SI Abraham, usa ka iladong tawo sa pagtuo sa kasaysayan sa Bibliya, mibiya sa hamugaway nga kinabuhi sa mauswagong siyudad sa Ur. Human mipuyo ug kadiyot nga panahon sa Haran, gigugol niya ang nahibilin sa iyang kinabuhi ingong usa ka tiglalin, nga nagpuyo diha sa mga tolda, nga walay permanenteng puy-anan. (Genesis 12:​1-3; Buhat 7:​2-7; Hebreohanon 11:​8-​10) Apan, kini ang narekord: “Si Abraham nabugtoan sa gininhawa ug namatay sa igo nang katigulangon, tigulang ug tagbaw.” (Genesis 25:8) Unsay nakahimo sa iyang kinabuhi nga makapatagbaw? Dili lamang siya usa ka tigulang nga mibatig katagbaw sa panahong hapit na siyang mamatay tungod sa iyang mga kalamposan sa kinabuhi. Si Abraham sa ulahi gitawag ug “higala ni Jehova” tungod sa iyang talagsaong pagtuo sa Diyos. (Santiago 2:​23; Isaias 41:8) Ang makahuloganong relasyon nga naugmad ni Abraham uban sa iyang Maglalalang mao ang naghimo sa iyang kinabuhi nga makapatagbaw kaayo.

² Sama sa gihimo ni Abraham mga 4,000 ka tuig kanhi, ikaw usab mahimong makabaton ug makahuloganon, makapatagbaw nga kinabuhi karon kon imong ugmaron ang panaghigalaay uban sa Diyos. Ikaw tingali dili makatuo sa paghunahuna nga mahimong usa ka higala sa Maglalalang sa uniberso, apan posible kana. Sa unsang paagi? Ikaw kinahanglang makaila ug mahigugma kaniya. (1 Corinto 8:​3; Galacia 4:9) Ang maong relasyon uban sa imong Maglalalang makahimo sa imong kinabuhi nga makahuloganon ug makapatagbaw.

 ³ Alang kanilang andam modawat sa halad lukat ni Jesu-Kristo, si Jehova nagtaganag mga sukdanan sa pagkinabuhi nga malipayon. (Isaias 48:17) Hinumdomi, si Adan mirebelde sa Diyos pinaagi sa paghukom sa iyang kaugalingon kon unsay maayo ug kon unsay daotan. Bisan tuod si Jehova pinaagi sa halad lukat sa iyang Anak nagpalit sa tawhanong pamilya, nga nagbukas kanila sa dalan sa kaluwasan gikan sa pagkaulipon sa sala ug kamatayon, ang matag indibiduwal kinahanglang modawat sa lukat ug mohunong sa pagpahilunag kaugalingong sukdanan sa maayo ug daotan. Kinahanglang mopasakop kita sa mga balaod ug mga prinsipyo nga gitagana sa Diyos alang kanilang modawat sa halad lukat ni Jesus.

⁴ Samtang mopadayon ka sa pagtuon sa Bibliya ug mopadapat sa mga prinsipyo nga gipakita niini, sa walay duhaduha ikaw moapresyar sa kahinungdanon sa sukdanan sa Diyos sa maayo ug daotan. (Salmo 19:​7-9) Ikaw mapalihok sa pagsulti ngadto sa Diyos, sama sa manalagna ni Jehova nga si Moises: “Karon, palihog, kon ako nakakaplag ug pabor sa imong mga mata, pahibaloa ako, palihog, sa imong mga dalan, aron ako makaila kanimo.” (Exodo 33:​13; Salmo 25:4) Ang Bibliya nagtaganag mga prinsipyo nga mogiya kanimo latas sa mga problema niining “makuyaw nga mga panahong lisod sagubangon.” (2 Timoteo 3:1) Ang imong apresasyon motubo, nga moagak kanimo nga mas makaila kang Jehova ug mopalig-on sa imong panaghigala kaniya.

⁵ Si Abraham namatay nga “tigulang ug tagbaw,” apan samtang ang tawo mamatay, ang kinabuhi mubo gihapon kaayo. Ang tinguha nga mabuhi maoy kinaiyanhon kanatong tanan, bisan unsa pa kita ka tigulang. Kini tungod kay “[ang Diyos] nagbutang sa pagkawalay-kataposan diha sa mga kasingkasing sa mga tawo; apan sila dili makatugkad sa gibuhat sa Diyos gikan sa sinugdan hangtod sa kataposan.” (Ecclesiastes 3:​11, New International Version) Bisan pag mabuhi sa walay kataposan, dili gayod kita makatugkad sa tanang kalalangan ni Jehova. Dili unya matapos ang ato tingaling tan-awon, tun-an, ug tagamtamon taliwala sa kahibulongang mga buhat ni Jehova!​—Salmo 19:​1-4; 104:​24; 139:14.

⁶ Tingali dili ka madani sa pagkinabuhi sa walay kataposan kon ang yuta mapuno unya sa mga suliran nga atong makita karon. Apan, kana dili angayng kabalak-an. Ang Bibliya nagsaad: “Adunay bag-ong mga langit ug usa ka bag-ong yuta nga atong ginapaabot sumala sa iyang saad, ug  niini magpuyo ang pagkamatarong.” (2 Pedro 3:13) Ang terminong “bag-ong mga langit” nagtumong sa bag-ong langitnong kagamhanan​—ang Gingharian sa Diyos, nga magmando ibabaw sa tibuok yuta. Ang “bag-ong yuta” mao ang bag-ong tawhanong katilingban nga langkoban niadtong masinugtanon sa pagmando sa maong Gingharian. Aron kini matuman, si Jehova hapit nang molihok batok kanilang “nagalaglag sa yuta.”​—Pinadayag 11:​18; 2 Pedro 3:10.

⁷ Unsa kini ka duol? Ingong mga bahin sa “ilhanan . . . sa kataposan sa sistema sa mga butang,” gilakip ni Jesu-Kristo ang mga gubat nga naglangkit sa mga nasod, “mga kanihit sa pagkaon ug mga linog sa nagkalainlaing mga dapit,” “mga kamatay,” ug “pag-uswag sa kalapasan.” (Mateo 24:​3-13; Lucas 21:​10, 11; 2 Timoteo 3:​1-5) Dayon siya nagtagna: “Sa dihang makita ninyo nga nagakahitabo kining mga butanga, hibaloi nga ang gingharian sa Diyos haduol na.” (Lucas 21:31) Sa pagkatinuod, ang panahon nga si Jehova maglaglag sa mga daotan haduol na. *

⁸ Human sa “dakong adlaw sa Diyos nga Labing Gamhanan,” sa dihang hinloan ni Jehova ang yuta sa pagkadaotan, ang atong globo mahimo unyang usa ka paraiso. (Pinadayag 16:​14, 16; Isaias 51:3) Dayon, “ang mga matarong magapanag-iya sa yuta, ug sila magapuyo sa ibabaw niini hangtod sa kahangtoran.” (Salmo 37:29) Apan komosta man ang mga nangamatay? “Ayaw kahibulong niini,” matod ni Jesus, “tungod kay ang takna nagsingabot nga ang tanan nga anaa sa handomanang mga lubnganan makadungog sa iyang tingog ug manggula, ang mga nagbuhat ug maayong mga butang ngadto sa pagkabanhaw sa kinabuhi, ang mga nagbuhat ug mangil-ad nga mga butang ngadto sa pagkabanhaw sa paghukom.” (Juan 5:​28, 29) Si Jehova, kinsa interesado sa matag indibiduwal, gustong mobanhaw sa mga nangamatay. Ang mga siyentipiko tingali maningkamot sa pagkopya (clone) sa mga tawo pinaagi sa genetic engineering, apan ang Maglalalang dili gayod modangop sa pagkopya ug tawo. Makahinumdom siya sa tanang detalye sa kada tawo nga malukat ug sila pagabanhawon. Oo, ikaw adunay palaaboton sa pagsugat  sa imong namatay nga mga minahal sa usa ka paraisong yuta!

⁹ Mahisama unya sa unsa ang kinabuhi sa Paraiso? Ang yuta mapuno sa malipayong mga lalaki ug babaye nga hiniusang magadayeg sa Maglalalang. “Walay pumoluyo nga moingon: ‘Ako masakiton.’” (Isaias 33:​24; 54:13) Walay usang maladlad sa makadaot nga kapit-os o makaugmad ug mga kadaot sa emosyon ug sa hunahuna. Ang tanan adunay dagayang kalan-on ug makakaplag ug kalipay sa pagbuhat uyon sa katuyoan sa Diyos. (Salmo 72:​16; Isaias 65:23) Ilang tagamtamon ang pakigdait uban sa mga hayop, pakigdait uban sa mga isigkatawo ug, labaw sa tanan, “pakigdait uban sa Diyos.”​—Roma 5:​1; Salmo 37:​11; 72:​7; Isaias 11:​6-9.

¹⁰ Unsay angay nimong buhaton aron makapuyo sa Paraiso ug matagamtam ang kinabuhi sa bug-os nga katagbawan? Si Jesu-Kristo miingon: “Kini nagkahulogan ug kinabuhing walay kataposan, ang ilang pagkuha ug kahibalo bahin kanimo, ang bugtong matuod nga Diyos, ug sa usa nga imong gipadala, si Jesu-Kristo.” (Juan 17:3) Busa padayon sa pagkuhag kahibalo bahin kang Jehova ug kang Jesu-Kristo, ug sa pagkat-on kon unsay gikinahanglan sa Diyos kanimo. Unya ikaw makapahimuot kang Jehova nga Diyos, ug kini maghimo sa imong kinabuhi nga makapatagbaw pag-ayo.