NGANONG daghan ang naningkamot apan wala makakaplag ug bisan unsang tinuod nga kahulogan sa ilang kinabuhi? “Ang tawo, nga natawo sa usa ka babaye, mubo ug kinabuhi ug tugob sa kasamok. Sama sa usa ka bulak siya mobuswak ug pagaputlon, ug siya mokalagiw sama sa landong ug dili magadayon.” (Job 14:​1, 2) Ang nakadaot sa masanag nga mga palaaboton sa tawo nahitabo sa unang tawhanong magtiayon sa Paraiso.

² Aron tinuod nga magmalipayon ang tawhanong pamilya, sila kinahanglang adunay maayong relasyon sa Diyos​—kanang boluntaryo, dili pinugos. (Deuteronomio 30:​15-​20; Josue 24:15) Buot ni Jehova ang pagsunod ug pagsimba nga kinasingkasing, nga gipalihok sa gugma. (Deuteronomio 6:5) Busa sa tanaman sa Eden, gilatid ni Jehova ang restriksiyon nga naghatag ug kahigayonan sa unang tawo sa pagpamatuod sa iyang kinasingkasing nga pagkamaunongon. “Gikan sa tanang kahoy sa tanaman makakaon ka hangtod sa pagkatagbaw,” giingnan sa Diyos si Adan, “apan kon bahin sa kahoy sa kahibalo sa maayo ug sa daotan dili ka gayod mokaon gikan niini, kay sa adlaw nga mokaon ka gikan niini mamatay ka gayod.” (Genesis 2:​16, 17) Yano lamang kadto nga pagsulay. Gidid-an ni Jehova si Adan sa pagkaon sa bunga sa usa lamang ka kahoy gikan sa tanang kahoy sa tanaman. Kadtong kahoya nagsimbolo sa maalamon kaayong katungod sa Maglalalang sa paghukom kon unsay maayo ug daotan. Gipasa sa unang tawo kining hinatag sa Diyos nga sugo ngadto sa iyang asawa, nga gitagana ni Jehova “ingon nga katimbang [ni Adan].” (Genesis 2:18) Silang duha natagbaw niining kahikayana​—nga magkinabuhi ilalom sa pagmando sa Diyos—​nga mapabilhong magpasakop sa iyang kabubut-on ug busa magpahayag sa ilang gugma sa ilang Maglalalang ug Maghahatag sa Kinabuhi.

³ Dayon usa ka adlaw niana usa ka halas ang nakigsulti kang Eva ug nangutana: “Tinuod ba nga miingon ang Diyos nga dili gayod kamo makakaon gikan sa tanang kahoy sa tanaman?”  Mitubag si Eva nga sila gidid-an lamang sa pagkaon sa bunga “sa kahoy nga anaa sa taliwala sa tanaman,” ang kahoy sa kahibalo sa maayo ug daotan, ‘aron sila dili mamatay.’​—Genesis 3:​1-3.

⁴ Kinsa kining maong halas? Ang basahon sa Bibliya nga Pinadayag nag-ila sa “orihinal nga halas” ingong “ang usa nga gitawag Yawa ug Satanas, nga nagpahisalaag sa tibuok gipuy-ang yuta.” (Pinadayag 12:9) Gilalang ba sa Diyos si Satanas nga Yawa? Wala, ang mga buhat ni Jehova maoy hingpit ug maayo. (Deuteronomio 32:4) Kadtong espiritung linalang naghimo sa iyang kaugalingon nga Yawa, nga nagkahulogang “Tigpasipala,” ug Satanas, nga nagkahulogang “Magsusupak.” Siya ‘naganoy ug nahaylo sa iyang kaugalingong tinguha,’ ang tinguha nga mailog ang dapit sa Diyos, ug siya misugod sa pagrebelde batok sa Maglalalang.​—Santiago 1:14.

⁵ Dayon si Satanas nga Yawa miingon kang Eva: “Dili gayod kamo mamatay. Kay nasayod ang Diyos nga sa mismong adlaw nga kamo mokaon gikan niini ang inyong mga mata mangabuka ug kamo mahisama sa Diyos, nga mahibalo sa maayo ug sa daotan.” (Genesis 3:​4, 5) Gihimo ni Satanas ang pagkaon gikan sa kahoy sa kahibalo sa maayo ug daotan nga daw makapadani. Sa diwa, siya miergo: ‘Gihikawan kamo sa Diyos sa maayong butang. Kaon lang gikan nianang kahoya, ug kamo mahisama sa Diyos ug kamo makadesisyon kon unsay maayo ug daotan.’ Karong panahona gigamit gihapon ni Satanas kining pangatarongana aron ipahilayo ang daghan sa pag-alagad sa Diyos. ‘Buhata ang imong gusto,’ siya moingon. ‘Pasagdi lang nang imong nautang sa Usa nga maoy naghatag kanimog kinabuhi.’​—Pinadayag 4:11.

⁶ Dihadiha ang bunga sa kahoy nahimong lami kaayong kaonon, nga makabibihag kaayo! Si Eva mipupo sa bunga, mikaon, ug unya mihatag sa bahin niana sa iyang bana. Bisan tuod nahibalo pag-ayo sa mga sangpotanan, si Adan namati sa tingog sa iyang asawa ug mikaon sa bunga. Unsay misangpot? Ngadto sa babaye, si Jehova nagpakanaog sa mosunod nga sentensiya: “Dugangan ko pag-ayo ang kasakit sa imong pagmabdos; sa mga kaul-ol sa pagpanganak ikaw manganak ug mga anak, ug ang imong pangandoy maoy alang sa imong bana, ug siya magagahom kanimo.” Ug sa lalaki? “Tinunglo ang yuta tungod kanimo. Sa kasakit ikaw magakaon sa abot niini sa tanang adlaw sa imong kinabuhi. Ug kini magpatubo alang kanimo ug mga sampinit ug mga kudyapa, ug ikaw magakaon  sa tanom sa kapatagan. Sa singot sa imong nawong ikaw magakaon sa tinapay hangtod nga ikaw mobalik sa yuta, kay gikan niini ikaw gikuha. Kay abog ikaw ug sa abog ikaw mopauli.” Busa si Adan ug Eva gipasagdan sa pagpangitag kalipay ug katagbawan sa ilang kaugalingong paagi. Molampos ba ang mga paningkamot sa mga tawo sa pagkinabuhi ug matagbawong mga kinabuhi nga bulag sa katuyoan sa Diyos? Ang makapahimuot nga buluhaton sa pag-atiman sa samag-tanaman nga Paraiso ug pagpasangkad niini ngadto sa mga kinatumyan sa yuta napulihan sa kabudlay sa pagtrabaho aron lamang magpabiling buhi, nga walay gibuhat alang sa himaya sa ilang Maglalalang.​—Genesis 3:​6-19.

⁷ Sa adlaw nga mikaon gikan sa kahoy sa kahibalo sa maayo ug daotan, ang unang tawhanong magtiayon namatay sa panan-aw sa Diyos ug nagpadulong ngadto sa ilang pisikal nga kamatayon. Unsay nahitabo kanila sa dihang sa kataposan sila namatay? Ang Bibliya naghatag ug pagsabot sa kahimtang sa mga patay. “Ang mga buhi nasayod nga sila mamatay; apan bahin sa mga patay, sila walay nahibaloan nga bisan unsa, ni sila aduna pay suhol, tungod kay ang ilang handomanan nakalimtan na.” (Ecclesiastes 9:5; Salmo 146:4) Wala kanang giingon nga “kalag” nga magpabiling buhi sa pagkamatay. Ang silot sa sala maoy kamatayon, dili kay walay kataposang pagsakit sa nagdilaab nga impiyerno. Dugang pa, ang kamatayon dili motultol ngadto sa dumalayong kalipay sa mga langit. *

⁸ Sama nga ang lutoanag keyk nga may lupyak magpatungha lamag keyk nga may marka o timaan, ang karon dili na hingpit nga lalaki ug babaye makapatungha lamag dili hingpit nga mga anak. Gisaysay sa Bibliya kining paagiha: “Ang sala misulod sa kalibotan pinaagi sa usa ka tawo ug ang kamatayon pinaagi sa sala, ug sa ingon ang kamatayon mikaylap sa tanang tawo tungod kay silang tanan nakasala man.” (Roma 5:12) Busa, kitang tanan nangatawo sa sala, nailalom sa kakawangan. Ang kinabuhi sa mga anak ni Adan nahimong makapaluya nga kabudlay. Apan aduna bay solusyon?