ANG pagkahibalo bahin kang Jehova nagpasabot ug unsa alang kanimo? Lakip sa ubang butang, nagpasabot kini sa pagkakaplag ug tubag sa pangutana nga nakapalibog sa bilyonbilyong tawo: ‘Nganong ako ania dinhi?’ Nahibulong ka tingali bahin niana sa popanahon. Usa ka maalamong hari nga nakaangkon ug bahandi nga “milabaw kay sa tanang ubang hari” sa iyang adlaw nagtuki nianang pangutanaha bahin sa kahulogan sa kinabuhi. (2 Cronicas 9:​22; Ecclesiastes 2:​1-​13) Kining haria, si Solomon, nakabaton ug dakong gahom, dagayang bahandi, ug walay-ikatanding kaalam. Unsay resulta sa iyang pakisusi? “Kini ang kataposan sa butang, ang tanan nadungog na: Kahadloki ang matuod nga Diyos ug tumana ang iyang mga sugo. Kay kini mao ang tibuok nga obligasyon sa tawo.” (Ecclesiastes 12:13) Sanglit ang gidak-on sa kasinatian ni Solomon molabaw man sa kadaghanang tawo, ang iyang konklusyon labing menos takos nga atong tagdon.​—Ecclesiastes 2:12.

² Ang pagkahadlok sa Diyos nga gitumong ni Solomon maoy dili makalilisang nga kahadlok sa wala mailhing espiritung puwersa. Hinunoa, kini maoy maayong kahadlok sa dili pagpahimuot sa usa nga imong gimahal pag-ayo. Kon gimahal nimo pag-ayo ang usa ka tawo, buot gayod nimong pahimut-an kanang tawhana sa tanang panahon ug likayan ang pagbuhat ug bisan unsa nga makapasuko kaniya. Sa dihang ikaw mahigugma kang Jehova, ikaw mobati sa samang paagi bahin kaniya.

³ Pinaagi sa pagbasa sa Bibliya, makakat-on ka bahin sa mga gusto ug mga dili gusto sa atong Maglalalang maingon man sa iyang katuyoan sa paglalang sa yuta. Sa paghubit kang Jehova ingong “ang Mag-uumol sa yuta ug ang Magbubuhat niini,” ang Bibliya nagtawag usab kaniya nga “ang Usa nga lig-ong nagtukod niini, nga wala maglalang niini sa wala lamay kapuslanan, nga nag-umol niini aron pagapuy-an.” (Isaias 45:18) Giandam ni Jehova ang yuta aron kapuy-an sa mga tawo, nga maoy mag-atiman sa yuta ug sa tanang linalang diha niana. (Genesis 1:28) Apan mao ba lamang kanay katuyoan sa paglalang ni Jehova sa mga tawo​—nga mahimong mga tig-atiman?

 ⁴ Dili, dihay mas hamiling katuyoan. Ang unang tawo, si Adan, may makahuloganong relasyon uban kang Jehova. Si Adan laktod nga makapakigsulti sa iyang Maglalalang. Makapaminaw siya sa isulti sa Diyos kaniya ug makapahayag kang Jehova sa iyang hunahuna. (Genesis 1:​28-​30; 3:​8-​13, 16-​19; Buhat 17:​26-​28) Busa, si Adan ug ang iyang asawa, si Eva, may dakong kahigayonan nga makaila pag-ayo kang Jehova ug makaugmad ug mas dulot nga relasyon kaniya. Ang pagkahibalo kang Jehova ug pagsundog kaniya makapahimo gayod unta sa ilang kinabuhi nga makapatagbaw, kay siya maoy “malipayong Diyos.” (1 Timoteo 1:11) Ingong Diyos “nga dagayang naghatag kanato sa tanang butang aron atong pagakalipayan,” gibutang ni Jehova ang unang tawo sa paraiso nga gitawag ug tanaman sa Eden, nga may palaabotong mabuhi sa walay kataposan.​—1 Timoteo 6:​17; Genesis 2:​8, 9, 16, 17.

⁵ Walay kataposan? Isalikway tingali nimo ang hunahuna bahin sa kinabuhing walay kataposan ingong kataw-anan, apan ingon ba gayod niana? Ang mga siyentipiko nagtuo nga nasabtan na nila kon unsay mga hinungdan nga matigulang ang mga selula. Ang mga tipik sa henetikong materyal nga gitawag ug mga telomere, nga maoy nagtabon sa mga tumoy sa mga chromosome, magkamubo sa matag panahon nga ang usa ka selula mabahin. Human sa 50 ngadto sa 100 ka pagkabahin sa selula, ang mga telomere maupos, ug ang kadaghanang selula mohunong na sa pagkabahin. Apan, ang di pa dugayng mga kaplag nagpakita nga sa tabang sa usa ka enzyme nga gitawag ug telomerase, ang tawhanong mga selula makapadayon sa pagbahinbahin sa panahong walay tino. Bisan tuod ang maong kaplag wala magpasabot nga si Jehova magpaposible sa kinabuhing walay kataposan pinaagi niining partikular nga enzyme, nagpasabot kinig usa ka butang: Ang ideya bahin sa kinabuhing walay kataposan dili kataw-anan!

⁶ Oo, katuohan gayod ang asoy sa Bibliya nga nagpakitang ang unang tawhanong magtiayon gilalang aron mabuhi sa walay kataposan. Ang mga tawo kinahanglang mouswag sa ilang relasyon kang Jehova sa panahong walay tino. Angay nilang tukoron ang lig-ong bugkos uban sa ilang langitnong Amahan, kay nahibalo pag-ayo sa iyang katuyoan alang sa mga tawo sa yuta ug sa pagpalampos niana. Ang ilang kinabuhi dili unya makalaay. Si Adan ug Eva may kahibulongang palaaboton sa pagpuno sa yuta sa malipayon, hingpit nga mga anak. Sila unta may matagbawon ug makahuloganong buluhaton nga pagabuhaton hangtod sa kahangtoran. Makapatagbaw gayod unta kadto nga kinabuhi!​—Genesis 1:28.