BISAG ang tawo nahulog ngadto sa way-pulos nga paagi sa kinabuhi ingong sangpotanan sa ilang pagrebelde batok sa sugo sa Diyos, wala pasagdi sa Diyos ang mga tawo nga walay paglaom. Ang Bibliya nagsaysay: “Ang kalalangan gipailalom sa pagkawalay-pulos, dili pinaagi sa kaugalingong kabubut-on niini kondili pinaagi kaniya nga nagsakop niini, pinasukad sa paglaom aron nga ang kalalangan usab ipagawas gikan sa pagkaulipon sa pagkadunot ug makabaton sa mahimayaong kagawasan sa mga anak sa Diyos.” (Roma 8:​20, 21) Oo, ang Diyos nagtaganag paglaom alang sa mga anak sa unang tawhanong magtiayon. Kadto mao ang kasaligang paglaom nga ang katawhan hatagag kagawasan gikan sa napanunod nga sala ug kamatayon. Sila ikapasig-uli sa suod nga relasyon kang Jehova nga Diyos. Sa unsang paagi?

² Sa dihang nakasala si Adan ug Eva, ilang gihikawan ang ilang mga anak sa palaaboton nga matagamtam ang makapatagbawng kinabuhi sa walay kataposan sa yuta. Isip baylo sa ilang kagawasan sa paghukom kon unsay husto ug sayop, ilang gibaligya ang ilang umaabot nga pamilya ngadto sa pagkaulipon sa sala ug kamatayon. Kay natawo sa maong pamilya, ang ilang mga anak mahimong ipakasama sa mga ulipon nga gibilanggo sa usa ka layo nga isla nga ang bangis nga mga magmamando maoy nagmando ingon nga mga hari. Sa tinuoray, ang kamatayon nagmando ingong hari ibabaw sa katawhan nga giulipon sa lain pang hari​—ang sala. (Roma 5:​14, 21) Maorag walay usang makaluwas kanila. Aw, ang ilang katigulangan maoy nagbaligya kanila ngadto sa pagkaulipon! Apan usa ka mahinatagong tawo nagpadala sa iyang anak, nga nagdala sa katibuk-ang bayad nga gikinahanglan aron maangkon ang kagawasan sa tanang naulipon.​—Salmo 51:​5; 146:​4; Roma 8:2.

³ Niining ilustrasyona ang tawo nga nagluwas sa mga ulipon naghawas kang Jehova nga Diyos. Ang anak nga nagdala sa bili sa kagawasan mao si Jesu-Kristo. Siya may una-tawhanong paglungtad ingon nga bugtong Anak sa Diyos. (Juan 3:16) Siya gayod ang una sa kalalangan ni Jehova, ug ang tanang ubang linalang sa uniberso naglungtad pinaagi  kaniya. (Colosas 1:​15, 16) Sa milagrosong paagi gibalhin ni Jehova ang kinabuhi sa iyang espirituwal nga Anak ngadto sa tagoangkan sa usa ka ulay, nga magpaarang sa bata nga matawong hingpit, ang bili nga gikinahanglan aron ikatagana ang mga kinahanglanon sa balaang hustisya.​—Lucas 1:​26-​31, 34, 35.

⁴ Sa dihang hapit nang mag-30 anyos si Jesus, gibawtismohan siya sa Suba sa Jordan. Sa panahon sa iyang bawtismo, gidihogan siya sa balaang espiritu, o aktibong gahom sa Diyos. Busa, siya nahimong Kristo, nga nagkahulogang “Dinihogang Usa.” (Lucas 3:​21, 22) Ang ministeryo ni Jesus sa yuta mikabat ug tulo ug tunga ka tuig. Niadtong mga tuiga, gitudloan niya ang iyang mga tinun-an bahin sa “gingharian sa Diyos,” ang langitnong kagamhanan nga ilalom niana ang katawhan mahibalik  sa malinawong relasyon kang Jehova nga Diyos. (Lucas 4:​43; Mateo 4:17) Nahibalo si Jesus sa paagi alang sa mga tawo sa pagkinabuhing malipayon, ug gihatagan niya ang iyang mga tinun-an ug espesipikong mga sukdanan bahin sa kalipay. Nganong dili paklion ang imong Bibliya sa Mateo mga kapitulo 5 hangtod sa 7 ug basahon ang pipila sa iyang mga pagtulon-an diha sa Wali sa Bukid?

⁵ Dili sama kang Adan, si Jesus nagkinabuhi sa pagkamasinugtanon ngadto sa Diyos sa tanang paagi. “Siya walay nahimong sala.” (1 Pedro 2:​22; Hebreohanon 7:26) Sa pagkatinuod, may katungod siya nga mabuhing walay kataposan sa yuta, apan iyang ‘gitugyan ang iyang kalag’ aron bayran ang Diyos sa giwala ni Adan. Sa sakitanang estaka, gihatag ni Jesus ang iyang hingpit tawhanong kinabuhi. (Juan 10:​17; 19:​17, 18, 28-​30; Roma 5:​19, 21; Filipos 2:8) Sa pagbuhat sa ingon, gitagana ni Jesus ang lukat, o gibayad ang bili nga gikinahanglan aron paliton ug balik ang katawhan gikan sa pagkaulipon sa sala ug kamatayon. (Mateo 20:28) Handurawa ang imong kaugalingon nga nagahago diha sa usa ka hugaw nga pabrika, nga nagkinabuhi sa literal nga pagkaulipon. Dili ka ba mapasalamaton sa usa nga maoy naghikay aron ikaw mapahigawas gikan sa pagkaulipon ug sa usa nga miboluntaryo paghalad sa iyang kinabuhi alang sa imong kinabuhi? Pinaagi sa kahikayan sa lukat, ang dalan gibuksan aron ikaw mahibalik ngadto sa unibersohanong pamilya sa Diyos ug magkinabuhi sa makapatagbaw gayod nga kinabuhi, nga nahigawas gikan sa pagkaulipon sa sala ug kamatayon.​—2 Corinto 5:​14, 15.

⁶ Ang pagkahibalo ug pagpabili niining dili-takos nga kalulot ni Jehova mohatag kanimog dugang rason nga ipadapat sa imong kinabuhi ang mga pulong sa kaalam nga makaplagan sa Bibliya. Pananglitan, tagda ang usa sa kinalisdang mga prinsipyo nga ikapadapat​—ang pagpasaylo sa uban sa dihang sila makasala kanimo. Nakahinumdom ka ba sa mga pulong nga makaplagan sa Colosas kapitulo 3, mga bersikulo 12 hangtod sa 14, nga atong gihisgotan sa Leksiyon 2? Kanang mga bersikuloha nagdasig kanimo sa pagpasaylo sa uban bisan kon ikaw adunay katarongan sa pagreklamo batok kanila. Ang konteksto nagsaysay kon ngano, nga nag-ingon: “Ingon nga si Jehova kinabubut-on nga nagpasaylo kaninyo, buhata usab ninyo ang ingon.” Kon imong tim-os nga pabilhan ang nahimo ni Jehova ug ni Jesu-Kristo alang sa katawhan, ikaw mapalihok sa pagpasaylo sa uban sa bisan unsang mga kasaypanan nga ila tingaling nahimo, ilabina kon sila nagbasol ug nangayog pasaylo.