Kalibotang Hubad sa Balaang Kasulatan.
Basin Ganahan Pod Ka
KOMON NGA MGA PANGUTANA
Unsa ang Bible Study Program nga Gina-offer sa mga Saksi ni Jehova?
Sa libreng interactive program nga gina-offer sa mga Saksi ni Jehova, puwede nimong gamiton ang bisan unsang bersiyon sa Bibliya. Puwede nimong paapilon ang tibuok pamilya o mga amigo o amiga.
