Ang katawhan sa Juda balikbalik nga mibiya kang Jehova ug misimba sa bakak nga mga diyos. Taas nga panahon nga gitabangan sila ni Jehova. Nagpadala siyag mga propeta nga mopasidaan nila pero wala sila mopatuo. Ila hinuong gibugalbugalan ang mga propeta. Giunsa pagtapos ni Jehova ang ilang pagsimba sa bakak nga mga diyos?

Sunodsunod nga gipildi sa hari sa Babilonya nga si Nabucodonosor ang mga nasod. Sa unang higayon nga napildi niya ang Jerusalem, iyang gidakop ug gidala sa Babilonya si Haring Jehoiakin, ang mga pangulo, mga sundalo, ug mga ekspertong trabahante. Gikuha sab niya ang tanang mahalong butang sa templo ni Jehova. Dayon gihimo ni Nabucodonosor si Zedekias nga hari sa Juda.

Sa sinugdan, misunod si Zedekias kang Nabucodonosor. Pero giingnan siya sa silingang mga nasod ug sa bakak nga mga propeta nga morebelde sa Babilonya. Gipasidan-an siya ni Jeremias: ‘Kon morebelde ka, daghan ang mamatay ug duna unyay kagutom ug sakit dinhi sa Juda.’

Human sa walo ka tuig nga paghari, si Zedekias mirebelde sa Babilonya. Nangayo siyag tabang sa mga sundalo sa Ehipto. Dayon gipasulong ni Nabucodonosor ang iyang mga sundalo ngadto sa Jerusalem, ug nagkampo sila palibot sa siyudad. Giingnan ni Jeremias si Zedekias: ‘Miingon si Jehova nga kon mosurender ka sa Babilonya, ikaw ug ang siyudad maluwas. Pero kon dili, sunogon sa  mga Babilonyanhon ang Jerusalem ug prisohon ka nila.’ Si Zedekias mitubag: ‘Dili ko mosurender!’

Paglabay sa usa ka tuig ug tunga, ang mga sundalo sa Babilonya nakasulod sa Jerusalem ug ilang gisunog ang siyudad. Gisunog nila ang templo ug gipatay ang daghang tawo. Libolibo sab ang gidala aron prisohon.

Miikyas si Zedekias, pero gigukod siya sa mga Babilonyanhon. Nadakpan siya duol sa Jerico ug gidala kang Nabucodonosor. Gipatan-aw sa hari sa Babilonya si Zedekias samtang gipatay ang iyang mga anak. Dayon gibutaan ni Nabucodonosor si Zedekias ug gipriso, ug didto siya namatay. Pero misaad si Jehova sa katawhan sa Juda: ‘Human sa 70 ka tuig, papaulion ta mo sa Jerusalem.’

Unsa kahay nahitabo sa mga batan-on nga gidala ug gipriso didto sa Babilonya? Nagpabilin kaha silang maunongon kang Jehova?