Balik tag pipila ka tuig. May Israelinhon nga nagpuyo sa siyudad sa Susan nga sakop sa Persia. Siya si Nehemias ug sulugoon siya ni Haring Artajerjes. Ang iyang igsoon nga gikan sa Juda miabot ug miingon: ‘Dili luwas ang mga tawo nga namalik sa Jerusalem. Wala pa maayo ang mga paril ug mga ganghaan nga giguba sa mga Babilonyanhon.’ Naguol si Nehemias. Gusto niyang moadto sa Jerusalem para motabang, busa nag-ampo siya nga mosugot unta ang hari nga mobiya siya.

Nakita sa hari nga naguol si Nehemias. Siya miingon: ‘Karon pa ko kakita nimo nga naguol. Unsay problema?’ Si Nehemias miingon: ‘Kinsa may dili maguol nga guba man gihapon ang akong siyudad, ang Jerusalem?’ Nangutana ang hari: ‘Unsa may akong ikatabang nimo?’ Dihadiha, hilom nga miampo si Nehemias. Dayon miingon siya: ‘Palihog, paadtoa ko sa Jerusalem aron matukod pag-usab ang mga paril.’ Misugot si Haring Artajerjes nga mopauli siya, ug giseguro sa hari nga luwas siya sa iyang taas nga biyahe. Gihimo sab niya si Nehemias nga gobernador sa Juda ug gihatagan ug mga kahoy para sa mga ganghaan sa siyudad.

Pag-abot ni Nehemias sa Jerusalem, iyang gisusi ang mga paril sa siyudad. Dayon iyang gipatawag ang mga saserdote ug mga magmamando ug giingnan sila: ‘Luoy kaayo atong kahimtang. Ayohon na nato ang mga paril.’ Miuyon ang mga tawo, ug ilang giayo ang mga paril.

Pero ang mga Israelinhon gibugalbugalan sa uban nilang kaaway ug giingnan: ‘Bisag irong ihalas lang ang motungtong, malumpag na ang inyong paril.’ Wala tagda sa mga nagtukod ang mga panginsulto ug nagpadayon sila sa pagtukod. Nag-anam ka taas ug ka lig-on ang paril.

Nagplano ang mga kaaway nga atakehon ang Jerusalem gikan sa lainlaing direksiyon. Nahadlok ang mga Hudiyo pagkahibalo nila. Pero si Nehemias miingon: ‘Ayaw mog kahadlok. Tabangan ta ni Jehova.’ Nagbutang siyag mga guwardiya  nga manalipod sa mga nagtrabaho, busa wala makaatake ang mga kaaway.

Nahuman ang mga paril ug ganghaan sa 52 lang ka adlaw. Gipaadto ni Nehemias sa Jerusalem ang tanang Levihanon para sa inagurasyon. Iya silang gibahin sa duha ka grupo sa mga mag-aawit. Misaka sila sa paril agi sa hagdanan nga naa sa Ganghaan sa Tuboran. Dayon ang usa ka grupo mipadulong sa wala ug ang laing grupo mipadulong sa tuo. Nagtugtog silag mga trompeta, cymbal, alpa, ug nag-awit kang Jehova. Miuban si Esdras sa usa ka grupo, ug si Nehemias sa laing grupo, ug nagtagbo sila sa templo. Ang tanang tawo​—lalaki, babaye, ug mga bata—​naghalad kang Jehova ug nagsadya. Madungog bisan sa layo ang ilang mga tingog sa kalipay.