Si Jesus ang Ulo sa Kristohanong kongregasyon. (Efeso 5:23) Gikan sa langit, gigiyahan ni Jesus karon ang iyang mga sumusunod sa yuta pinaagi sa “matinumanon ug maalamong ulipon.” (Basaha ang Mateo 24:45.) Si Jesus mismo ang nagtudlo sa maong “ulipon” ug naghatag niinig katungod sa paghimog mga desisyon, pero kana nga ulipon kinahanglan gihapong mosunod sa Kristo ug mag-alagad sa mga igsoon sa Kristo. Kinsa ang maong ulipon? Giunsa ta pag-atiman niana nga ulipon?

1. Kinsa ang “matinumanon ug maalamong ulipon”?

Si Jehova kanunayng naggamit ug usa ka lalaki o gamayng grupo sa mga lalaki sa paghatag ug instruksiyon sa iyang katawhan. (Malaquias 2:7; Hebreohanon 1:1) Human mamatay si Jesus, ang mga apostoles ug ang mga ansiyano sa Jerusalem mao nay nanguna. (Buhat 15:2) Sa samang paagi, karon naay gamayng grupo sa mga ansiyano—ang Nagamandong Lawas sa mga Saksi ni Jehova—nga naghatag ug espirituwal nga pagkaon ug nagdumala sa buluhatong pagsangyaw. Kini nga grupo mao ang “matinumanon ug maalamong ulipon nga gitudlo [ni Jesus].” (Mateo 24:45a) Ang tanang membro sa Nagamandong Lawas maoy dinihogan sa espiritu nga mga Kristohanon. Sila nagpaabot nga magmando uban sa Kristo sa iyang langitnong Gingharian dihang matapos ang ilang kinabuhi sa yuta.

2. Unsang espirituwal nga pagkaon ang gitagana sa matinumanong ulipon?

Si Jesus miingon nga ang matinumanong ulipon ‘maghatag [sa iyang mga isigka-Kristohanon ug] pagkaon sa hustong panahon.’ (Mateo 24:45b) Sama nga ang pagkaon nga atong ginakaon makapalig-on ug makapahimsog nato, ang espirituwal nga pagkaon—nga nagtumong sa instruksiyon gikan sa Pulong sa Diyos—maghatag natog kusog nga atong gikinahanglan sa pagpabiling maunongon kang Jehova ug sa pagtuman sa buluhaton nga gihatag ni Jesus kanato. (1 Timoteo 4:6) Kana nga espirituwal nga pagkaon atong madawat diha sa mga tigom, asembliya, ug kombensiyon, ingon man sa binase sa Bibliya nga mga publikasyon ug video nga motabang natong masabtan ang kabubut-on sa Diyos ug magpalig-on sa atong relasyon kaniya.

 TUN-IG DUGANG

3. Ang katawhan ni Jehova kinahanglang organisado

Ubos sa paggiya ni Jesus, ang Nagamandong Lawas nag-organisar sa buluhaton sa mga Saksi ni Jehova. Ingon ana ang paagi sa paggiya ni Jesus sa unang mga Kristohanon. I-play ang VIDEO.

Basaha ang 1 Corinto 14:33, 40, ug dayon hisgoti kini nga pangutana:

• Giunsa pagpakita niini nga teksto nga gusto ni Jehova nga organisado ang iyang mga Saksi?

4. Ang matinumanong ulipon nag-organisar sa atong buluhatong pagsangyaw

Ang pagsangyaw mao ang pinakaimportanteng buluhaton sa unang mga Kristohanon. Basaha ang Buhat 8:14, 25, ug dayon hisgoti kini nga mga pangutana:

• Kinsa sa unang mga Kristohanon ang nagdumala sa buluhatong pagsangyaw?

• Unsay gihimo ni Pedro ug Juan dihang gihatagan silag instruksiyon sa ilang kaubang mga apostoles?

Ang pagsangyaw mao ang pinakaimportanteng buluhaton nga giorganisar sa Nagamandong Lawas. I-play ang VIDEO.

 Gipasiugda ni Jesus kon unsa ka importante ang pagsangyaw. Basaha ang Marcos 13:10, ug dayon hisgoti kini nga mga pangutana:

• Nganong giisip sa Nagamandong Lawas nga importante kaayo ang buluhatong pagsangyaw?

• Nganong gikinahanglan nato ang “matinumanon ug maalamong ulipon” sa pag-organisar niining tibuok kalibotang buluhaton?

5. Ang matinumanong ulipon naghatag ug instruksiyon

Ang Nagamandong Lawas naghatag ug instruksiyon sa mga Kristohanon sa tibuok kalibotan. Giunsa nila pagdesisyon kon unsa nga instruksiyon ang ilang ihatag? Konsideraha kon giunsa na paghimo sa nagamandong lawas sa unang siglo. Basaha ang Buhat 15:1, 2, ug dayon hisgoti kini nga mga pangutana:

• Unsa ang isyu nga nakapahinabog panaglalis sa ubang Kristohanon sa unang siglo?

• Kang kinsa miadto si Pablo, Bernabe, ug ang uban pa sa pagsulbad sa isyu?

Basaha ang Buhat 15:12-18, 23-29, ug dayon hisgoti kini nga pangutana:

• Sa wala pa mohimog desisyon, unsay gihimo sa nagamandong lawas sa unang siglo aron ilang mahibaloan ang hunahuna sa Diyos bahin sa maong isyu?—Tan-awa ang bersikulo 12, 15, ug 28.

Basaha ang Buhat 15:30, 31 ug 16:4, 5, ug dayon hisgoti kini nga mga pangutana:

• Unsay gihimo sa unang mga Kristohanon dihang gihatagan silag instruksiyon sa nagamandong lawas?

• Giunsa pagpanalangin ni Jehova ang ilang pagkamasinugtanon?

Basaha ang 2 Timoteo 3:16 ug Santiago 1:5, ug dayon hisgoti kini nga pangutana:

• Unsay ginahimo sa Nagamandong Lawas karon aron magiyahan sila dihang mohimog mga desisyon?

 SUMARYO

Ang Nagamandong Lawas mao ang “matinumanon ug maalamong ulipon” nga gitudlo sa Kristo. Naghatag silag instruksiyon ug espirituwal nga pagkaon sa mga Kristohanon sa tibuok yuta.

Review

• Kinsa ang nagtudlo sa “matinumanon ug maalamong ulipon”?

• Giunsa ta pag-atiman sa Nagamandong Lawas?

• Nagtuo ba ka nga ang Nagamandong Lawas mao ang “matinumanon ug maalamong ulipon”?