KON ikaw magpakitambag, dili ka ba moadto sa usa ka tawong kasaligan? Kon ang tambag naggikan sa ti-​nubdan nga imong gisaligan, mas mokiling ka sa pagsunod niana, makabaton ka man ug dihadihang kaayohan gikan niana o dili. Aron ikaw makabaton gayod ug kaayohan gikan sa praktikal nga tambag nga makaplagan sa Bibliya, ikaw kinahanglang masinati sa Awtor niini. Aw, mahimo ganing isipon ka nga iyang “higala”!​—Isaias 41:8.

² Kon gusto kang makighigala sa usa ka tawo, sa walay duhaduha gusto kang mahibalo sa iyang ngalan. Duna bay ngalan ang Diyos sa Bibliya? Siya mipahayag: “Ako mao si Jehova. Kana ang akong ngalan; ug dili ko ihatag kang bisan kinsa ang akong kaugalingong himaya, ni ang akong pagdayeg ngadto sa kinulit nga mga larawan.” (Isaias 42:8) Ang “Jehova,” nga gisulat יהוה (mabasa gikan sa tuo pawala) sa Hebreohanong pinulongan, mao ang iyang ngalan. Kanang ngalana makita sa duolag 7,000 ka beses sa Hebreohanong Kasulatan sa Bibliya. Ang balaang ngalan nagkahulogang “Iyang Ipahinabo nga Mamao.” Kana nagpasabot nga si Jehova mahimong bisan unsa kon unsay gikinahanglan o gamiton niya ang iyang mga linalang aron matuman ang iyang mga katuyoan. Dugang pa, sa Hebreohanon ang iyang ngalan anaa sa porma sa gramatika nga nagpasabot sa usa ka paglihok nga nagakatuman. Unsay ipasabot niana? Gipakita niini kanato nga si Jehova mahimong bisan unsa kon unsay gikinahanglan aron matuman ang iyang mga katuyoan. Siya maoy buhi nga Diyos, dili usa ka dili-persona nga puwersa!

³ Si Jehova nahimong Maglalalang. (Genesis 1:1) Siya mao ang “buhing Diyos, nga maoy nagbuhat sa langit ug sa yuta ug sa dagat ug sa tanang butang diha niana.” (Buhat 14:15) Gilalang ni Jehova ang tanang butang, lakip ang unang tawhanong magtiayon, si Adan ug Eva. Busa, ang Diyos mao “ang tuboran sa kinabuhi.” (Salmo 36:9) Nahimo usab siya nga Tigsustento sa kinabuhi. Busa “wala niya itugot nga dili kapanghimatud-an ang iyang kaugalingon sanglit gibuhat man niya ang maayo, nga naghatag kaninyog ulan gikan sa langit ug mabungahong mga panahon, nga nagbuhong sa inyong mga kasingkasing sa pagkaon ug sa kalipay.” (Buhat  14:17) Sa Aprika ug Asia, daghan ang nagsimba sa ilang mga katigulangan kay sila nakadawat man ug kinabuhi gikan kanila. Dili ba angay nga mobati silang mas utangan sa Maglalalang ug Tigsustento sa kinabuhi, ang Usa nga naglalang sa unang magtiayon ug naghatag kanilag katakos sa pagsanay? Ang pagpamalandong nianang kamatuorana mahimong mopalihok kanimo sa pagpatugbaw: “Takos ikaw, Jehova, nga among Diyos, nga modawat sa himaya ug sa dungog ug sa gahom, tungod kay imong gilalang ang tanang butang, ug tungod sa imong kabubut-on sila milungtad ug nalalang.”​—Pinadayag 4:11.

⁴ Pinaagi sa mga panid sa Bibliya, ikaw makahibalo sa imong Maglalalang, si Jehova, ug makakat-on kon unsa siyang matanga sa Diyos. Gibutyag niini nga “ang Diyos gugma.” (1 Juan 4:​16; Exodo 34:​6, 7) Samtang imong basahon ang Bibliya gikan sa Genesis ngadto sa Pinadayag, makakaplag kag ubay-ubayng asoy nga magpakita nga siya sa pagkatinuod usa ka mahigugmaong Diyos. Nganong dili himoong batasan ang pagbasa sa Pulong sa Diyos adlaw-adlaw aron makahibalo bahin sa imong Maglalalang? Tun-i ang Bibliya sa maampingong paagi sa tabang nila nga nasinati sa kaundan niini. (Buhat 8:​26-​35) Sa pagbuhat sa ingon, imong makita nga siya usab maoy Diyos sa hustisya, nga dili motugot nga magpadayon ang pagkadaotan sa walay kataposan. (Deuteronomio 32:4) Ang pagmentinar sa katimbang tali sa gugma ug hustisya dili sayon para sa tawo, apan pinaagi sa Iyang kaalam, si Jehova naghupot niini diha sa hingpit nga pagkatimbang. (Roma 11:​33; 16:27) Ingong Diyos nga Labing Gamhanan, siya may gahom aron buhaton ang bisan unsay iyang gusto aron matuman ang iyang mga katuyoan. (Genesis 17:1) Paningkamoti pagpadapat ang maalamong tambag nga imong makaplagan sa Bibliya, ug dugang pa nimong maapresyar ang imong Maglalalang, sa pagkasayod nga ang iyang tambag kanunayng mosaler alang sa atong kaayohan.

⁵ Aduna pay laing paagi sa pagduol sa Diyos. Kini maoy pinaagi sa pag-ampo. Si Jehova maoy “Tigpatalinghog sa pag-ampo.” (Salmo 65:2) Siya “makabuhat ug labaw pa sa hilabihan kamadagayaon nga lapaw sa tanang butang nga atong gipangayo o gihunahuna.” (Efeso 3:20) Apan, unsay imong hunahuna sa usa ka “higala” nga moduol lamang nimo kon siya mangayog pabor gikan kanimo? Lagmit dili gayod maayo ang imong pagtamod kaniya. Busa, sa walay duhaduha buot nimong gamiton ang pribilehiyo sa pag-ampo dili lamang sa pagpangayo sa Diyos sa imong gikinahanglan kondili sa pagpasalamat ug pagdayeg usab kaniya.​—Filipos 4:​6, 7; 1 Tesalonica 5:​17, 18.