Ang Biblia nag-ingon nga si Satanas “naglimbong sa tibuok pinuy-ang yuta.” (Pinadayag 12:9) Si Satanas ug ang iyang mga demonyo dili buot nga motuo kita sa Pulong sa Diyos, ang Biblia. Naningkamot sila pagpatuo sa mga tawo nga ang mga patay buhi sa usa ka dapit sa kalibotan sa mga espiritu. Taw-awon nato kon giunsa nila kini paghimo.

Daghang mga relihiyon ang nagtudlo nga ang matag tawo dunay kalag nga mobalhin ngadto sa kalibotan sa mga espiritu human sa kamatayon sa pisikal nga lawas. Moingon sila nga ang lawas mamatay apan ang kalag dili. Dugang pa, sila nangangkon nga ang kalag dili mahimong mamatay, nga kini imortal.

Apan ang Pulong sa Diyos wala magtudlo niana. Ang Biblia nagpakita nga ang kalag mao ang tawo, dili butang sulod sa tawo. Pananglitan, sa paghubit sa paglalang kang Adan, ang Biblia nag-ingon: “Ug giumol ni Jehova nga Diyos ang tawo gikan sa abog ug gihuypan niya sa mga buho sa iyang ilong sa gininhawa sa kinabuhi, ug ang tawo nahimong buhi nga kalag.” (Genesis 2:7) Busa si Adan wala hatagi ug kalag; siya kanhi usa ka kalag.

 Ang mga mananap gitawag usab mga kalag.​—Genesis 1:20, 21, 24, 30.

Sanglit ang pulong “kalag” sa Biblia nagkahulogan sa tawo mismo, dili kita mahibulong kon ang mga kalag mamatay ug nangamatay. Ang Kasulatan nag-ingon:

• “Ang kalag nga makasala​—kini mismo mamatay.”​—Ezequiel 18:4.

• “Ug si Samson miingon: ‘Tugoti ang akong kalag nga mamatay uban sa mga Filistehanon.’”​—Maghuhukom 16:30.

• “Uyon ba sa kasugoan ang pagbuhat ug makaayo o ang pagbuhat sa makadaut sulod sa adlaw nga igpapahulay, ang pagluwas o ang pagpatay ug kalag?”​—Marcos 3:4.

Ang ubang mga kasulatan nagpakita nga ang mga kalag malaglag (Genesis 17:14), mapatay pinaagig espada (Josue 10:37), matuok (Job 7:15), ug malumos (Jonas 2:5). Busa, ang kalag mamatay.

Kon imong mabasa ang tibuok Biblia, dili nimo hikaplagan ang mga pulong “dimamatay nga kalag.” Ang tawhanong kalag dili usa ka espiritu. Ang pagtulon-an sa dimamatay nga kalag dili pagtulon-an sa Biblia. Pagtulon-an kini ni Satanas ug sa iyang mga demonyo. Gidumtan ni Jehova ang tanang relihiyosong kabakakan. ​—Proverbio 6:16-19; 1 Timoteo 4:1, 2.

Laing paagi nga si Satanas nagpahisalaag sa mga tawo maoy pinaagig mga espiritista. Ang espiritista usa ka tawo kinsa nagadawat ug mga mensahe direkta gikan sa kalibotan sa mga espiritu. Daghang mga tawo, apil ang mga espiritista mismo, nagtuo nga kining mga mensahea gikan sa mga patay. Apan sumala sa atong nakita sa Biblia, imposible kini.​—Ecclesiastes 9:5, 6, 10.

Busa, asa gikan kini nga mga mensahe? Sa mga demonyo mismo! Ang mga demonyo makakita sa tawo samtang buhi pa siya; hibalo sila sa sinultihan sa usa ka tawo, sa iyang panagway, unsay iyang gipangbuhat, ug unsay iyang nasayran. Busa sayon alang kanila ang pag-awat sa mga tawo nga nangamatay.​—1 Samuel 28:3-19.

Laing paagi nga si Satanas nagpatunhay sa kabakakan labot sa mga patay maoy pinaagig bakak nga mga sugilanon. Ang maong mga estorya sagad mopahilayo sa mga tawo gikan sa kamatuoran sa Biblia.​—2 Timoteo 4:4.

Sa Aprika daghan ang mga sugilanon labot sa mga tawong nakit-an nga buhi human namatay. Sagad, ang maong pagkakita mahitabo layo sa gipuy-an sa maong tawo. Apan pangutan-a ang imong kaugalingon: ‘Makataronganon ba nga kon ang usa ka tawo may gahom pagbalik gikan sa mga patay, mobalik siya sa usa ka dapit nga layo sa iyang pamilya ug mga higala?’

Lain pa, di ba kaha ang nakitang tawo kamay-ong lang sa namatay? Pananglitan, duha ka Kristohanong ministro nga nagwali sa banika nakamatikod nga gisunodsunod sila sa usa ka tigulang nga lalaki sulod sa pipila ka oras. Dihang ilang gipangutana, ilang nasayran nga ang maong tawo naghunahuna nga ang usa sa mga ministro iyang igsoon nga namatay pipila ka tuig kanhi. Siyempre sayop siya, apan midumili siya pagtoo nga sayop siya. Handurawa lang ang estorya sa tigulang human niadto ngadto sa iyang mga higala ug silingan!

Way duhaduha nasayod ka labot sa katingad-ang mga butang nga nakita, nadungog, o nadamgohan sa uban. Ang maong dinatural nga mga kasinatian sagad nakapalisang nilang hingtungdan. Si Marein, kanhi nagpuyo sa Kasadpang Aprika, sagad makadungog sa tingog sa iyang anhing lola nga motawag kaniya sa kagabhion. Kuyawan, mosinggit si Marein, nga magpahigmata sa tibuok panimalay. Sa ulahi, nawad-an siya sa iyang maayong pamuot.

Karon, kon ang mga patay tinuod buhi, makataronganon ba nga ilang hadlokon ang ilang mga hinigugma? Dili gayod. Ang tinubdan sa maong makadaot nga mga mensahe mao ang mga demonyo.

Apan kumosta ang mga mensahe nga daw makaayo ug makapahupay? Pananglit, si Gbassay, gikan sa Sierra Leone, nasakit. Nagdamgo siya nga ang iyang anhing amahan mipakita kaniya. Gisugo siya nga moadto sa usa ka kahoy, mokuha ug dahon, sagolan ug tubig, ug imnon kini. Kinahanglan dili niya itug-an kini sa dili pa niya kini mabuhat. Gituman niya kadto ug naayo siya.

Laing babaye ang miingon nga ang iyang bana mipakita kaniya usa ka gabii human mamatay. Miingon ang asawa nga angayan siya kaayo, ug nagsul-ob ug nindot nga mga bisti.

 Ang maong mga mensahe ug panan-awon daw maayo ug makatabang. Gikan ba kini sa Diyos? Dili. Si Jehova maoy “Diyos sa kamatuoran.” (Salmo 31:5) Dili gayod siya mouyon nga linglahon o limbongan kita. Ang mga demonyo lamang ang mohimo niini.

Apan duna bay maayong mga demonyo? Wala. Bisan kon maorag matinabangon sila usahay, tanan sila daotan. Sa nagpakigsulti ang Yawa kang Eva, daw mahigalaon siya. (Genesis 3:1) Apan unsay misangpot kaniya human siya maminaw ug mibuhat sa gisulti kaniya? Namatay siya.

Sayod ka nga dili talagsaon sa daotang tawo nga magmahigalaon nilang buot niyang ilaron ug tikasan. “Puti ug ngipon, itom ug kasingkasing,” nagkanayon ang usa ka Aprikanhong panultihon. Ug ang Pulong sa Diyos nag-ingon: “Si Satanas padayong nagtakuban sa iyang kaugalingon ingong anghel sa kahayag.”​—2 Corinto 11:14.

Ang Diyos wala na makigkontak sa mga tawo pinaagig mga damgo, panan-awon, o mga tingog gikan sa kalibotan sa mga espiritu. Nagtultol ug nagtudlo siya kanila pinaagi sa Biblia, nga makahimo sa usa ka tawo nga “bug-os masangkapan alang sa matag maayong buhat.”​—2 Timoteo 3:17.

Busa, sa nagpahimangno si Jehova kanato batok sa mga bitik sa Yawa, iyang gibuhat kana kay nahigugma siya kanato. Hibalo siya nga kuyaw nga kaaway ang mga demonyo.